Coronaqarnerani tamatta suliatta saniatigut suliaqarnissarput pisariaqartinneqarpoq. Qaangiuttoorluni sulinerusinnaavoq, nutaanik suliassinneqarnerusinnaavoq allalli immaqa sulinerminnik aallussiinnarniarlutik pisunut naleqqussartariaqarsinnaapput. Inuiaqatigiinneq ataatsimoorneruvoq, tsamaattumik ataatsimoorluta sassartariaqarlutalu ikiuuttariaqarpugut, aamma naak nalinginnaasumik suliarisartakkanniit allaanerujussuarmik suliaqarnissat pineqaraluarpat. Kommuneqarfik Sermersuumi pingaartillugit sammineqassapput, pissutsini ilungersunartuni maannakkut atuuttuni inuiaqatigiinnut pingaaruteqarluinnartumik sapiitsuliornermik iliuuseqartut. Taamaattut amerlanerusut pisariaqartinneqarput. Pisariaqartinneqarputit.
Utoqqaat Illuanni sulisut akisussaassuseqartut ingerlaannaq naapitassaapput . ”Najugaqartut ulloq unnuarlu ikiorneqarnissaminnik pisariaqartitsipput, najuunnissarput taamaattumik pingaaruteqartorujussuuvoq” Ivalu Reimer oqarpoq.
Utoqqaat Illuanni ningiuulluni coronap atuuffiani aamma Ivalu Reimer-imut nuannersorpassuaqarpoq. Tassami sulisut sulilluartaaqaat, illoqarfiup annersaata matoqqatinneqarnerani. Tamannalu assorsuaq pisariaqartinneqarpoq.
”Najugaqartut maaniipput manna angerlarsimaffigigamikku ulloq unnuarlu ikiorneqarnissaminnillu pisariaqartitsigamik.
Sulisut assigiinngitsunik suliallit pisariaqartippagut: eqqiaasut, igaffimmiut, pedeli, chaufføri, allaffik najugaqartullu pisariaqartitaannik tamanik isumaginnittut.”
“Ilisimaneqanngitsut” iliuuseqarsimasut
Sulisummi sulinerat avataaniit aamma minnerunngitsumik pingaartinneqarpoq. Tamanna Ippiarsummi sulisut sapaatip akunnerani kingullermik paasivaat, suliartorfianni allatulaaq takutitassinneqaramik.
Unami allagartarsuaq, sulisut sulinerat pillugu qujanarujussuaq sulilluarisilu ”ilisimaneqanngitsunit” piliarineqarsimavoq.
”Tamanna nuanneqaaq alutornarlunilu, aamma piumassuseqartitsillunilu suliartorusussusinitsitsivoq” Ivalu Reimer oqarpoq.
Taamaattumillu aqutsisut sulisut sulinerat pillugu sivitsunngitsoq nersualaarinnipput, tallimanngormat nalunaarummik agguaanneqartumik, peqatigitillugulu sodavandit tungusunnitsullu sassaalliutigineqarput.