Innuttaasunut

Inuusuttut maligassiuisut pillugit saqqummersitsineq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuutoqaq/Nuummi Katersugaasivik: Inuusuttut inuusuttoqatiminnut nukissamik tunisisinnaasut pillugit saqqummersitsineq ”Piginnaasatta Nukkassartarpaatigut”-mik taaneqarpoq.

Michelle Thårup Andersen Nuummi Ilinniarnertuunngorniarfimmi ilinniartoq saqqummersitsisuuvoq. Inuusuttunik maligassiuisunik Facebookikkut ujaasinermigut nassaarpoq.

”Inuusuttut aqqaneq-marluk toqqakkakka inuunerup nuannersuuneranik takutitsisuummata maligassiuisutut toqqarpakka. Pilersitsisinnaanikkut, timersornikkut nunamulluunniit allamut ilinniariartornikkut piginnaasaminnik atorluaasuupput. Taamatuttaaq pujortarnermut ikiaroornartunullu naaggaartuupput, Michelle Thårup Andersen oqarpoq.

Michelle Thårup Andersen suliniaqatigiiffinni NAKUUSA-mi aamma CISV-mi suliniuteqaqataasarsimavoq. Suliniaqatigiiffiit taakku marluk taaneqareersut meeqqat inuusuttullu pisinnaatitaaffiinut taamatuttaaq meeqqat inuusuttullu imminut imminnullu tatiginerulernissannut tunngasunik ukkataqartuupput.

”Suleqataaninni maluginiarpara nuannersunik ukkassinerusoqarnissaa pisariaqartoq. Tassa imaappoq, inuusuttut assigiinngitsutigut maligassiuinermikkut inuusuttoqatiminnut nukkassartitsisinnaasut ukkatarineqarnerusariaqarput.”

Inuusuttut maligassiuisut Michelle Thårup Andersenimit apersorneqarlutillu filmiliarineqarput. Tamanna filiminik naatsunik ilaqartumik saqqummersitsinermik kinguneqarpoq. Inuusuttut maligassiuisut imminnut oqaluttuarisut filimiliani naatsuni isiginnaarneqarsinnaapput.

”Kikkulluunniit tamaviaarnikkut angusaqarluarsinnaasut ersersikkusullugu naatsunik filimiliorpunga. Nunarput immikkuullarissunik inuusuttoqartoq ersersikkusuppara. Taamaalilluta inuusuttunik maligassiuisoqalissaagut. Nunatsinni inuusuttuusugut siunissagissaartuusugut aamma meeqqat inuusuttullu amerlasuut atukkatigut ilungersortarsimagaluarlutik aamma meeqqat atuarfianni angusarissaarsimanngikkaluartut ilanngullugit ingerlaqqittartut takutikkusuppara, Michelle Thårup Andersen oqarpoq, naggasiivorlu:

”Nunatsinni inuusuttut pillugit sumiiffinni allani piffissap ingerlanerani saqqummersitsisarnissara angorusuppara. Nunarput pikkorissunik nuannaartunillu aamma inuusuttut allat tarrarsorfigisinnaasaannik isumassarsiffigisinnaasaannillu inuusuttoqarpoq.”

Allaq Productionimik piginnittoq Margrethe Thårup Andersen aamma Gerth Lyberth suleqatigalugit saqqummersitsineq aaqqissuunneqarpoq.

Gerth Lyberth inuusuttunik maligassiuisunik assiliisuuvoq, assilisaalu Nuutoqaq/Nuummi Katersugaasivimmi immikkut saqqummersinneqarput.

Saqqummersitsineq kikkunnut tamanut ammassaaq sapaat apriilip arfineq-pingajuaniit aasap tungaanut.

Aaqqissuussaq alla inuusuttunit maligassiuisunit taakkulu ilaqutaannit taamaallaat peqataaffigineqartussaq katersugaasivimmi tallimanngorneq apriilip arfernani ingerlanneqassaaq.