Kina suaasaliullaqqinnerpaava, kalaallit nerisassaataat qanoq nutaaliarineqarsinnaappat, aamma kalaallit nerisarnermi ileqqui qanoq ilisimatusarfigineqarsinnaappat? Kalaallit nerisassaataat suliniummi nutaami Foodlabimi qitiupput.
Foodlab kalaallit nerisassaataannut tunngasunut tamangajannut katersuuffissatut eqqarsaataavoq. Piareersaanermiit ineriartortitsinermut, ilisimatusarnermut aamma tunisassiornermut. Kommuneqarfik Sermersuumi Ineriartortitsinermik Piujuartitsinermullu Allattoqarfik arlalinnik suleqateqarluni kalaallit nerisassaataannik qitiutitsillutik suliniuteqarput.
Suliniut Foodlab pingasunik immikkoortortaqarpoq:
- Nutaaliorneq aallarnisaanerlu
- Ilisimatusarneq
- Innuttaasunik peqataatitsineq
Foodlabip aqutsisui ukuninnga ilaasortaqarput: Royal Greenland, Business Greenland, Ilisimatusarfik, Brugseni, aamma Sermersuumi Innussutissarsiornermut Siunnersuisooqatigiit.
Nutaaliorneq aallarnisaanerlu
Foodlabimi pingaarnertut siunertaasut ilagaat igaffimmi nutaaliorfiusumik pilersitsinissaq, taanna innuttaasunit kikkunnilluunniit aamma nerisassanik tunisassiortunit atorneqarsinnaavoq. Igaffimmi kalaallit nerisassioriaasiannut atatillugu nutaanik isumassarsiortoqassaaq, kalaallillu nerisassioriaasiat pillugu isumassarsiat nutaat misilerarneqartassapput. Aamma pisiniarfigisartakkat, nioqqutissiortut pisiniarfiillu assigiinngitsut nioqqutissiortoqarsinnaanera aamma nioqqutissanik ineriartortitaasimasunik tuniniaaqqittoqarsinnaanera pillugit isumaqatigiissuteqarfigineqarsimapput.
Foodlabimi igaffiup nutaaliorneq, alliartortitsineq aamma aallarnisaaneq taamaalilluni ikiuutaaffigalugillu siuarsaavigisinnaavai. Foodlabimut tunngatillugu isumassarsiat amerlasuut ilagaat Nuummi umiarsuarsuit takornariartaatinut talittarfissami nerisassanik tuniniaaveqartoqarsinnaasoq. Tuniniaavimmi ileqqutoqqat malillugit aamma nutaaliorluni kalaallit nerisassiortaasii takornarianut saqqummiunneqartassapput.
Ilisimatusarneq
Ilisimatuut arlallit Foodlab pillugu suliniummut peqataatinneqarnissaat pilersaarutaavoq, ilaatigut inuussutissarsiornermi ilisimatuut kalaallit nerisassiortaasiannik ineriartortitamik piffissaq sivisunerusoq eqqarsaatigalugu nioqqutissiornissaq pillugu ilisimatusartussat. Tamatuma saniatigut nioqqutissat naleqartitanut naapertuunnerat ilisimatusarfigineqassaaq. Nioqqutissat naleqartitanut naapertuunnerat tassaasinnaavoq kapisillit akoorneqanngitsut ilumut akoorneqanngitsuunerannik qanoq ililluni qulakkeerisinnaaneq, qanorlu ililluni paasissutissat tamakkua pisisartunut ingerlatinneqarsinnaanerat ilanngullugu. Nunani avannarlerni ilisimatusartorpassuaqarpoq, nunani avannarlerni Issittumilu nerisassanik ilisimatusarnermik ingerlatserusuttunik, aningaasaateqarfinnilli tapiissutinik qinnuteqarnissamut Kalaallit Nunaanni suleqatissanik amingaateqartartunik. Foodlabip kalaallit peqataanissaat qulakkeersinnaavaa.
Innuttaasunik peqataatitsineq
Suliniummut atatillugu assigiinngitsutigut innuttaasunik peqataatitsisoqassaaq. Pingaarnerusumilli ataatsimooqatigiinneq ilisimasanillu ingerlatitseqqiineq qitiutinneqassaaq. Assersuutigalugu inuit “pitsaanerpaanik igasut”, igaaminnut najoqqutassanik tunniussaqarnissaminnut periarfissaqassapput, sammisarlu pillugu ilisimasarilersimasartik allanut soqutiginnittunuttaaq ingerlateqqissinnaallugu.
Nutaaliorfittut igaffissaq nassaarineqareersimavoq, aamma Ineriartortitsinermik piujuartitsinermillu Allatseqarfik allanik aningaasaliisussanik kajungilersitsinissaq siunertaralugu suliniut pillugu businesscasemik suliaqarput. Tamatuma saniatigut pisariaqartitsineq pillugu misissuisoqarpoq, illillu ikiuinerit iluaqutigisinnaavaat. Foodlabi pillugu pisariaqartitat pillugit misissuinermut atatillugu apersuinermik immersugassaq immersorusukkukku, tamanna pillugu suliniutip nittartagaani atuarsinnaavutit:
Ineriartortitsinermik Piujuartitsinermillu Allatseqarfiup naatsorsuutigaa Foodlab ukiaru aningaasaliissutit qulakkeerneqareerpata aallartinneqarumaartoq. Soqutigisaqaqatigiit suliniummut peqataasut suleqatigalugit aningaasaliiffigineqassaaq.