Innuttaasunut

Nalliuttorsiornermi atatillugu tusarnaartitsineq inoqarluartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq ukiuni qulini nalliuttorsiorneranut atatillugu, sapaatip akunnerata naanerani ilaqutariinnut Nuuk Centerimi tusarnaartitsisoqarpoq.

Inuit amerlasuut takkupput Nuuk Centerilu ulikkaangajallugu, meeqqat Hinnarimmut tusarnaartut Hinnarik frisbee aamma Hinnarik ballonnii atorlugit erinarsoqataanerat tusarsaavoq, Hinnarik pisarnertut nuannaartuunera tusarnaartitsilluartarneralu tusarnaarianut nuannaartitsinera malugineqarsinnaavoq.

Paninnguaq Jensen Glenn Møller-ilu tusarnaarianut aamma nuannaalersitsipput, Paninnguup tusaamasaassutini ”Naapeqqaarattali” atormagu tusarnaartunik erinarsoqataasoqarnera tusaaneqarsinnaalluni.

Aappariit nipilersoqatigiinnersut TIU Pernille Kreutzmann aamma Ivik Larsen tusarnaartut erinarsukkaminnik tusarningaartunik tiguarpaat.

Rikka M. Egede nuannarineqarluartut appittakkani appisimaarpai, malunnartumillu tusarnaartut inersimasuunerusut erinarsoqatigiliullugit, naammassimmat ersaattaanneqarluartoq illorsuup iluani tusarsaavoq.

Don Maliko rappeqatigisartakkanilu Pilutaq Lennert tusarnaariat kissassimaartilertutut ilersippaat, rappigaat inuusuttuunerusunik erinarsoqataaffigineqarluarlutik.

Band Inuk Nuuk centerip iluani rockerluarlutik appisimaarput, ilisimaneqaatitik nuannarineqarluartut atorlugit tusarnaartut tiguarpaat.

Da Bartale Crew angutinik inuusuttunik sisamanik rappertulerlutik appipput, naggataaleramik nuannarineqarluartoq atortagaat appimmat, tusarnaarianik tusaaneqarsinnaavoq erinarsoqataaffigineqarluartoq.

Bandi nutaaq Gerth appimmat tusarnaarianik tigulluarneqartoq malunnarpoq, assullu nuannersumik appisimaarlutik.

Katillugit nipilersoqatigiit arfineq pingasut appisimaarput tamarmillu marloriaq pingasoriarluunniit appisimaarlutik, tusarnaarianullu tigulluarneqarlutik.

Ilaqutariinnut tusarnaartitsineq akunnerni pingasunik sivisissuseqarpoq.

Meeqqat Kommuneqarfik Sermersuumiit akeqanngitsunik Hinnarik  frisbeemik aammalu Hinnarik ballonninik nipitittakkanillu tunineqarput taavalu Kommuneqarfik Sermersuup ilisarnaataanik refleksinik tunineqarlutik.

Assi saqqaani atorneqartoq Karla Poulsen Andersenimik assilisaavoq

Assit sinneri Hinnarik facebook quppernerani tigusat.