Atuarfiit matoqqagaluartut aamma angajoqqaanut sulisariaqartunut paarsisussaqannginnermilu atuariartortariaqartunut kisimi ammatinneqaraluartoq meeqqat atuartut atuarfimmi akeqanngitsumik suli nerisinnaassapput.
”Pisiniarfigisartakkagullu isumaqatigiissuteqarpugut, meeqqanut paarineqartariaqartunut nerisassanik ullut tamaasa aggiussisassasut, taamaammat meeqqanut neriartuinnarlutik takkunniartunut nerisassaqartitsissaagut”, Lone Nukaaraq Møller Meeqqanut Atuarfeqarnermilu Ingerlatsivimmi pisortaq oqarpoq.
Kommuneqarfik Sermersuumi aalajangerneqarpoq, upalungaarsimanertut aaqqiinerugaluartoq atuarfinni nerisitsisarneq ingerlatiinnarneqassasoq, tassani patsisaalluni:
”Nassuerutigisariaqaratsigu, kommunitsini meeraqarmat atuarfimmi nerisitsinermi nerinissamik pisariaqartitsisunik. Ulluinnarni pissutsit atugaat allanngorluinnareersut toqqisisimanngereersullu sumiginnassallugit inissaminiinningilaq”, Kommuneqarfik Sermersuumi borgmesteri Charlotte Ludvigsen oqarpoq.
Kommuneqarfik Sermersooq ataasinngorneq aallarnerfigalugu atuarfinni tamani atuartunut 20-nut nerisitsisinnaassaaq. Pisariaqartitsineq annertunerussagaluarpat amerlanerunissaat kommunimiit isumagineqarumaarpoq. Nerisassat meeqqaniit anninneqarsinnaanngorlugit taqualiortarnertulli poortorneqassapput.
Kommunip meeqqeriviini tamani ajornartoornermi paaqqinniffissanik aaqqissuussineq atuuppoq. Taakkunani nerisitsisarneq nalinginnaasutut meeqqerivinni sulisunit isumagineqassaaq.