Innuttaasunut

Sermiligaami meeqqat pisinnaatitaaffii pillugit malunnartitsinermi atuarfik nunaqarfimmiunit ornigarneqarluarpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sermiligaami atuarfik novembarip ulluisa 19-ianni 20-annilu ornigarneqarluarpoq, meeqqat pisinnaatitaaffii pillugit malunnartitsinermut nunaqarfimmiut tamakkerlugit qaaqquneqarmata.

Meeqqat klassinit tamaneersut isiginnaarianut pissangasunut kusanartunik isiginnaagassialiorsimapput pisuusaartitsillutillu takutitsillutik. Atuartut anginerit namminneq isummatik saqqummiuppaat kusanartunik allagartarsualiorlutik nittarsaassillutillu. Aammalu inersuaq ataatsimoortarfik ulikkaavikkaluartoq, isersimasut nipaarulluinnarsimapput. Tassami atuartut uummammiuminnik pingaaruteqarluinnartunik oqariartuuteqarmata. Taamatut unnersiorpoq Lulu Dyhr Helt Sermiligaami atuarfiup aqutsisua qungujulaqisoq tulluusimaaqisorlu.

– Takusinnaavara, kikkut tamarmik centimeterialunnik alliallassimasut, sapiillutik minnerunngitsumillu tusarneqarnissartik tusaaniarneqarnissartillu pillugu maaniikkamik.

Sermiligaap atuarfiani meeqqat pisinnaatitaaffii pillugit siunnerfilimmik sulisoqarpoq, sulinerlu tamanna soorunami nangeqqinneqassaaq, aaqqissuussinermi iluatsitsilluartoqareermat atuarfillu tapersersorneqarluni. Sermiligaaq 200-t sinnilaarlugit inoqarpoq, tamarmillu meeqqat pisinnaatitaaffii malunnartinniarneqarmat novembarip ulluisa 20-anni takkupput.

– Meeqqat pisinnaatitaaffiinik malunnartitsiniarnitsinni nunaqarfimmiunit tapersersorluarneqarnerput nuannaarutigeqaarput. Taamaattumik suli iliuuseqaqqinnissatsinnut kajumissuseqarnerulerpugut, atuarfiup aqutsisua Lulu Dyhr Helt nassuiaavoq.

Aamma atuarfimmi atuartut isigaannik qalipaanermi ataatsimoorneq sapiissuseqarnerlu malunnartinneqarpoq. Nunaqarfimmiut ukiui apeqqutaatinnagit nuannaarneq, suliamik ilisimasaqarneq inuttullu suleqatigiissinnaaneq pineqarmat soqutigineqarluarpoq. Taanna maannakkut atuarfimmi inersuarmi takusassatut nuannaarutissatullu assiliaatigineqarpoq.