Paamiuni utoqqaat illuat nutaaq

Paamiuni utoqqaat illuat nutaaq atoqqaarfissiorneqalermat nuannattoqarpoq.

Tassani najugaqalertussat, sanasut, sanatitsisut inuusuttut Piorsaavimmit ikiuuttullu tamarmik utoqqaat illuata sananeqarnerani ikiuuttut ammaanersiornermut aggersarneqarput.

Utoqqaat illuat nutaaq katillugit 24-nik ineeraqarpoq, quleriillu tallimaallutik.

Utoqqaat illuanni utoqqaanersap Bolethe Samuelsenip kommunalbestyrelsimullu ilaasortap Harald Biancop allunaasaq qiormassuk innuttaasut pissangallutik nuannaarput.  Inuit assatit pattaappaat "hurraartorlutillu!".

Takuniaarusuttunullu utoqqaat illuata ningiua Jane A Hegelund tulluusimaaqaluni takornariartitsivoq.

Kaffillerneq poortukkallu

Ammaanersiorneq nuannannerlu utoqqaat illuani najugaqalertussanut tunngatinneqarpoq, taamaattumik innuttaasut silataani utaqqilluaannartariaqarput. Utoqqaat Illuanni ningiu Jane A Hegelund takkuttunut oqalugiarpoq.

Kommuneqarfik Sermersuumi borgmesteriusimasumit Asii Chemnitz Narupimit Buuti Pedersenip qalipagaa utoqqaat illuannut tunniunneqarpoq.

Jane A Hegelund oqalugiaammini sanasunut inuusuttunullu illuliornermi ikiuuttunut qujassuteqarpoq. Taassuma oqaluttuaraa najugaqalertussat sulisullu nutaamut nuunnissaminnut qilanaaqisut. ”Nuukkutta inuunitoqarput qimassavarput, ataatsimoorlutalu illu nutaaq sungiunniassavarput. Piffissat nutaajupput, maangalu nuunnissatsinnut qilanaaqaagut", Jane A Hegelund oqarpoq.

Utoqqaat illuat nutaaq peqqinnissaqarfillu imminnut ataannarput tassuunalu sulisut aqutsisullu qanimut suleqatigiinnissaat avitseqatigiissinnaanissaallu qulakkeerneqarluni.

Utoqqaat illuanni ningiu Jane A Hegelund oqaluttuarpoq najugaqartut avatangiisinut nutaanut nuunnissaminnut qilanaaqisut.

"Utoqqaat illuanni nutaami init anginerujussuupput, ineqartullu namminneq uffarfeqassallutik igaffeqassallutillu, taanna qilanaarivaat".

Utoqqarnut paarisariaqarnerusunut immikkoortortaqarpoq, taavalu puigortunngorsimasunut immikkoortortaqarluni.

"Immikkoortissinnaagatsigit iluarpoq. Siornatigut paatsiveerunnarsinnaasarpoq, utoqqaat illuanni nutaanngitsumi aalajangersimasunik immikkoortortaqanngimmat". 

Kisianni najugaqartut nuussinnaanissaannut piffissaq sivisulaassaaq. Oqarasuaatit internetsilu ikkussorneqaqqaassammata, igalaallu saagui kingusinnerulaartukkut ikkunneqassallutik.

"Utoqqaat namminiussuseqarnissaat pingaaruteqarpoq, naammassinngippallu nuuttoqarsinnaanngilaq, Jane A Hegelund oqarpoq.

Utoqqaat illuat suli atserneqanngilaq.