Meeqqat inuusuttullu Kalaallit Nunaanni kinguaassiutitigut kannguttaatsuliorfigineqartarnerat suli qaffasippallaarujussuaqaaq. Ukiorpassuarni taamatut inissisimasoqarsimavoq, naallu ajornartorsiutit pillugit aningaasaliissuterpassuaqartarsimagaluartoq, misiliummik ingerlatsisoqartarsimagaluartoq, suliniuteqartoqartarsimagaluartoq, tamanut oqallitsitsisoqartarsimagaluartoq assigisaanillu, Kalaallit Nunaanni tamarmi meeqqat inuusuttullu suli kinguaassiutitigut kannguttaatsuliorfigineqartartut amerlavallaarujussuaqaat.
Nunami borgmesterit tallimat isumaqarput, kinguaassiuutitigut kannguttaatsuliornerit, atornerluinerit, sakkortuumik sumiginnaasarnerit aammalu imminut toquttarnerit ima annertutigisut erngertumik iliuuseqarfigineqartariaqarlutik, tamannalu allatut isiginnilluni pisariaqartoq.
Ilisimaneqartutut taamatut pisoqanngilaq, borgmesterillu tallimat isumaqarput, immikkoorlutik pitsaasunik suliniuteqaraluarlutik aammalu susassaqarfimmut aningaasaliissuterpassuaqartaraluartoq – kommuninit immikkut ajornartorsiutinut sorsuuteqarnermi piffissaq iluatinnartoq atulussinnarneqarsimasoq.
Taamaattumik borgmesterit tallimat isumaqarput, taamatut ilioqqinnissaq periarfissaanngilluinnartoq. Isumaqarpugut, pisumi suliat annertuumik allannguilluni iliuuseqarfigineqarnissaannut piumassuseqarluinnarnissaq pisariaqartuusoq, borgmestereqatigiinnilu isumaqatigiissutigineqarpoq, ataatsimoorluni inuiaqatigiinni suliniuteqartoqarneratigut pisut taamaaginnarnerat aatsaat allannguiffigineqarsinnaasoq.
Taamaalillunilu nunami borgmesterinut tallimanut ersarilluinnarpoq, kommunit immikkoorlutik ajornartorsiutinik aaqqiissuteqarniarnerminni periarfissaqannginnerat.
Nunami borgmesterit tallimaasut tamaalillutik isumaqatigiissutigivaat, ajornartorsiutit nuna tamakkerlugu ajornartorsiutaanerat, taamaattumillu ataatsimut aaqqiissuteqartoqarnissaa pisariaqartoq – aaqqiissutit kommunit ingerlatsiviinik sulisuinillu, aamma perorsaasunik, inulerisunik, ilinniartitsisunik, siunnersortinik il. il. kiisalu minnerunngitsumik politiinik akuutitsineq pisariaqartut.
Nunami kommuninut tamanut borgmesterinut ersarilluinnarpoq, Kalaallit Nunaat – Danmark-imik, nunani tamalaani immikkut ilisimasalinnik imaluunniit suliniaqatigiiffinnik suleqateqarluni – piareersimasariaqartoq allaat suliniutinik annertuunik atuinissamut, meeqqanik inuusuttunillu kinguaassiutitigut kannguttaatsuliorfiginninnermik suliarpassuit iluarsiivigineqarnissaat anguniarlugu. Tassalu borgmesterit isumaqarput, inuuniarnikkut aammalu inatsisitigut politikkikkut suliniutit pisariaqartut tamarmik eqqarsaatigineqartariaqartut aammalu aaqqiissutaasinnaasut suulluunniit siumoortumik ilaatinngitsoorneqassanngitsut.
Aammattaaq borgmesterinut tallimanut ersarilluinnarpoq, ajornartorsiutit qaangerneqarsinnaanngimmata qanimut, tunniusimalluni aamma pimoorussilluni Naalakkersuisut ingerlatsiviillu susassaqartut suleqatigitinnagit.
Tamatumunnga peqatigitillugu borgmesterinit tamanit Naalakkersuisut siulittaasuannut Kim Kielsen-imut aammalu Naalakkersuisumut Martha Abelsen-imut, piaartumik qanoq ililluta inuiaqatigittut alianaqisumik napparsimasutut pissusilersornerup, kinguaariit tulleriiaat ingerlanerini meerarpassuit inuusuttorpassuillu inuunerinik aserorterisup naalliutsitsisullu, qanoq unitsinneqarsinnaanera pillugu ataatsimoorluta eqqartueqatigiinnissaq kaammattuutigineqarpoq.
Kommunit arlaannaasaluunniit akisussaaffimmik sumiginnaanissaq, ajornartorsiummik suusupaginninnissaq allanilluunniit tikkuartuiinnarnissaq kissaatigineqanngilaq. Tamatta qaninnerusumik suleqatigiittariaqarpugut suleqatigiittullu tamatta akuerisatsinnik erngertumillu aallartinneqartussamik ataatsimoorussamik pitsaaliuinermi periusissamik pilersaarusiortariaqarluta.
Nunami borgmesterit taamaalillutik piaartumik Naalakkersuisut Siulittaasuannut oqaatsit “ukiut tamaasa meeqqat ukiorissagaat”-nnik oqarneq kimeqartinneqassasoq kaammattuutigivaat.
Inussiarnersumik inuulluaqqusilluta
Asii Chemnitz Narup, Kommuneqarfik Sermersuumi borgmesteri
Palle Jeremiassen, Avannaata kommuniani borgmesteri
Ane Hansen, Kommune Qeqertalimmi borgmesteri
Malik Berthelsen, Qeqqata Kommuniani borgmesteri
Kista P. Isaksen, Kommune Kujallermi borgmesteri