Innuttaasunut

Utoqqarnut ministeri Utoqqaat Illuannut pulaartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sisamanngornermi marsip ulluisa arfineq-aappaanni Thyra Frank Nuummi Ippiarsummut pulaarpoq. Tassani takuniaatinneqarlunilu najugaqartunik nuannisaqateqartinneqarpoq.

”Misilittakkatsinnik avitseqatigiinneq pingaaruteqartutut isumaqarfigaara aamma Kalaallit Nunaaliarnissara takorloortuaannarsimavara. Kalaallit Nunaata kusanassusersua tupinnaannarpoq,” oqaluttuarpoq imatullu nangeqqilluni:

”Inuit maaniittut qanilluinnartumik pissuseqartuupput aamma tikilluaqqusaasutut misigisimavunga, suut tamaasa alutoreqaakka,” taanna oqarpoq aammalu isikkivimmik taama nuannertigisumik najugaqartut isikkiveqarmata, tikkuaatigaluni oqarpoq.

”Najugaqartut utoqqarnut ministerimik pulaartoqarnissartik ulloq tamaat qilaanaaraat”, Grethe Veirum, Ippiarsummi aqutsisoq qungujulalluni oqaluttuarpoq. Inersuarmi ataatsimoortarfimmiipput tassanilu lagkagimik kaffimillu sassaallertoqarpoq. Erinarsoqatigiipput aamma najugaqartup kissaatigisaanik “Mester Jakob” erinarsorneqarpoq.

Thyra Frankip Utoqqaat Illuannut pulaarsinnaatitaanini aamma tassani najugaqartut qanoq inuunersut takussallugit nuannarivaa. Taanna pulaarneq pissarsiffiulluarsimasoq aamma sorpassuarnit isumassarsisinneqarsimalluni oqaluttuarpoq.

”Isumaga malillugu maani sulisut pikkorissorujussuupput aamma utoqqaat taama amerlatigisut paarissallugit tamanna toqqissisimanarpoq. Kalaallinit sulisunit ilikkagaqarujussuarsinnaalluta isumaqarpunga,” taanna oqarpoq.

Nammineq ukiorpassuarni Utoqqaat Illuaanni aqutsisuusimavoq aamma piffissat ilaanni suut tamarmik ajunngitsumik ingerlakkuminaattartut nalunngilaa:

”Maani inuit utoqqaat akornanni katersuutillaqqeqaat, Ippiarsummi najugaqartut ataqqineqartorujussuupput aamma tamanna pitsaasutut isigaara,” taanna oqaluttuarpoq.

Inuit ataasiakkaat inissaqartinneqarnerat nuannarisorujussuuaa:

”Namminneq igaffeerannguaqarput aamma taanna assut nuannaraara. Iserama tipi ilisarinngisara naavara. Sunaaffa najugaqartut ilaat puisip neqaanik suaasaliortoq tamannalu uannut nutaarluinnaavoq, kisianni sujumagunik susinnaatitaasarnerat nuannersumik tupaallaatigaara,” illaatigalugu oqaluttuarpoq.

Thyra Frank aamma Isumaginninnermut Naalakkersuisoq, Martha Abelsen, Ilulissani Utoqqaat Illuannut aamma pulaarsimapput.