Utaqqiisaagallartumik tupeqarfik, illoqarfimmi angerlarsimaffeqanngitsut 80 tuperni kiassagaasuni unnuiffigisinnaasaat Nuuk Imeq tunuani ammarneqangajalerpoq. Angerlarsimaffeqanngitsut akornanni Coronavirusip pinaveersimatinnissaa siunertaavoq.
Nuummi Unnuisarfik amerlasuunik atuisoqarpoq, Nuummilu Coronavirusip tuniluussinnaanera aarlerinartoqartillugu inuit amerlasuut ataatsimoornissaat pissusissamisuunngilaq. Taamaattumik Kommuneqarfik Sermersooq corona-virus atuunnerani angerlarsimaffeqanngitsut 80 inigisinnaasaannik tupeqarfimmik pilersitsivoq.
”Piffissami matumani angerlarsimaffeqanngitsut illersorneqassapput. Uagutsitulli namminerisaminnik illersorneqarsinnaasumik najugaqanngillat. Allaanerusunik unnuisarfiusinnaasunik nassaarniarluta suut tamaasa misissoreerlugit tamanna nuannaarutigisorujussuuara”, Kommuneqarfik Sermersuumi borgmesteri Charlotte Ludvigsen oqarpoq.
Toqqit oqorsagaapput kiassaasersugaallutillu, uffarfeqarput perusuersartarfeqarlutillu. Tupeqarfimmi allaat errorsisarfeqartussaavoq
Kommuneqarfik Sermersuumi Ingerlatsinermut Avatangiisinullu Immikkoortoqarfiup tupeqarfissaq ullumimiit aputaajarlugu eqqagassaajarlugulu aallartippaa, ataasinngorpallu toqqit nappartiterneqassapput. Angerlarsimaffeqanngitsut tupeqarfimmi ullormut pingasoriarlutik nerisaqartassapput, aamma tupeq ”napparsimaveqarfik” pilersinneqassaaq, tuniluuttoqalissagaluarpat tassani peqqissaasumit misissortittoqarsinnaalluni.
”Angerlarsimaffeqanngitsut amerlasuut Coronavirusimik tunillatseriaannaapput. Taamaattumik sapinngisannguatsinnik illersorniarlugit iliuuseqarfiginissaat pingaartutut isigaara. Inissamik amigaateqarneq inuunermik ulorianartorsiorfiusanngilaq”, Charlotte Ludvigsen oqarpoq.
Maannakkorpiaq unnuisarfimmik atuisuni eqqiluisaartitsinissaq sukateriffigineqarpoq aammalu atuisut amerlasuut qanippallaannginnissaat qulakkeerniarlugu, angerlarsimaffeqanngitsunut malittarisassaliortoqarpoq.