Innuttaasunut

Tasiilami inuusuttunut ornittagartaalersut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommunalbestyrelsip Tasiilami 2021-mi januaarip aallaqqaataani inuusuttunut ornittagartaarnissaq akuersissutigeqqammerpaa. Piareernissaanullu aaqqitassat ikittuaraannanngorput.

Inuusuttunut ajornartorsiortunut neqeroorutissaqannginnermi inissakinneq aamma sulisussanik piukkunnartunik atorfinitsitsinissaq ajornakusoortoq patsisaasut ilagaat. Tamannalu qaangerniarlugu Kommuneqarfik Sermersuumi kommunalbestyrelse iliuuseqarniarlerpoq, pingaartumik Tasiilami meeqqanut angerlarsimaffiup siunertaata allanngortinneqarneranut atasumik meeqqanut mikinerinnarnut nerqeroorutinngortinnerata kingunerisaanik ajornartorsiutip annertunerulernera eqqarsaatigalugu.

”Taamanerniilli Tasiilami kommunillu sinnerani inuusuttunik ulloq unnuarlu angerlarsimaffinnut inissiiffissaaleqisalernerput ajornartorsiutigingaatsialerparput, taamaammat inuusuttunut ornittagaq nutaaq akuersissutigineqarmat nuannaarutigisorujussuuara. Maannakkut amigaatigiinnalerparput, Prinsesse Margrethes Børnehjemimi init atorneqanngitsut attartornissaannut akuerineqarnissaq, iluatsinnissaalu neriuutigeqaarput”, Meeqqanut Ilaqutariinnullu Ataatsimiititami siulittaasoq Uju Petersen oqarpoq.

Politiit kisitsisaataasigut takuneqarsinnaammat, kinguaassiutitigut kannguttaatsuliornerit, nakuusernerit, tillinniarnerit aserorterinerillu pillugit nalunaarutiginninnerit amerleriartut Tasiilami annertusisamik suliniuteqarnissaq pisariaqarpoq.

Taakku saniatigut sullissisussaaleqinerujussuaq atuuppoq, sullissisut upernaaq qulingiluaapput – maannakkut marluinnaapput – taamaattumik suliassatigut annertuumik kinguaattooqqasoqalereerpoq. Atorfinitsitsisinnaannginnermi ilaatigut covid 19-ip atuunnerani killilersuinerujussuaq patsisaavoq. Sulisut amerlasuut misigisimaleriataaramik Danmarkimi ilaquttaminniit ungasissorujussuarmiillutik.

Kommuneqarfik Sermersuumi kitaani kangianilu inuusuttut qulit 12-illu akornanni amerlatigisut Namminersorlutik Oqartussat ulloq unnuarlu angerlarsimaffiini inissinneqarnissamut aasarli utaqqisuutigineqalerput.