Annaassiniartartoq suleqatigalugu: Annaassiniartartunngornissara ilimaginngikkaluarpara

Bertha Munch, 28-inik ukiulik naluttarfimmi arnat atisaajartarfianni sikaavinnik saliilluni ulapileruttorpoq.

”Ullumikkut atisaajartarfimmiittut sikaaviit salittussaavakka, kattorna naammassissavakka.”

Bertha Munch ukioq kingulleq naluttarfiup sutorniartarfiani sulisuusimagaluarpoq.

”Ullut ilaanni aperineqariasaarpunga annaassiniartartunngorusunnersunga,erngerlungalu naaggaarpunga, tassami nalunneq nalugama.”

Bertha annaassiniartartutut sungiusarluni aallartinnginnermini, nalunnermut ilinniarsinnaanissaanut neqeroorfigitippoq, sungiusarnerillu tamarmik qaammammik ataatsimik sivisussuseqarput.

”Oqarfigineqarpunga misilitsittuusaasunga; Suna tamarmi ajunngitsumik ingerlavoq, apeqqutit apeqqutigineqartut akilluartarlugit, sungiusaasuma naggataatigut oqarfigivaanga misilitsinnermi angusisunga, erngerlungalu nuannaarnerup pianik qulliliutigalunga uinnut sianerpunga kalerrillugu annaassiniartartunngorsimallunga.”

Bertha suliffiminut tunniusimasuuvoq, ullormullu suliassat tunniunneqartut suliarineqarnissaat pingaartsitarisarlugu.

”Sulinngitsuunngisaanarpunga, takkuttuaannarlungalu, suliffiga nuannareqaara. Nuannequtigaa; suliassaqartuaannaratta, naak suliakkiissutinut ilaanngikkaluartut.”

Bertha qujanartumik suli nalaannerluinngilaq.

”Ullut tamaasa suliartoraangama, qamuuna imminut piumaffigisarpunga piareersimassallunga, nuanningitsunik nalaataqariataarnialeqigama. Taamaasillunga nalaataqassagaluaruma qannartara piareeqqaniassammat, naluttarfimmi inoqartuaannarmat.”

Naluttarfiup iluani eqquiluisaarneq nakkutilliinerlu kisiisa Berthap suliarineq ajorpai.

”Uannut pingaaruteqartut ilagaat, atuisut tikilluaqqusaasutut misigiuarnissaat, nuannertuaannarporli nalunngisartaarsinnaasaratta, illoqarfimmiikkaluaraangamaluunniit inuit nuannersumik kiinnertalernikuunerat nuannequtaasaqaaq.”

Annaassiniartartut qammammut ataasiaq sungiusaqatigiittarput, sungiusarnerlu naluttarfimmi kisimi ingerlanneqarneq ajorpoq.

”Sapaatip akunnera kingulleq Quassussuaq qaqivarput, 24-ianilu Ukkusissat qaqissallutigu, sungiusaqatigiittarnerput nuannertuaannarpoq, immitsinnut ataqatigiilluartaratta.”

Massakkut Bertha arnat atisaajartarfiani suliani nangikkiartoqqilerpai.

”Sikaaviit naammassinialaassagakkit; kattorna annaassiniartartoqatikkalu naapittussaagatta.”

Annaasiniartartut ulluinnarni nalukkianik nakkutilliineq ingerlattarpaat aammalu naluttarfiup iluani eqquluisaarneq suliarisartagaasa ilagisarlugu.

Naluttarfimmut tunngasunik annertunerusumik paasisaqarusukkuit nittartagaat uani takusinnaavat.