Partiit missingersuutinik isumaqatigiissuteqartut: Ukiut tulliuttut arfinillit ingerlanerini inissiat 1.850-inik amerlanerulernissaat

Kommuneqarfik Sermersuumi Partiit missingersuutinik isumaqatigiissuteqartut, Inuit Ataqatigiit, Suleqatigiissitsisut aamma Demokraatit isumaqatigiissutigivaat 2021-mi missingersuutini inissiat 1.850-it sanaartorneqarnissaasa aallartinneqarnissaat. Inissiat kommunimi tamarmi sanaartorneqassapput ukiullu tulliuttut 6-it ingerlanerini piareerneqassapput.

Nammineq inigisaqarnissaq inuttut pisinnaatitaaffiuvoq. Taamatut Kommuneqarfik Sermersuumi kommunalbestyrelsimi partiit isumaqatigiissuteqartut isumaqarput, 2021-mut missingersuutinik isumaqatigiissuteqaqqammersut. Inuit Ataqatigiit, Suleqatigiissitsisut aamma Demokraatit isumaqatigiissutigivaat ukiuni tulliuttuni 6-ini inissiat 1.850-it kommunimi tamarmi sanaartorneqarnissaat aallartinneqassasoq. Kisitsisit Iserit aqqutigalugu massakkut inissianik nalinginnaasunik utaqqissut allattorsimaffianniittut amerlaqatigivaat.

Kommune ullumikkut innuttaasut inissamik pisariaqartitsinerinik assut ajornartorsiuteqarpoq. Tamatuma ilaqutariit Nuummiit Tasiilamiillu nuuttariaqartarnerat kingunerivaa. Pingaartumik inuusuttunut namminneq ineqalernissaminnik kissaateqartunut tamanna eqquisuuvoq. Illoqarfinni Paamiuni aamma Ittoqqortoormiini inissiat innuttaasut pisariaqartitaat kissaataallu malillugit nutarsarneqarnissaat pisariaqarluinnartoq kommunimit isumaqarfigineqarpoq, taamaasilluni Kommuneqarfik Sermersuumit peqqissumik inuuneqarnissaq - sumiluunniit najugaqaraluaraanni - tapersersorneqarpoq.

- Tassami angerlarsimaffeqarnissaq sunut tamanut attuumassuteqarpoq. Pitsaasumik angerlarsimaffeqarani peqqissumik ajunngitsumillu inuuneqarsinnaaneq takujuminaatsuuvoq. Taamaattumik inissianik amigaateqarneq eqqartoraangatsigu innuttaasut tamaasa eqqarsaatigineqartarnissaat pingaaruteqartuuvoq. Nuannaarutigivara partiit isumaqatigiissuteqartut akornanni inissianut tunngatillugu annertuumik anguniagaqarneq isumaqatigiissutigisinnaagatsigu, borgmesteri Charlotte Ludvigsen (IA) oqarpoq

Kommunip inissiaatileqatigiiffiata Iserit ukiuni 6-ini tulliuttuni inissiat ikinnerpaamik 1.850-inik amerlineqarnissaat isumagissavaa. Inissiat amerlissutissat inissiaassapput assigiinngitsunik ilusilersukkat aamma najugaqatigiiffittut neqeroorutit. Inuusuttunut inissiat, ilaqutariinnut inissiat aamma utoqqarnut inissiat salliunneqassapput – aamma partiinit isumaqatigiissuteqartunit innuttaasut najugaqatigiiffinnik pisariaqartitsisut puigorneqanngillat, taakku missingersuutinik isumaqatigiissuteqarnermi aamma salliunneqarmata.

Missingersuutinik isumaqatigiissuteqarnermi partiit isumaqatigiissuteqartut Iserit qinnuigissavaat ukiumut inissiat Nuummi ikinnerpaamik 100-nik amerlineqartarnissaannik, taakkunannga 50-it inuusuttunut inissianut aamma utoqqarnut inissianut immikkoortinneqarlutik.

Tasiilami Paamiunilu Iserit ukiuni tulliuttuni 10-ni ukioq allortarlugu inissianik nutaanik 10-15-inik amerliliisassaaq. Amerliliinerit sanaartornermik ingerlataqartut entreprenørit suliarisinnaasaat ilutigalugu ingerlanneqartassaaq.

Ittoqqortoormiit pillugu Iserit qinnuigineqassaaq inissiat nutarterneqarnerat siuartinneqassasoq, illoqarfimmi innuttaasut kissaataat pisariaqartitaallu naammassiumallugu.

Iserit aamma kommunimi inissaaleqisunut najugassatut neqeroorutaasinnaasunik sanaartoqquneqassaaq. Partiit isumaqatigiissuteqartut aamma innuttaasut inuuniarnermikkut ajornartorsiuteqartut sapinngisamik toqqissisimanartumik inuuneqarnissaasa qularnaarneqarnissaa anguniagarivaat.

- Kommune tamakkerlugu ilaatinneqarnissaa pingaaruteqarpoq, inissaaleqinermik ajornartorsiut aaqqiiviginiarutsigu. Inissaaleqineq Nuummi kisimi ajornartorsiutaanngitsoq takusinnaavarput. Missingersuutinik isumaqatigiissuteqarnerput manna takutitsivoq kommunimi illoqarfinni tamani inissaaleqinerup aaqqiiviginiarneqarneranik – Ittoqqortoormiiniit Tasiilamut aamma Paamiuniit Nuummut Justus Hansen (D) missingersuutinik isumaqatigiissuteqarneq pillugu oqarpoq.

Missingersuutinut isumaqatigiissut uani atuarsinnaavat