Innuttaasunut

Paamiuni innuttaasunik ataatsimiisitsineq iluatsilluartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Illoqarfimmi innuttaasut timimik atuinerulernissaat pillugu suliniummi innuttaasut peqataatinneqarnissaat anguniarlugu, Paamiuni katersortarfimmi Kommuneqarfik Sermersuumiit innuttaasut ataatsimiisinneqarput.

Politikkerit Aningaasaqarnermut Inuussutissarsiornermullu Ataatsimiititaliameersut innuttaasut 40-sut ataatsimeeqatigaat. Innuttaasut qanoq iliortoqarsinnaaneranik kiisalu kissaatiminnik politikkerit eqqartueqatigaat.

Eqqartuisoqangaatsiarpoq, ilaatigut timigissartarfinnik amerlanerusunik pilersitsinikkut innuttaasut timiminnik atuinerulernissaat anguneqarsinnaasoq eqqartorneqarluni. Nammineq kajumissuseq atorlugu suliniarneq eqqartorneqalermat unnuarissat eqqaaneqarput. Nerrivikkuutaarluni eqqartueqatigiinnermi politikkerit nerriviit tulleriaallugit tusarnaarfigaat, taamaasillutik takkuttut oqaasissaat tamaasa tusaasinnaajumallugit.

Aaqqissuussaq naammassiartuaanerani siunnersuutit saqqummiunneqarput, siunnersuutillu eqqartorneqaqqittussanngorlugit allattoriarlugillu Nuummut ingerlateqqinneqarput.

Ullup tulliani politikkerit Aningaasaqarnermut Inuussutissarsiornermilu Ataatsimiititaliameersut qatserisartoqarfik pulaarpaat. Ukiaq Paamiuni ikuallattoqarujussuarnerani innuttaasunik pingasunik ajornaarfiusumi qatserisartut qanoq sulisimanerat tassani oqaluttuarineqarpoq.

Ataamiititaliameersut aamma Royal Greenlandimut pulaarput, tassa fabrikkimi pisortaq Jan Jørgensen fabrikkimi qanoq sulisoqartarnersoq oqaluttuaraa. Inuusuttut aallartisarneqarnissaat Royal Greenlandimiit suleqataaffigineqarusuppoq, meeqqallu mikisuuneraniit fabrikkimi takornariartinneqartarput, tassani fabrikkimi qanoq sulineq ingerlasanersoq takutinnissaa siunertaasarluni. Taakkulu meeqqat inersimaneruleraangamik atuarfimmiit suliffimmik misiliisoqaleraangat fabrikkimi misiliinissaat neqeroorutigineqartarluni, taamaaliornikkut sapinngisamik meeqqat amerlanerpaat peroriartorneranni akuutinneqarnissaat Royal Greenlandimiit anguniarneqarpoq.

Kiisalu Ataatsimiititaliameersut angalanerminni Inuussutissarsiornermi Siunnersuisoqatigiit aamma Najukkami Ataatsimiititaliaq ataatsimeeqatigineqarput, aammattaaq Materielgårdi tingooraavillu pulaarneqarlutik.