Coronaqarnerani tamatta suliatta saniatigut suliaqarnissarput pisariaqartinneqarpoq. Qaangiuttoorluni sulinerusinnaavoq, nutaanik suliassinneqarnerusinnaavoq allalli immaqa sulinerminnik aallussiinnarniarlutik pisunut naleqqussartariaqarsinnaapput. Inuiaqatigiinneq ataatsimoorneruvoq, tsamaattumik ataatsimoorluta sassartariaqarlutalu ikiuuttariaqarpugut, aamma naak nalinginnaasumik suliarisartakkanniit allaanerujussuarmik suliaqarnissat pineqaraluarpat. Kommuneqarfik Sermersuumi pingaartillugit sammineqassapput, pissutsini ilungersunartuni maannakkut atuuttuni inuiaqatigiinnut pingaaruteqarluinnartumik sapiitsuliornermik iliuuseqartut. Taamaattut amerlanerusut pisariaqartinneqarput. Pisariaqartinneqarputit.
Elisabeth Sikemsen isumaqarpoq, kikkut tamarmik imminnut aperisariaqartut, coronamik nalaataqarnermi aniguniarnermi inuiaqatigiinnut qanoq iliuuseqarsinnaanerlutik. Nammineq taamaaliorpoq Meeqqerivik Ungaami aqutsisutut, tassani toqqissisimatitsinissamut tunngasunik pikkoriffeqarnerugamik.
”Inuiaqatigiit ingerlaannassappata, inuit tamarmik imminnut aperisariaqarput, qanoq iliorsinnaavunga? Matumani nalaanneqartoq tamatta anigorniagassaraarput”, Elisabeth Sikemsen oqarpoq.
Meeqqerivik Ungaaq ulluni makkunani ajornartuuinnermi upalungaarsimavoq, taamaalillutik angajoqqaat, inuiaqatigiinni pinngitsooratik sulisariaqartut meeqqaminnik paarsisussaqarniassammata. Paasinarluartumik amerlasuut ernumapput. Taamaapput meeqqat, angajoqqaat sulisullu. Qujanartumik toqqissisimaneq meeqqerivik Ungaami pikkorilluarfigineqarpoq, tamannalu ulluni makkunani atorfissaqartinneqaqaaq.
”Pingaarnerpaavoq, meeqqat, angajoqqaat sulisullu toqqissisimanissaat. Tassami siullerpaamik taamatut nalaataqarpugut, soorunalumi pilersaarusiorfigissallugu ajornakusoortorujussuuvoq, taamaammat ullut ataasiakkaarpavut”, Elisabeth Sikemsen oqarpoq.
Inuit ernummataannik tusarnaarnissani eqqumaffigisorujussuuaa, tassami ernumagaanni tusarnaarneqarluni immikkut eqqissisimanerulersitsisarmat. Taava aamma imminut sulisullu nutaarsiassanik nutaanerpaamik innersuussutinillu paasitinnissai isumagisarpaa, tassami pisumut annertunerusumik ilisimasaqaleraanni toqqissisimanarnerulersarmat.
Elisabethimut tassaaginnarpoq inuiaqatigiinnut akisussaassuseqarneq, ajornartuuinnermilu upalungaarsimanermik ingerlatsiinnarneq.
Taavami meeqqat angajoqqaavi politiini, Sanami pisiniarfinnilu sulisut? Tamatta inatsisinik malinninnissarput, napparsimasunik paarsinissarput aammalu nerisassarsiniarnissarput pisariaqartipparput. Akissussaaqatigiissaagut, pisariaqartinneqarpugummi.”