Innuttaasunut

Arnat ulluat atorluarsiuk. Persuttaasarneq akiorniarneqarli

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nunatsinni inuusoqisumi, apriilip 15-ianni 1948-mi arnat qinersisinnaatitaalerput. Danmarkimit ukiunik 39-nik, USA-miillu ukiunik 20-nik kingulliulluni. Tamanna immini tupinnartuliaanngilaq. Kisianni taamanikkumiilli Nunatsinni sivisuumik tanngassimaarutissaasumillu arnat nukittuut politikkimi peqataaneruleriartornerat ileqquliuunneqarsimavoq. Kitaani nunat tamat oqartussaaqataanerat naapertorlugu ingerlatsiffiusut amerlanerit sioqqutingaatsiaqalugit Naalakkersuisut arnamik siulittaasoqareernikuuvugut, illoqarfiillu pingaarnersaanni arnanik arlalinnik borgmestereqareerpugut, tamakku tanngassimaarutigisariaqarpagut.

Kisianni ullumikkut arnat ulluanni nassuerutigisariaqarparput sorpassuarnik tulluusimaarutigisaqarsinnaanata. Aammalu naligiissitaaneq eqqarsaatigalugu kanngusuutissatta annersaraat arnanik persuttaasarneq. Nunarput EU-mi ilaasortaasuuppat nunat taakku sanilliullugit tassaassagaluarpugut arnanik persuttaaffiunerpaasarfik. Alianaqisumik tamassuminnga nunatta arnartaasa 62 procentii nalaataqarsimapput.

Persuttaasarneq tamatigut eqqunngitsuliornerusarpoq, kisianni Nunatsinni arnat amerlanersaat namminneq angerlarsimaffimminni toqqissisimasinnaanngippata, piviusuuvoq uannut artornarlunilu akueriuminaatsoq. Inuiattut tamanna akuersaarsinnaanngilarput.

Kommunimi politiit pitsaanerusumik suleqatiginissaat sulissutigivarput. Aappariinni persuttaasarneq anigortinniarlugu ajornannginnerusumik sullissisoqarnissaa sulissutigaarput. Persuttaasarnermik nalaataqartartut ikiorniarlugit taamatut sulissuteqarpugut. Kisianni ajornartorsiut taamak annertutigisoq aatsaat aaqqissinnaavarput, angutit arnallu persuttaanermik takusaqarutta tusagaqaruttaluunniit tamatta akerliliisinnaagutta.

Ullumikkut arnat nunarsuaq tamakkerlugu ulluanni kissaatigisara tassaavoq: arnanik persuttaasarnerup iliuuseqarfiginissaa tamatta aalajangiutissagipput.

Arnat angutillu naligiissitaanissaat pillugu Nunarput amerlasuutigut angusaqarsimaqaaq. Ullut tamaasa arnat piginnaasaqarluartut akisussaaffittalimmik aqutsisutut sulisut naapittarpakka. Uanga arnaanera pissutigalugu suliffinnut naleqquttuunnginnera pillugu isumaqartunik naapitaqarsimanngisaannarpunga. Tamassumap takutiinnarpaa ullumikkut killiffitsinnut ajunngivissoq, kisianni Nunatsinni arnat tamarmik namminneq angerlarsimaffimminni toqqissisimasinnaalerpata aatsaat anguniagarput angussavarput.

Tamassi arnat ulluat atorluarisiuk.