Ullumi Tasiilap Alivarpiarni atuartut 28-t atualeqqaarput
Inuppassuit atuarfiup saavani katersuussimapput, nuannattoqarpoq paggattitsisoqartarlunilu.
Atuarfiup pisortaa Nukannguaq Kristiansen oqalugiarpoq ilaatigullu ima oqarpoq:
- Maanna ulloq ullorsiorfiuvoq pingaaruteqaqisoq, tassami meerannguit maani Tasiilami najugaqartut atualeqqaarfigivaat tamannalu pillugu tamassi pilluaritsi.
- Atualertunngulersusi Tasiilami Alivarpimmi kammagiinneq, nuannisarneq, suleqatigiissinnaanerlu ilinniartitsisut atuaqatillu peqatigalugit ilinniaqqaassavasi.
- Inuunermi alloriarnerit annertuut ilaat maanna aallartilerparsi tassalu ilinniarneq. Ullutsinni nunarsuarmi inuuniarnermi ilinniarsimasuunissaq pingaaruteqaqaaq tamannalu nammineq inuttut ineriartorluarnissamut kiisalu nunatta ineriartornissaanut pingaaruteqarluinnarpoq.
- Atuarfimmi ilinniartitsisut pikkorissut ilinniarluarnissarsi anguniarlugu piareeraarsarluarnikuupput taakkualu ilinniartikkumaarpaasi qanoq atuartuunerup ingerlasarneranik kiisalu ilikkagassassinnik nutaanik tunisarumaarlusi.
Kommuneqarfik Sermersooq sinnerlugu tamassi ilaquttasilu qamannga pisumik pilluaritsi, Nukannguaq Kristiansen oqarpoq.
Klassemi atualertoq niviarsiaraq qilaatersorluni takutitsivoq assullu nuannarineqarluni.