Meeqqat angerlarsimaffiup avataanut inissinneqartartut ikinnerussapput, meeqqallu siusissukkut innarlerneqarsinnaaneri annikillisinneqassaaq. Ilaqutariinnut politikki nutaaq taamatut imaqarpoq, Kommunalbestyrelsimit qanittukkut akuerineqartoq.
”Ilaqutariinnut politikki nutaaq assorsuaq nuannaarutigivarput, aamma ilaqutariit inuunerinik taama annertutigisumik maanna aallussaqarmat. Alloriarnerit nikisitserujussuarpata annikippataluunniit allanngueqataasarneri ilisimavarput”, Meeqqanut Ilaqutariinnullu Ataatsimiititami siulittaasoq Uju Petersen oqarpoq.
Iliuuseqarneq psykoterapeuterpassuit naammasseqqammersut ikiorsiullugit pissaaq. Taamaattumik Tasiilami, Nuummi aamma Paamiuni ilaqutariinnut sullissivinni immikkut psykoterapeutimik atorfinitsitsisoqassaaq. Psykoterapeutip ataatsip ilaqutariit arfineq-marluk angullugit ataatsikkut ikiorsinnaavai.
Angerlarsimaffimmukarluni perorsaanermik ilitsersuinermillu tapersersuineq aamma neqeroorutigineqassaaq – taakkuupput ilaqutariinnukarlutik orniguttartuusut, ilaqutariinnut ulluinnarni tamanik isiginnissinnaajunnaarlutik pissutsinillu sammiveerullutik ulloqarnermik misigisunut, imaluunniit angajoqqaat angajoqqaatut inissisimanerminnik ajornakusoortitsisunut, taamaalillutillu ulluinnaat aaqqissuussaanerusut atulernissaannut ikorfartorneqarlutillu ikiorneqarnissaminnik pisariaqartitsisunut.
Kalaallit psykoterapeutit naammasserlaat ikiortiginerisigut Kommuneqarfik Sermersuumi ikiuisinnaaneq pitsaanerulissaaq. Ilaqutariit katsorsartinnermikkut ulluinnarni ingerlallualernissaminnut piginnaanerulersinnaapput, taamaalillutik meeqqat angerlarsimaffiup avataanut inissinneqartartut ikilillutik.
Sulisut amerlanerusut
Tasiilami sullissinermut tunngasut pitsaanerulissapput. Ukiuni kingullerni suliassatigut kinguaattoornerit aamma ilaatigut isumaginninnikkut misissuinerit malitseqartittarneri qitiutinneqarsimapput, taamatullu angajoqqaarsiani inissinneqartunik nakkutilliineq. Angalasartoqatigiit, Tasiilamiissimasut, isumaginnikkut misissuinernik kinguaattoorutit naammassillugit isumagisimavaat, ilaatigut Nuummi sullissisunik ikiorneqarlutik, aammali najukkami sullissisut Tasiilamilu isumaginninnermi siunnersortit annertuumik sulinerisigut anguneqartumik.
Massakkut Kommuneqarfik Sermersooq ukiuni sisamani tulliuttuni ukiumut 1,8 millioner koruuninik missingersuusiorpoq. Tassani Tasiilami sullissinermik suliallit nutaat sisamat kissaatigineqarput. Agguaqatigiissillugu suliat 35-it taakkunannga isumagineqarsinnaapput. Tasiilami sullissisut amerlinerisigut suliassat ingerlalluarsinnaalissapput peqatigitillugulu sulisut suliat pillugit ulapputeqarpallaarunnaassapput. Taamatut iliornikkut atorfik pilerinarnerulersinneqarsinnaavoq.
”Innuttaasut ikiorneqarnissaminnik pisariaqartitsisut takusinnaavarput, ikiorsinnaasariaqarpavullu nukissanik takutitsinikkut taamaalillutillu ulluinnarni nukissaqartinnerulerlugit. Ajornartorsiuteqarnerup oqallisigineqarnissaa paquminartuussaanngilaq, imaluunniit ikiorneqarnissamik pisariaqartitsineq, taamaattumik suliniuteqarnerput annertusarparput, aamma Tasiilami”, Meeqqanut Ilaqutariinnullu Ataatsimiititami suilittaasoq Uju Petersen Oqarpoq.
Taamatut iliornikkut meeqqap siusissukkut iliuuseqarfigineqarsinnaanera aamma angerlarsimaffiup avataanut inissiinerit ikilineqarnissaat Kommuneqarfik Sermersuup neriuutigivaa.