Qalipaatit, kipparissut allanngortitsinerlu: Kunngi allatut
Pingasunngorneq 9. maaji 2018 nal. 17 Nuummi Eqqumiitsulianik Saqqummersitsivimmi ’Kunngi – eqqumiitsulioriaaseq’ saqqummersinneqassaaq. Kalaallip ataqqisaasup suliarpassuaqartullu, eqqumiitsuliortup Frederik ’Kunngi’ Kristensenip (in. 1952) qalipagai, titartagai ilusilersugaalu ataatsimoortillugit saqqummersinneqassapput.
’Kunngi – eqqumiitsulioriaaseq’ saqqummersinneratigut Nuummi Eqqumiitsulianik Saqqummersitsivimmit Kunngip eqqumiitsuliai allatut takutinneqarusupput.
Qalipakkat qalipaatigissaaqisut saqqummersitsiviup iigai qaqortut uummarissisissavaallusooq, aammalu Kunngip grafikkimik suliarisartagai inimik immersuilluassallutik – taakkunanngalu arlallit siornatigut saqqummiunneqarsimanngillat. Taamaalilluni isertunut takutinneqarsinnaavoq, Kunngip eqqumiitsuliap isumassarsiaaneranit naammassinissaanut suleriaasia qanoq ittuunersoq. Aammattaaq qalipaaffissami ilusilersorsimasai, titartagai qalipagaalu imminnut attuumassuteqarsinnaasut takutinneqarsinnaalluni.
Pappialaminerni allakkallu puussaanni Kunngip silarsuaa alutornartoq saqqummertarpoq. Eqqumiitsuliaani abstraktiusuni kipparissup ilusaa pingaarnertut inissisimasarpoq. Kunngip kipparissunik ilusillit pinnguaralugillusooq qasusuilluni misileraatigiuarpai. Tassuunalu ininik, assigiinngitsullu qaavini, sammisaminillu katitereriaatsit nutaat uteriiffigalugit pilersitsiffigisarpai.
Kipparissumik ilusilik allanngortillugu misileraalluni Kunngi qalipaatinik toqqaanermini aaqqissuulluakkamik suliaqartarpoq: qalipaatit tunngaviusut atortarpai – sungaartoq, tungujortoq aappilasorlu. Sulinermini taakku arlaat marluk ersarinnerusunngortittarpai, pingajuallu allanik qalipaatinik akoorlugu malunnannginnerutittarlugu. Qalipaatit sakkortuut Kunngip suliamini atortagai, nammineq oqarneratut, assilissamik pikkunarnerulersitsisarput.
Nuummi Eqqumiitsulianik Saqqummersitsivimmi ’Kunngi – eqqumiitsulioriaaseq’ saqqummersinneqarnerata ammarneqarnerani, Frederik ’Kunngi’ Kristensen najuutissaaq, erinarsoqatigiillu Qissiat Kunngip taalliarisimasaanik erinnersimasaanillu marlunnik atuissallutik. Tamatuma saniatigut Kommuneqarfik Sermersuumi borgmesteri Asii Chemnitz Narup ammaalluni oqalugiassaaq. Soqutiginnittut tamarmik tikilluaqqusaapput!
Saqqummersitsineq sapaat 8. juuli 2018 ilanngullugu ingerlassaaq.