Kunngissaq Nuummi Royal Run-imi arpaqataassaaq

2020-mi sisamanngorneq maajip ulluisa 28-anni Royal Run Kalaallit Nunaanni illoqarfiit pingaarnersaanni Nuummi ingerlanneqassaaq, tassanilu Kunngikkormiutut Ataqqinassusilik Kunngissarput arpaqataassaaq. Royal Run-imi arpannermi 2020-mi una siullersaassaaq.

Nuummi 2020-mi Royal Run-ip siullermik aallartinnissaanut Kunngissaq Kalaallit Nunaannukassaaq. Danmarkimi maajip ulluisa 28-anni Royal Run ingerlanneqassammat, Kalaallit Nunaanni Royal Run siulliulluni ingerlanneqassaaq.

Nuummi Royal Run-ip ingerlanneqarnissaanut qilanaarineqarpoq:

”Naalagaaffeqatigiinnermi arpannermi aaqqissuussani annerpaaq, Royal Run, Kalaallit Nunaanni ingerlanneqassaaq. Kalaallit Nunaanni inuit aatsaat taama amerlatigisut katersuunnissaannut qilanaarpunga - ingasassaqaaq. Neriuppunga arpannermut soqutiginninnerulersitsiumaartoq taamaalillunilu ulluinnarni aalanerulernissamut iluaqutaajumaartoq,” arpannermut aaqqissuisoq Kim Godtfredsen oqarpoq.

Aamma Kommuneqarfiup Allaffiani taama qiimmaallaqqasoqartigaaq:

”Royal Run-ip ingerlanneqarnissaanut aaqqissuisuunerput assut nuannaarutigaarput, ilaatigut inuiaqatigiit peqqissusaasa ukkatarinissaa peqataaffigissagatsigu. Nuuk siusinnerusukkut nunani tamalaani aaqqissuussanut kulturikkut timersornikkullu katersuuffiusunut aaqqissuisooreerpoq. Kommunimi innuttaasut Nuummi pinngortitamik kusanartumik avatangiiserissaarlutik Kunngissaq peqatigalugu ataatsimut arpaqatigiinnissamut periarfissaqalerput. Illoqarfitta takutinnissaanut qilanaarpugut,” Kommuneqarfik Sermersuumi borgmesteri Charlotte Ludvigsen oqarpoq.


Ataatsimut nuannisaqatigiinneq tamanut ammavoq

Qallunaat aaqqissuisuisa Royal Run-ip ataatsimoorullugu Kalaallit Nunaanni ingerlanneqarnera assut nuannaarutigineqarpoq:

”Nuummi Royal Run-ip ingerlanneqarnera peqataasunut tamanut nuannerluinnartumik misigisassaannaassanngilaq aammali Royal Run-ip ingerlanneqarnissaanut takorluukkat ilagilluinnarpaat. Royal Run ataatsimoortunut nuannisaqatigiinneruvoq, taamaalillutalu Naalagaaffeqatigiinneq Kunngissaq kalaallillu peqatigalugit Nuummi nalliuttorsiutiginissaanut periarfissaqalerpugut. Soorlu Savalimmiuni 2019-imi Royal Run-imut atatillugu Danmarkimi Royal Run-ip piinsimi ingerlanneqarnissaa nalunanngitsumik immikkuullarilluinnassaaq,” Jakob Larsen, Dansk Atletik-imi pisortaasoq Idrætsvisionen Bevæg dig for livet, Royal Run-imik aaqqissuisuusut sinnerlugit taama oqarpoq.

Royal Run arpannerup naammassinerani qaffasissumik inissittarnermut attuumassuteqanngilaq. Ungasissutsit arpanneqarlutillu pisuffigineqarsinnaapput, aamma ilaqutariinnut aneerussivilisarlutik kaassuartunut peqataanissaq immikkut ingerlaarfissaqarpoq. Taamatut aaqqissuussaareerpoq, Jakob Larsen oqarpoq:

”Royal Run kikkunnut tamanut ammavoq - timikkut ilungersunartorsioraanni, arpattartutut misilittagartuujugaanni, imaluunniit pisuinnarusukkaanni, tamanut ammavoq. Royal Run-imi ataatsimoorluni timersoqatigiinneq pingaarnerpaavoq, taamaattumik inuit qassinilluunniit ukioqaraluarpata, qanoq qasujaatsigigaluarpata aamma anguniagaqaraluarpata pisumut peqataanissaannut isumassarsiortikkusuppavut.”

Paasissutissat allat takukkit maannangaarlu peqataanissamut nalunaarlutit uani: www.royalrun.dk

Royal Run Kalaallit Nunaanni ingerlanneqarnissaanut paasissutissat

  • Sisamanngorneq, ulloq 28. maaji 2020 nal. 17:00-imiit

  • Royal Run Nuummi ingerlanneqassaaq

  • Ungasissutsit tassaapput One mile, 5 km aamma 10 km

  • Illit nammineq aalajangissavat arpakkusunnerlutit imaluunniit pisukkusunnerlutit

  • Peqataasinnaasut 4.000-iupput

Royal Run pillugu paasissutissat

  • Royal Run 2020 Danmarkimi 1. juuni 2020-mi ingerlanneqassaaq

  • Royal Run 2020 Kalaallit Nunaanni Nuummi siullermik 28. maaji 2020-mi aallartinneqassaaq.

  • Danmarkimi Royal Run 2020 makkunani ingerlanneqassaaq Sønderjylland (Sønderborg), Aalborg, Odense aamma København/Frederiksberg.
  • Bornholmimi Royal Run Kunngikkormiunit peqataatitaqarani ingerlanneqassaaq. DGI Bornholm aamma Viking Atletik taakkuupput aaqqissuisut.

  • Najukkani aaqqissuisut tassaapput Sport Event Syd, Aalborg Atletik aamma Motion, OGF aamma Sparta. Kalaallit Nunaanni Kim Godtfredsen aaqqissuisuuvoq.

  • Illoqarfinni tamani ungasissutsit One mile (1,6 km), 5 km imaluunniit 10 km arpallugilluunniit pisuffigineqarsinnaapput.

  • Royal Run 2019 Savalimmiuni 1. juuni ingerlanneqarpoq aamma Aalborgimi, Aarhusimi taavalu Københavnimi/Frederiksbergimi kiisalu Bornholmimi Kunngikkormiunik peqataatitsisoqarani 10. juuni 2019-imi ingerlanneqarluni.

  • 2019-imi Royal Run-imut peqataaniarlutik nalunaartut 82.000-t sinneqarput.

  • Royal Run siullerpaamik 2018-imi Kunngikkormiusut Ataqqinassusillip Kunngissap 50-inik ukioqalerneranut atatillugu ingerlanneqarpoq. Tassani Danmarkimi illoqarfiit annersaanni tallimani 70.500-t sinnerlugit peqataanissamut nalunaarput.

  • Royal Run idrætsvisionen Bevæg dig for livet-imit, Danmarkimi Idrætsforbund, DGI aamma Dansk Atletik Forbund suleqatigalugit aaqqissuunneqarpoq. TV 2 aamma Regionit Royal Run-imi tusagassiortutut suleqatigiipput, taavalu TrygFonden, Nordea-fonden aammma Novo Nordisk Fonden pilersaarusiornertaanut suleqatigiillutik.

  • Paasissutissat allat: www.royalrun.dk