Ukiuni 40-ni qatserisartutut nalliuttorsiorneq

Ataasinngorneq 1.juli Nuummeersoq Knud Petersen ukiuni 40-ni upalungaarsimanermut suliaqarsimaneranut atatillugu nersornaammik tunineqarpoq.

Kommunep allaffiata eqqaani qatserisartut biilii uninngapput, Knud Petersen ilaquttaminik, ikinngutiminik qatserisartoqatiminik assuarsimasunik tikilluaqquneqarpoq pilluaqquneqaqattaarlunilu.

Borgmester Charlotte Ludvigsen aammalu tullersortaa Uju Petersen ullorsiortumut oqalugiaqattaartut ilagaat.

”Nuummi kikkut tamarmik nalugunanngilaatsit. Ukiorpassuarni suliffinnut tunniusimaangaarsimavutit, ilaquttatillu qimaqattaartarsimavatit suliffiit pillugu, ilaquttatit qujassutissaqarfigaakka tapersersortuartarsimammatit, Charlotte Ludvigsen oqarpoq.

Knud Petersen nuannaangaarluni killitseqalunilu nersornaat tiguaa.

”Ukiuni 40-ni sulininni ulloq unnuarlu nikittarnikka kisitsisinngussagaanni immaqa 4.000-5.000-eriaq kalerrisaarut aallartinnerani anisarnikuuvunga. Ukiuni taakkunani nuannersorpassuarnik nuanniitsunillu misigisaqartarsimavunga, qujanartumillu ukiuni taakkunani qatserisartunik annaasaqarnikuunngilagut, naak nalaattakkavut imaannaaneq ajoraluartut, Knud Petersen oqarpoq.

Suleqataasa ulloq immikkuullaritsinniarlugu pilersaarusiorsimapput. Ullaaralaakkut angerlarsimaffiata silataanut aatippoq qatserisartoqatiminik qatserisartut biiliisa kalerrisaarutaat ikillugit, taamaaseriarlutillu qatserisarfimmut ullaakkorsioqatigiikkiarlutik.

”Suleqatinnik aaneqarama tupaallappunga, tamanna attortissimanarpoq, qullipilaarlungalu, Knud Petersen naggasiivoq.

Kommunemi nalliuttorsiornermi tamulugassanik kaaginillu sassaalliisoqarpoq, arlariillu qatserisartumut nuannarineqarluartumut oqalugiarlutik.

Ulloq naggaserneqarpoq Knud ”angerlarsimaffiata aappaani” qatserisarfimmi, ilaquttani suleqatinilu grillereqatigalugit.