Innuttaasunut

OCN atorlugu pikkorissaaneq iluatsilluartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Karl Ludvigsen Paamiuneersoq, pikkorissarneq Open College Network ingerlassimavaa, pikkorissarnerillu assigiinngitsut aqqutigalugit ajoqissatut ilinniarusulersimalluni – maannalu Ilulissani seminariamiinnissamut akuerisaalluni.

Paamiuni tarnikkut pissutsit pillugit suliassaqarfiup immikkoortuani aqutsisuusup, Andrine Jensen-ip Karl Ludvigsen ajoqinngorniarnissaanut kaammattorlugulu ikiorsimavaa. ”Ilinniagarilissammagu, aammalu Kaalip suliffimmik misiliinera siulleq peqataaffigisinnaagakku nuannaarutigaara”, Andrine Jensen oqaluttuarpoq.

Karl Ludvigsen sapaatip-akunnerini tallimani Ilulissani atuarnini ingerlatereerlugu maanna Paamiuni suliffimmik misiliivoq.

Open College Network, imaluunniit ulluinnarni OCN-imik taasagarput ilinniarnermik ingerlatsiffiuvoq akuerisaasoq, tassani innuttaasut piginnaasaqarfimminni ilinniagaqarnikkut allagartartaarsinnaallutik. Open College Network periusiuvoq pisortatigoortumik ileqquusumillu ilinniartitaanerup avataatigut piginnaasanik ilikkakkanillu naleqarluartitsisoq.

Innarluutilinnut Tarnimikkullu nappaatilinnut Fagchefi, Susanne Kærulff Ettrup oqaluttuarpoq immikkoortortaq OCN-Danmark aqqutigalugu akuersissummik peqartoq.

”OCN-Danmark aqqutigalugu immikkoortortami sulisuvut arlallit OCN-aqqutissiuisutut ilinniagaqarnikuupput. Suleqatitta aqqutissiuisutut ilinniartitaaneq ingerlassinnaavaat, taassuma saniatigut immikkoortortami arlalinnik sulisoqarpoq suliffiup iluani pitsaassutsimik qulakkeerinissamik ilinniagalinnik”, Susanne Kærulff Ettrup oqaluttuarpoq.

Ukiumut ataasiarluni sapaatip akunnerani 41-mi tallimanngornermi innuttaasunut allagartat OCN-ilinniagaqarsimanermut  tunniunneqartarput.