Ataasinngornermi septembarip pingajuanni borgmester Asii Chemnitz Narup borgmesterimut tulliit marluk nutaat siullermeerluni ataatsimeeqatigai
Randi Vestergaard Evaldsen (D) tassaavoq borgmesterip tillia siulleq, taavalu Uju Petersen (IA) tassaalluni borgmesterip tulliata aappaa.
Taamatut nikittoqarpoq ilaasortat marluk Nivi Olsen (D) aamma Malene Lynge (IA) aggustip 28-ianni kommunalbestyrelsimit sulinngiffeqarallarniarlutik akuersissutigineqarmata. Kommunalbestyrelsimut ilaasortaanermi saniatigut Nivi Olsen aamma borgmesterip tulliatut siullertut atuuffeqarsimavoq, taannalu Randi Vestergaard Evaldsen-imit taarserneqarpoq. Malene Lynge borgmesterip tulliata aappaatut atuuffeqarsimasoq Uju Petersen-imit taarserneqarpoq.
Kommunalbestyrelsimi Nivi Olsen Michael Rosing-imit taarserneqarpoq (SA), taanna Demokraatit sinnerlugit kommunalbestyrelsimut qinigassanngortinnikuuvoq, maannali Suleqatigiissitsisuni ilaasortaalluni. Malene Lynge Charlotte Píke-mit (IA) taarserneqarpoq.