Coronaqarnerani tamatta suliatta saniatigut suliaqarnissarput pisariaqartinneqarpoq. Qaangiuttoorluni sulinerusinnaavoq, nutaanik suliassinneqarnerusinnaavoq allalli immaqa sulinerminnik aallussiinnarniarlutik pisunut naleqqussartariaqarsinnaapput. Inuiaqatigiinneq ataatsimoorneruvoq, tsamaattumik ataatsimoorluta sassartariaqarlutalu ikiuuttariaqarpugut, aamma naak nalinginnaasumik suliarisartakkanniit allaanerujussuarmik suliaqarnissat pineqaraluarpat. Kommuneqarfik Sermersuumi pingaartillugit sammineqassapput, pissutsini ilungersunartuni maannakkut atuuttuni inuiaqatigiinnut pingaaruteqarluinnartumik sapiitsuliornermik iliuuseqartut. Taamaattut amerlanerusut pisariaqartinneqarput. Pisariaqartinneqarputit.
Qujanartumik, sulisut sulianik allanik suliaqarnissaminnut piareeqqasut pissutaallutik, ilaatigut Ippiarsuk saniatigut sulisussanik sulisussaqalerpoq , allaat ilai nalliuttuni Poorskikkunni ikiuuttarlutik pisimallutik. Tamanna Kommuneqarfik Sermersuumut assut pingaaruteqarpoq, annermillu utoqqarnut. Qujanarujussuaq!
Pisortat innuttaasullu inerteqqutinik innersuussutinillu peqquneqarnerisa nalaanni, inuiaqatigiit ingerlaannaqqullugit, malitassaannik malitsitsiniaaneq assut pisariusimavoq. Sulilu taamaappoq. Taamaattumik pisariaqartitsiffiunerpaani sulisussanik piareersimasunik peqarnerput Kommuneqarfik Sermersuumit assorsuaq qujagineqarpoq.
Assersuutigalugu Utoqqaat Illuata, Ippiarsuk, Margrethe Møller-ip, Marie Platou Haggæussen-ip aamma Karla L. Mathiesen-ip, tamarmik ulluinnarni allamik suliffeqartut, ikiuinerat assorsuaq iluaqutigisimavaa.
”Kommune sianerpoq oqarlunilu sulisussanik amigaateqarlutik, taava ikiuinissannut angerpunga. “Tamattami piffissami matumani ikiuuttussaavugut”, Margrethe Møller, ulluinnarni Inneruulat-ni sulisartoq, oqarpoq.
Taartaanissamik neqeroorut
Juliane D. Berthelsen, aamma Inneruulat-ni sulisoq, Najugaqatigiiffik Seernaq-mi aamma ullualunni sulisimavoq. ”Angerlarsimaannarnermiit allamik misilitaqarluni nuannerpoq”, oqarpoq.
Illua´tungeriillutik nuannarivaat, taamaattumik Juliane taartaasartutut ingerlaqqissasoq isumaqatigiipput. Aamma corona qaangiuppat.
Suliffinnik allattorsimaffik iluaqutaavoq
Coronaqarnerani sapiitsuliorsinnaasunik, allami suliffeqaraluarlutik, piffissami sivikitsumi sulisoqarsinnaanera nalaatsornerinnaanngilaq. Kommunimi suliffinnik allattorsimaffimmik pilersitsivoq, sulisussat piginnaasassaannik paasissutissanik imalimmik, paasinarsisimavorlu taakkua naak ullumikkut allami suliffeqaraluartik misilittagarisimasaat iluatinnaateqarlutik atorfissaqartinneqartut.
Kommuneqarfik Sermersuumiit kikkut tamarmik immikkut iliuuseqarsimasut, immaqalu ajornartorsiornitsinni allatulaaq suliniuteqarsimasut, qamannga pisumik assorsuaq qutsavigerusunneqarput. Tassa inuit ilissitut ittut coronaqarnerani aniguisitsisuupput.