Innuttaasunut

Ilisimasanik avitseqatigiinneq innuttaasunik paaqqutarinninnermik pitsaanerulersitsisarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuup, Danmarkimi Aalborg Kommuneata aammalu Savalimmiuni Tórshavnar Kommuna-p suleqatigiinnerisigut pingaartumik utoqqarnik paaqqutarinninneq pitsaassuserlu ilisimasanik avitseqatigiinnikkut ilinniarteqatigiinnikkullu pitsanngorsaaffigineqassaaq.

Sapaatip akunnerani 18-imi Kommuneqarfik Sermersuumi katsorsaasartut marluk timmisartumik aallassapput. Taakku Aalborgiliassapput, tassanilu Kommuneqarfik Sermersuup, Aalborg Kommune-ata aammalu Tórshavna Kommuna ilisimasanik avitseqatigiissitsineranni peqataassapput.  Tassani kommunini allani misilittakkat ilisimasallu paasisaqarfigiartussavaat, aammalu namminneq suliffigisaminni Kommuneqarfik Sermersuumi piginnaanngorsaaqqiiffimmi ilisimasaminnik tunniusseqataassallutik. Naggataatigut ilisimasanik paasisaqarsimanerit innuttaasunut iluaqutaasussaapput, nammineq ikiorsinnaanerup annertusarneratigut. Tamakku tamarmik innuttaasup inuunerata pitsaassusianik qaffassaataassapput – tamannaavorlumi anguniarneqartoq.

– Suliniut Nunani Avannarlerni Issittumi Piginnaanngorsaaneq – Nordisk Arktisk Rehabilitering ilisimasat, innuttaasut nammineq piginnaasaqarnerulernissaannut qanoq tapersersussanerlugit kommunini tamani avitseqatigiissutigisarpavut. Taamaaliortarpugut, innuttaasut nammineersinnaanerisa aalajangiusimanissaat pilerseqqinnissaallu pingaarutilerujussuummat – pingaartumik ataasiakkaat inuuneranni pitsaassuseq eqqarsaatigalugu. Kommunit tamatta suleqatigiikkaangatta, suut ingerlalluarnersut immitsinnullu sunik ilikkagassaqartinnerluta paasisaqarfigisarparput, Utoqqarnut tunngasuni fagchefi Arnannguaq Heilmann Christensen oqaluttuarpoq.

Suliniut Nunat Avannarliit Ministerrådiani tapersersorneqarpoq, siunertaallunilu ilisimasanik avitseqatigiittarnissaq, misilittakkanik avitseqatigiittarnissaq, sulisullu paarlaasseqatigiittarnissaannik periarfissanik pilersitsinissaq. Ukiup ingerlanerani kingusinnerusukkut workshopertitsisoqassaaq, paarlaasseqatigiissitsinernik katersiffiusussamik siunissamilu suliat ineriartortinneqarnissaannut periusissanik ineriartortitsiffiusussamik.