Juulip qaammataani seqinnertoq asflaltip aalaterlaap putsutut sulisut pooqqasutut ippai. Ukiuunera Nuummi aqqusinernut aserorsaasimavoq piffissarlu aqqusinernik asfaltilersuiffiusinnaavoq sivikitsuaraavoq.
”Aput aammat asfaltilerineq aallartipparput nillertinnissaatalu tungaangut asfaltilerissalluta, taamaattumik aasakkut ulapittaqaagut. Aasaanerani sulinngiffeqarnissamut piffissaqanngilavut, kalaalimineerniarfillu aqqutigalugu tuttusisariaqarluta,” Kommuneqarfik Sermersuumi asfaltilerisoq Kristian ’Kari’ Mathæussen 57-inik ukiulik oqarpoq.
“Illoqarfiup qeqqa biilinik angallaffiusaqisoq asfaltilersorniarlugu ilaanni unnuakkut sulisariaqartarpugut,” nangippoq.
Ukioq kingulleq Kristian ’Kari’ Mathæussenip “Batmobili” – maskiina tiguaa, Bitumenimik ataanut tissaluusartoq asfaltimullu noqinnittoq.
“Maskiinat atorlugit sulineq nuannarineruara. Asfalti oqimaatsorujussuuvoq, taamaattumik suliaq ilungersunarpoq,” Kristian ’Kari’ Mathæussen ikaartarfimmi pisuinnaat aqqutaanni talittarfittaamiit Nuussuarmut attaviliisussamik asfaltimik nivannginnermini qungujulalluni oqarpoq.
Kristian ’Kari’ Mathæussen kommunimi 80-ikkunni aamma 90-ikkunni sulisuusimavoq, 2009-milu asfaltilerisutut suleqqilerluni. Ukiukkut asfaltinik ulapputeqannginnermi tummeqqanik aputaajaasarpoq, kommunip suliffeqarfiutaani kommunimilu illoqarfimmut attaviliisunut.
“Silaannarissumi sulillunga nuannaraara, qiialaaraannilu ulapilluni kiassarnissaq ulapputigisariaqarpoq,” naggasiivoq.