Meeqqat inuusuttullu namminerminnut tunngasoqartillugu peqataatinneqarnerulissapput. Meeqqamut ataatsimut imaluunniit inuusuttunut ataatsimoortunut amerlanerusunut tunngasoqartillugu peqataatitsisarnerup pitsaanerulersinneqarnissaa Borgmester Charlotte Ludvigsenip anguniarpaa. Tamatumunnga periusissiaq nutaaq aqqutissiuissaaq.
Kommunalbestyrelsip periusissiaq meeqqat inuusuttullu suliani namminerminnut attuumassutilinni peqataatinneqartarnerisa pitsaanerulersinneqarnissaanut qulakkeerisussaq akuersissutigimmagu Charlotte Ludvigsenip qungujunnera paatsuugassaanngilaq.
”Meeqqat inuusuttullu peqataatinneqartarnerannut qitiutitsinerulernerput nuannaarutigeqaara. Nittartagaq Kommuneqarfiga atorlugu innuttaasunik siammasissumik peqataatitsinerput aallartilluarpoq, tamannali uniffigiinnassanngilarput Meeqqat inuusuttullu assigiinngitsorpassuarnik soqutigisaqarput. Taamaattumik innuttaasunik peqataatitsinermik attuumassuteqarnerusumik meeqqanut inuusuttunullu tulluarsakkamik aallartitsissaagut,” borgmester Charlotte Ludvigsen oqarpoq.
Ataasiakkaat ataatsimoortullu peqataatinneqassapput
Meeqqat inuusuttullu peqataatinneqarnissaannut periusissiaq innuttaasut peqataatinneqarnissaannut periusissiamut pioreersumut ilassutaavoq, tassanilu inuttut ataasiussuseq ataatsimuussuserlu tamarmik qitiutinneqarput.
Ataasiakkaanut isumaginninnikkut suliani meeqqamut inuusuttumulluunniit ataatsimut tunngassuteqartuni sullissisut oqaloqatigineqarsinnaanerinik tamanna isumaqarsinnaavoq. Malittarisassat qeratasut matumani eqqartorneqanngillat, ataasiakkaalli ukiui, inerisimassusaat pissutsillu allat attuumassutillit eqqarsaatigalugit kommunimit eqqummaarinnerunissaq pineqarluni.
Ataatsimoortunut assersuutigalugu pinnguartarfiit inuusuttunulluunniit klubbit nutaat tungaasigut peqataatitsinerulernissaq pineqarpoq.
”Politikerit inersimasullu meeqqanut inuusuttunullu tusarnaarnikkut ataatsimut isigalugu ilikkagassanik ulikkaarput. Inersimasunit allaanermik isiginnittaaseqakkajuttarput, taakkununngalu arlaannik tunngassuteqartoqartillugu oqaaseqarfigisinnaanissaat pisussaaffigigipput isumaqarpunga” borgmesteri iluarinnittoq taamatut oqarpoq.