Sermersuumi innuttaasut ajornannginnerusumik tusaaneqarsinnaalissapput

Maanna Kommuneqarfik Sermersuumi innuttaasut suli ajornannginnerusumik tusaaneqarsinnaalissapput. Qarasaasiakkut nutaamik atortorissaaruteqalernikkut kommunimi ineriartorneq pillugu innuttaasut namminneq peqataasinnaalissapput, oqaaseqaateqarlutik, taasisarlutik, pingaarnersiuillutik allarpassuarnillu peqataallutik. Kommunip ineriartortinneqarnerani peqataanissaq ajornanngitsoq, nuannersoq malinnaaffigiuminartorlu. Paasisaqarnerorusukkuit atuarsinnaavat  www.kommuneqarfiga.sermersooq.gl

Ullumikkut Kommuneqarfik Sermersuup qarasaasiakkut innuttaasunik peqataatitsilluni attaveqaataa atuutilerpoq. Tamakku tamarmik ugguuna ingerlanneqassapput www.kommuneqarfiga.sermersooq.gl. Attaveqaat taaguuteqarpoq Kommuneqarfiga - imaluunniit Min Kommune - tassaallunilu kommunip Sermersuumi innuttaasunik tamanik peqataaqqusilluni aggersaanera.

- Kommuneqarfiga atorlugu sorpassuit suliarisinnaavagut. Qarasaasiakkut attaveqaatit atorlugit assigiinngitsorpassuartigut peqataatitsisinnaavugut, taavalu innuttaasutut nammineq ulluinnarni piffissaqaleraanni peqataasoqarsinnaavoq. Assersuutigalugu isumassarsianik nassiussisoqarsinnaavoq, taasititsinerni peqataasoqarsinnaavoq, imaluunniit missingersuutini pingaarnersiuinermi nikisiterisoqarsinnaalluni. Neriuppugut taamatut eqaatsumik sullissineq, attaveqaatip nassatarisaa atorluarlugu innuttaasunik amerlanerusunik peqataatitsisalerumaarluta. Peqatigitillugu maani kommunitsinni suliani aalajangersimasuni atorluarsinnaasatsinnik akissutinik katersisarnerput ajornannginnerulissaaq.

Assigiinngitsutigut peqataanerit saniatigut innuttaasut suliat ataasiakkat sumut killinnerinik paasiniaasarsinnaapput, namminneq isummersuutitik qanoq atorneqarnersut, minnerunngitsumillu qanoq inerneqarnersut malinnaaffigisinnaalerpaat.

- Kommuneqarfiga aqqutigalugu suliani malinnaalluarnissaq peqataanissamut kaammattuinissamut pingaaruteqarluinnartuuvoq. Peqataaneq nuannersuullunilu isumaqassaaq, taamaassaarlumi, Sermersuumi ineriartornermut nammineq isummersuutinik qanoq tunniussaqartoqarsinnaanersoq takusinnaalerutsigu, Anna-Sofie Skjervedal oqaluttuarpoq.

Illit nammineq Kommuneqarfiga atornissaanut aallartissinnaavutit, nittartakkami atuisutut nalunaarnikkut. Nittartagaq ataavartumik sulianik nutaanik immerneqartassaaq, illit nammineq immersueqataaffigisinnaasannik.

Innutaasunik peqataatitsineq pingaarnerpaatinneqarpoq

Kommuneqarfik Sermersuumi innuttaasunik peqataatitsineq sivisuumik pingaarnerpaatinneqarpoq. Manna tikillugu qangatut ingerlanneqartarpoq ilaatigut innuttaasunik ataatsimiititsisoqartarluni apeqqutinillu akisassanik immersuisitsisarluni, maannakkullu Kommuneqarfik Sermersuumi alloriaqqinnerusariaqarneq toqqarneqarpoq, qarasaasiatigullu attaveqaatit atorluarnissaat sassarfigineqarlutik.

- Uagut qinikkat inuit ulluinnarni inuunerannik sunniuteqartartunik aalajangiisarpugut. Taamaattumik isumaqarpunga periarfissaqalerfiatigut innuttaasut isumaannik tusarniarfigisassagivut. Qarasaasiakkut attaveqaat. Kommuneqarfiga atorlugu innuttaasut kommunip siunissaa pillugu ajornannginnerusumik peqataasalersinnaapput, neriuppunga attaveqaat atorlugu ullumikkut innutaasunik ataatsimiititsigaangatta angusinnaanngisartakkavut angusinnaajumaarivut. Isumaqarpunga tamanna sakkussaalluartoq, innutaasuullu tikillugu ataatsimeeqatigisarnerinut tapertaalluarsinnaasoq, borgmester Charlotte Ludvigsen nassuiaavoq.

Innutaasut tikillugit katersuuttarnerit inerteqqutaajunnaaraluartut, eqqaamaneqassaaq katersuunnermi malittarisassat atuuttut malinneqarnissaat.

Uani annertunerusumik atuarit uungalu ilanngullutit www.kommuneqarfiga.sermersooq.gl