Innuttaasunut

Ataatsimiititaq inuusuttunut ikiortarialinnut suliniutinut tunngasunik paasisassarsiorpoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Inuusuttut ikiortariallit eqqarsaatigalugit qanoq ilillugit sulilersinneqarsinnaappat? Inuusuttut qanoq atornerluijunnaarsinneqarsinnaappat? Inuusuttunut ilinniagaqarsinnaanngikkaluartunut qanoq immikkut ittumik ilinniagassaliortoqarsinnaava.

Tassaapput apeqqutit Kommuneqarfik Sermersuumi Isumaginninnermut Suliffeqarnermullu Ataatsimiititap Københavnimut Aalborgimullu paasisassarsiorluni kingullermik angalanermini akissutissarsisai. Politikkerit ilaatigut Grennessmindemi suliffeqarfik innuttaasunik ikiortarialinnik suliffissaqartitsivik, katsorsaavik U-turn, TAMU Storkøbenhavn, inuusuttunut suliffeqanngitsunut sivikillisitamik ilinniakkamik ingerlatsisartoq pulaarpaat.

”Suliffeqarfitsialassuit pulaakkavut uannut annertuumik sunniuteqarput, taakkuummata inuusuttut ikiortariallit inuunerannik imaqarnerulersitsisartut imminullu tatigilernissaannik ikiuuttartut. Taakku sullinniakkatsinnut suliniarnitsinni ilanngunneqassapput”, Charlotte Ludvigsen Isumaginninnermut Suliffeqarnermullu Ataatsimiititami siulittaasoq oqarpoq.

Ataatsimiititap Danmarkimi paasisassarsiornermi pissarsiaat arlallit Kalaallit Nunaanni ungasinngitsukkut atuutilersinneqassapput. Tassami Kommuneqarfik Sermersuup Grennessminde suleqatigalugu, Tasiilami suliffeqarfimmik innuttaasunik ikiortarialinnik suliffissaqartitsiviumik aappaagu pilersitsigaluttualerpoq. Innuttaasunik ikiortarialinnik suliffissaqartitsivik tassaavoq inuusuttunik ikiortarialinnik suliffigineqarsinnaanngorlugu aaqqissuussatut ingerlasoq.

Paasisassarsiorluni angalanermi inuusuttut qitiutinneqarput, taamaattorli aamma Kommuneqarfik Sermersuup kommunitut ikinngutaa Aalborg, Kofoed Skole aamma Aalborgimi Kalaallit Illuat pulaarnissaannut piffissaqarfigineqarput.