Niiverteqarfikoq kusanarlunilu uummaarissoq, inissiarsuarnik iluarsaaneq illoqarfiullu qeqqa kusanarluinnartoq. Tassaapput Paamiut pillugu pilersaarut tamakkiisoq naapertorlugu illoqarfimmi najorneqarsinnaasutut periarfissanik pingasunik sammisaqarfittut aalajangersaaffiuvoq. Siunissami illoqarfiup ineriartornissaanut nukittorsarnissaanullu pilersaarusiaq iluaqutaassaaq.
Kommunalbestyrelsip “Paamiut pillugu pilersaarut tamakkiisoq” akuersissutigaat. Paamiut pillugu pilersaarummi tamakkiisumi iliuusissat arlalinngorlugit agguataarneqarput. Iliuusissalli sammisamut ataasiinnarmut katersugaapput: Illoqarfimmi innuttaasunut illoqarfik ataqatigiissuulersussaq pilersinneqassasoq.
Paamiut pillugu pilersaarummi tamakkiisumi Paamiut ineriartorluarfiunissaanut tamakkiisumik aalajangersaaffiuvoq. Tamanna pissaaq illoqarfimmi pitsaassutsit pioreersut nukittorsarnerisigut taamaalilluni Paamiut siunissami pilerinartuunera, qorsooqqinnera ataavartuutinnissaalu ingerlatiinnarneqassasoq tamakkiisumik pilersaarummi aalajangerneqarpoq.
”Assorsuaq nuannaarutigaara maanna pilersaarusiaq inissinneqarlunilu akuerineqarmat. Tamakkiisumik pilersaarusiap anguniagaraa illoqarfimmi misigisinnaasat ataqatigiinnerulernissaat taamaalilluni Paamiut najugarissallugu nuannertuaannartuunissaa. Tamanna ima pissaaq, aqquserngit qaammaqqusersornerisa kusassarnerisigut, ilusilersukkanik kusassarlugu pinnguartarfinnillu nutaanik fitness atortuinik atortulersukkanik pilersitsinikkut. Pilersaarusiami siunnersuut alla tassaavoq Niiverteqarfitoqqami nuannersunik soorlu skateboardinik imaluunniit løbehjule-nik atuisinnaalernikkut pilersitsinermi periarfissiineq, tamassumalu allatut atorneqarsinnaanera soorlu assersuutigalugu issiaartarfissanik silamiluunniit tuniniaavinnik pilersitsinikkut,” Malene Lynge (IA) Kommuneqarfik Sermersuumi Sanarfinermut Avatangiisinullu Ataatsimiititami siulittaasoq oqarpoq.
Paamiut pillugu pilersaarummi tamakkiisoq Paamiuni Najukkami Ataatsimiititaliaq qanimut suleqatigalugu suliarineqarpoq, Najukkami Ataatsimiititaliamut aqutsinermut aamma sakkussatut atorneqassalluni. Tamakkiisumik pilersaarummi sammineqartut ilaatigut innuttaasut ataatsimiitinneqarnerannit allatullu innuttaasut peqataatinneqarnerannit kissaataasut tunngavigineqarput.