Tasiilaq uummammioraa

Atuakkiortup Niviaq Korneliussenip Tasiilaq uummateqarfigaa. Illoqarfimmut uummateqarfiginninnera Tasiilap inuusuttortaanut aamma immikkut sunniuteqarpoq.

Niviaq Korneliussen 2015-imi qulimiguulimmit niugami Tasiilaq tullaqqaarpaa. Pissangavoq, qaqqarsuit takusimanngisaanakkani qimerluulerpai. Inooriaatsip avatangiisillu sungiusimanngisaata sunneqqaarpaa, taamaattorli timikkut tarnikkullu eqqissinerujussuaq misigisimanngisaannakkani misigaa. Sapaatip-akunnerujussua maaniissaaq, inuusuttunullu oqaatsinik oqaaseqatigiinnillu pinnguarnernik oqaluttualiornernillu ilinniartitsissalluni.

Innuttaasut atuakkatut ammatiginertik sunnertiassutigigaluarlugu nukittoqaat. Qaqqarsuit inuillu peqqutaallutik illoqarfik uummammiorilerpaa.

Allannermik sammisaqartitsinerit misigissusilerisitsisinnaalerput.

”Inuit ajunngitsortaat ajortortalluunniit isiginiassanerlugit aalajangertoqarsinnaajuaannarpoq uangalu ajunngitsortaat isiginiassalugit aalajangerpunga. Inuit Tasiilami najugaqartut ammaqaat qanilaarlutillu, illoqarfimmullu tikikkaanni tikilluaqqusaasutut misiginarpoq" oqaluttuarpoq.

Angalareernermi kingorna inuusuttunut allannermik soqutigisalinnut allannermik sammisassaqartitsinernik assigiinngitsunik ingerlatsisarsimavoq. Allannermik sammisassaqartitsinermini peqataasut ilinniartut aalajangersimasut arfineq-pingasut immikkut eqqaamasaqarfigai. ”Inuusuttuni taakkunani arfineq-pingasuusuni marluinnaat atuakkamik atuarsimapput, ingerlatiinnarlu eqqarsalerpunga qanoq iliussaagut, atuakkamimmi atuarnikuunani qanoq oqaluttualiortoqarsinnaagami?”.

Ilinniartuutikkali tunniutiinnaratik, ilisimasassarpassuarnik tigooraapput.   Oqaluttualianimmi allannissamik ilikkarusunnertik siunniuffigisimagamikku aporfiginngilaat.  Kingorna oqaluttualiat arfineq-pingasut ukiup ingerlanerani saqqummersinneqarput.

”Inuusuttut qanimut ullut tamaasa suleqatigigaanni aqqusaarsimasaannik paasinnittoqalersarpoq. Sapiissusaat, inoorusussuseqarluarnerat neriuuteqarlutillu siunissamut takorluugaqarnerat paasillugu tupinnaqaaq. Isumaqarpunga inooriaatsip allatut inissilluni isiginera peqqinnartorujussuusoq, tassuuna aamma inuusuttunut tunngasunik suliaqarusussuseq takkuttarmat" Niviaq oqaluttuarpoq.

Pilersitsisinnaassuseq inuusuttunut aallartitsisarpoq.

”Allanneq inummut peqqissaataasinnaavoq. Angut inuusuttoq allannermi sammisaqartitsinermi peqataanermini ineriartorujussuartoq nalaassimavara” oqaluttuarpoq, nangillunilu, ”Ippassaammat unnukkut oqaluttualiani allassimavaa kamassimalersimanerminillu oqaluttuuppaanga. Meeraanermini atugarissaarsimanngilaq kamassanilu iluminiittoq malugilersimavaa. Kamassani aliasunninngormat aliasorujussualeraluarluni allannini ingerlatiinnarpaa tassuunalu misigissutsini ilisimaarilerlugit, imigassamut qimaanani pappiaqqamut tutsippai alloriarujussuarlunilu” oqaluttuarpoq.

Niviap inuusuttut atukkamik atuarsimanngisaannartut oqaluttualiortissinnaalersimagaluarlugit atuakkanik atuartarneq pingaartorujussuusoraa.

”Atuarnikkut silarsuarmut ilisimanngisamut appakaattoqartarpoq saniatigullu ilikkagassarpassuanittoqartarluni. Atuagaq sunaluunniit atuarukku atuarsimasannit ilikkagaqassaatit” nassuiaariarluni nangippoq ”Ingammik atuakkamik nunagisameersumit atuarneq tarrarsorfigiuminarnerusarpoq, taava tassuuna inuit nammineq atuakkiornissaamnik isumassarsitissinnaavatit taakkulu allanut aamma isumassarsitillugit”.

Nammineq Tasiilami inuusuttut qanoq inneri timimini malugereerpaa. Illoqarfinni annerni najugaqaraanni periarfissagissaarneruneq illoqarfinnilu mikinerni inuuneq allaanerujussuusinnaasoq ilisimallugu oqaluttuarpoq. Inuusuttunullu iluaqutaasussanik pilersitsinissamut periarfissiiniarluni aallartisaanerit  pingaaruteqartorujussuusorai. ”Misigissutsinik aniatitsiviusinnaanera alloriarnissamullu atorneqarsinnaanera uppernarsaateqartippara”.

Kulturikkut Nittarsaassisutut toqqagaaqqammersoq Niviaq Korneliussen Kommuneqarfik Sermersuup illoqarfiini sisamani aaqqissuussanik assigiinngitsunik ingerlanneqartussanik sulissuteqarpoq.