Innuttaasunut

Innuttaasut eqqarsaatersuutaat tassaapput uagut najoqqutassavut pingaarnerit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sapaatip akunnerata naanerani Paamiuni innuttaasunik ataatsimiisitsinermi paamiormiut 50-init amerlanerusut eqeersimaarluartut aamma Kommuneqarfik Sermersuumit aallartitat paasisaqarluavipput.

”Nuannaarutigeqaara Paamiuni innuttaasut taama amerlatigisut kajumissuseqarlutik takkunnerat kommunillu sulineranut soqutiginninnerminnik ersersitsillutik. Saniatigut iluunngarlunga qujassutigaara isumassarsiaminnik aamma isummaminnik ingerlatsitseqqinnissamut piffissaqarmata, tamannami uagutsinnut politikerinut politikkikkut suliniutinik taakkua kissaataat naapertorlugit suliaqarnissatsinnut aqqutissiuussipput, Charlotte Ludvigsen sapaatip akunnerata naanerani innuttaasunik ataatsimiititsinerup kingorna oqarpoq.

Innuttaasut takkuttut 50-init amerlanerusut siullermik borgmesterip tikilluaqqusilluni oqalugiaataanik tusarnaarput, kingorna COVID-19-ip uagut kommunitsinnut sunniutai ilisimatitsissutigai aamma innuttaasunik peqataatitsinermut pilersaarut nutaaq pillugu paasissutissiivoq, taanna pillugu uani annermik paasisassaqarpoq https://kommuneqarfiga.sermersooq.gl/kl-GL/

Killiffik aamma siumut isigineq

Borgmesteri aallaqqaasiilluni ilisimatitsissuteqareerami Sanarfinermut Avatangiisinullu Ingerlatsivimmut oqaaseqarsinnaatitaaneq tunniuppaa, taannalu Paamiuni maannakkut ingerlatsinermik sanaartornermillu suliassat killiffiannik eqqartuivoq.

Ilanngullugu Paamiuni inuussutissarsiornermut siunnersuisooqatigiit nutaat ilisaritinneqarput, tassani kommunalbestyrelsimut ilaasortap Henrik Rachlevip siullermik ataatsimiigiarsimasunut inuussutissarsiornermut siunnersuisooqatigiinnik pilersitsinermut politikkikkut eqqarsaatersuutit tunuliaqutaasut oqaluttuarai. Marlunngorneq juunip 16-iat siunnersuisooqatigiit pisortatigoortumik inissitsiterlutik Paamiuni ataatsimiileriissapput.

Innuttaasut qanoq isumaqarpat?

Borgmesteri aamma angalaqataasut saqqummiussereermata ataatsimeeqataasut apeqquteqarnissaminnut periarfissinneqarput, periarfissaq taanna innuttaasunik ataatsimiisitsinerni immikkoortuuvoq pingaaruteqarluinnartoq. Piffissaq apeqquteqarfiusinnaasoq naammat innuttaasut nerrivinni eqimattakkaarlutik oqaluuserinninnissaminnut periarfissinneqarput, suut isorisatik isumassarsiatillu borgmesterimut anngukkusutatik eqqartorlugit.

Innuttaasut eqqarsaataat allanneqarput borgmesterimullu tunniunneqarlutik, borgmesterip taakkua oqaaseqarfigai ataatsimiinnermut peqataaffigineqarluartumut innuttaasunut qujassuteqannginnermini.