Skemami kinguaassiutitigut peqqinneq aamma imminut toqunnissamut pinaveersaartitsineq

Kommuneqarfik Sermersuumi pitsaaliuinermi siunnersortit Tasiilami septembarip oktobarillu ingerlanerani assigiinngitsunik pinaveersaartitsinermut suliniutinik suliaqarput. Ilaatigut kinguaassiutitigut peqqinneq, imminut toqunnissamik pinaveersaartitsineq aamma digitalikkut pimmatiginninneq sammineqarsimapput.

Piffissami kingullermi Tasiilami meeqqat inuusuttullu Kommuneqarfik Sermersuumi pitsaaliuinermi siunnersortinit qulequttanik assigiinngitsunik atuartinneqarput. Tamaanna assigiinngitsuni naapeqatigiittarfikkut ingerlanneqarpoq assigiinngitsunillu ukiulinnut sammitinneqarlutik.

4.-7. klassit digitalikkut pimmatiginnittarneq pillugu atuartinneqarput, 8.-10. klassillu Think Inuk, tassa imminut toqunnissamik pinaveersaartitsinermut suliniut, pillugu atuartinneqarlutik. Tamatuma saniatigut atuartut angajulliit aanngajaarniutinik pinaveersaartitsineq, Projekt PAS, pillugu ilikkagaqarnerupput.

Atuartitaaneq atuarfiup avataani

Suliniut PAS aamma Majoriami Piorsaavimmi atuartunit 35-nik peqataaffigineqartumik ingerlanneqarpoq. Tamatuma saniatigut pitsaaliuinermut siunnersortit unnunni pingasuni Inuusuttut Kulturikkut illuat, Igdlo, pulaarpaat, tassanilu illoqarfimmi inuusuttut 60-it Think Inuk, kinguaassiutitigut peqqinneq aamma imigassartortariaaseq pillugit qulequttat sammitinneqarput. Tamatuma saniatigut atuartut angerlasimaffianni nunaqarfimmiunut meeqqanut aaqqissuussisoqarpoq, taakku naartunaveersaarneq, kinguaassiuutitigut nappaatit, naartuneq minnerunngitsumillu killissat pillugit atuartinneqarput.