Kommune poortuutissanik taamannaannaq sipaarpoq

Kommuneqarfik Sermersooq maanna atorluaanerunissamut peqataalerpoq

Eqqiaasartut siornatigut eqqiaajartoraangamik dunkersuarnik oqimaaqisunik nassataqartarnikuupput. Maannakkulli taamaakkunnaarnikuuvoq. Tassami Kommuneqarfik Sermersooq avatangiisinik mianerinninnerulernikuuvoq, kommunimilu sumi tamaani eqqiaasartunut sulineq ajornannginnerulernikuulluni.

”Suliniutit tamakkua kommunimut kisimik iluaqusiinngillat, avatangiisinullumi aamma iluaqutaapput, tamannalu pingaarnerpaavoq” Carsten Jensen, Kommuneqarfik Sermersuumi pisiniartarnermut immikkoortortami aqutsisuusoq oqarpoq.

”Eqqiaanermi qaqorsaatit annikitsut, kisialli aannertunerit atortalernikuuagut, taamaasillutalu siornatigornit poortuutissanik atuinikinnerulerluta", Carsten Jensen oqaluttuarpoq. Aamma tamassuma kingunerisaanik eqqiaasartut qaqorsaatinik annikinnerusumik atuisalernerat ajornannginnerulerpoq. ”Siornatigut dunkersuit oqimaatsut nassatarisariaqartarpaat, maannakkulli ajornannginnerulerpoq, dunkit mikinerulernikuummata, taamaattumillu qitikkut anniartarneq pinngitsoortinneqarsinnaanngorluni” Carsten Jensen  unnersiorpoq.

Pisiniartarnermut politikki aqqutigalugu kommunip kissaatigaa avatangiisit eqqarsaatigalugit atorluaanerunissaq, inuttut peqataalluarnikkut ileqqorissaarnermullu tunngatillugu illersorneqarsinnaasumik. Imaappoq, eqqiaanermut atortut avatangiisinut nungusaataanngitsuunissamik piumasaqaatinik naammassinnittut  nalunaaqutsikkat atorneqarnerunissaat toqqarneqartarput, soorlu Svanemærket-imik nalunaaqutsikkat.

”2015/2016-imi kommune poortuutissanik 23 tonsinik atuivoq, ukiullu tullissaani atuineq 13 tonsinut annikilleriarsimalluni”.

”Kinguaariit tulliit taakkuupput nunarsuarmi plastikkinik atuiffiunermik nalaataqartussat, taamaattumik maannakkut allanngueqataasariaqalerpugut, taamaasilluni ungasinnerusoq eqqarsaatiglaugu ilorraap tungaanut ingerlasoqalerniassammat" Carsten Jensen oqarpoq nangillunilu "avatangiiseq paarilluassavarput, taamaattumillu Kommuneqarfik Sermersooq atorluaanerunissamik illersuisunut ilannguppoq. Misissuinerit takutippaat ukiut 30-t qaangiuppata immani plastikkit aalisakkaniit amerlanerulersimassasut, tamannalu amiilaarnaqaaq!" Carsten Jensen oqarpoq.

Meeqqerivinni avatangiisit pitsaanerusut

Jesper Andersen Nuummi meeqqerivik Apisseq-mi ittuuvoq. Taannaavorlu poortuutissat allannguuteqarsimanerinik malussartut ilaat. ”Eqqiaanermut qaqorsaatit ullumikkut atukkavut ukiualuit matuma siornatigut atorneqartunut sanilliullugit pisaanipilussuupput” Jesper Andersen oqaluttuarpoq nangillunilu, peqqinnissamut tunngatillu aamma ilorraap tungaanut aallartoqarpoq, automatiskimik akoorisarneq atulersinneqarnikuummat. Taamaattumik sulisut qaqorsaatinik sakkortuunik toqqaannartumik attuisarunnaarnikuupput”. Ullumikkut automatiskimik akoortalermata qaqorsaatit sakkortuallaat atornissaat ulorianarunnaartoq qulakkeerneqarpoq.

Qaqorsaatit avatangiisinut nungusaataannginnerat isumaqarpoq, aamma sapigaqalernissamut aarlerinannginnerulermata. ”Qaqorsaatit tipigissaatitaqanngillat, taamaanneralu pissutigalugu kikkulluunniit kommunimi saaffiginnittartut iluaqutigaat. Meeqqerivinni taamatut pitsanngorsaatitaqarnera ilassilluarparput, uaguugattami meeqqanut akisussaasuusut” Jesper Andersen oqarpoq.