Meeqqat inuiaqatigiinni atugarliornerpaat puigungaanerat tusarlugu nuanninngisaannarpoq, Tasiilamilu Rikke Blegvadip misigisai tusarlugit kanngusuummernera isertuutissanngilara. Soorunami meeqqat atugarliortut inersimasullu taakkunannga ikiuiniarlutik kommunimut saaffiginnittut, tusaaniarneqarnerusariaqarput.
Matumanili aamma pitsaasortaqarpoq. Tassami Tasiilami inunnik isumaginninneq ukioq manna siusinnerusukkut sukumiisumik misissuiffigigatsigu, saanngiissutaasutut nassaarisagut taakkorpiaapput Rikke Blegvadimit tikkuarneqartut.
Pisariaqarsimavoq sullissinerup sukkut ajalusoortarsimanera paasiniassallugu, susassaqarfiullu aaqqissuuteqqinnissaa meeqqanik atugarliuuteqartunik nalunaaruteqartarnerit tusaaniarneqartarnissaat ilisimasaqartunillu naliliiffigineqartarnissaat qularnaarniarlugu.
Misissuinerup tamatuma kingunerisaanik, Kommuneqarfik Sermersuup poorskip kingorna suleriaatsini allanngortippaa, meeqqat ilaqutariillu pillugit nalunaarutit Nuummi suliarineqartussanngorlugit.
Ataatsimoorussamik naliliisarfimmik ulloq unnuarlu inuttaqartinneqartumik pilersitsisoqarpoq. Ataatsimoorussamik naliliisarfiup suliat piaartumik naliliiffigisassallugit pisussaaffigaa, akunnerit 24-it iluini aalajangerneqarsinnaanissammat piaartumik aaqqiisoqassanersoq, soorlu inissiigallarnikkut, imaluunniit suliaq ungasinnerusoq isigalugu suliassaanersoq.
Nuummi nalunaaruteqartarfimmi pingaartuusut Tasiilamit nalunaarutinik pisalersimapput suliallu tamarmik ilumoorullugit tiguneqartarput taamatullu suliarineqartarlutik.
Rikke Blegavd Tasiilami isumaginnittunik psykologinillu amingaateqarpoq. Uanga aamma taakku amingaatigaakka. Psykologitut atorfik sullissisutullu atorfiit arlallit illoqarfimmi inuttassarsiuuppagut.
Tasiilamili suli ajornartorsiutaavoq atorfiit qinnuteqarfigineqartannginnerat. Tasiilami Meeqqanut Ilaqutariinnullu Ingerlatsivimmi sullissisunik ataavartumik sulisoqanngilaq. Ukioq manna isumaginninnermut siunnersortit Nuummeersut paarlakaallugit Tasiilamukartittarsimavagut. Piffissami kingullermi isumaginninnermut siunnersortit marluk Tasiilamiitissimavagut uanilu sapaatip akunnerani isumaginninnermi siunnersortimik allamik aamma tikittoqassalluni. Qaammatini aggersuni Kommuneqarfik Sermersooq suli paarlatsinik nikerartunik – maani nunatsinneersunik Danmarkimeersunillu, sulisoqarluni ingerlasariaqarpoq. Neriuutigaarput tamanna iluarsiumaartoq, maannali Nuummiit sullissineq iliuuserisinnaasatta pitsaanersaraat. Sullissisisut ilinniarsimasut Nuummiipput, ilisimasaqarluartumik sulianik ingerlatsisinnaasut.
Meeqqanik isumaginninnermi siuariassagutta innuttaasut sulisullu tunniusimasut pingaaruteqarput. Taamaammat nalunaaruteqartarfipput tamanut innersuukkusuppara https://sermersooq.gl/kl/innuttaasunut/nalunaaruteqarnerit/
Tassani kikkulluunniit meeqqat arlaannik isumaaluuteqarunik ajornanngitsumik nalunaarsinnaapput. Ilanngullugu naqissuserusuppara, sulinitta qanoq pitsaanerusinnaaneranut isumassarsiaqarunik kikkulluunniit uannut saaffiginnissinnaammata.