Pingaarutilinni tamani siuariartoqarnera

Killiffik pillugu nalunaarusiap aappaa

Ulluinnarnili sulianut tunngasunik aqutseriaatsip pitsanngorsaaffigineqarnissaa pisariaqartinneqarpoq, soorlu sulisunik atorluaanerulernissaq isumalluarnartinneqartoq.

Meeqqanut, Inuusuttunut Ilaqutariinnullu 2017-imiit 2020-mut Ineriartortitsinissamut pilersaarummi siunertat ilaattut Meeqqanut Ilaqutariinnullu Ingerlatsiviup suliani pillugit qaammatit pingasukkaartumik ataasiarluni Kommunalbestyrelsimut nalunaarutigisartussaavai. Qaammatit pingasukkaartumik nalunaarusiat taakku aappaat ullumikkut tamanut saqqummiunneqarpoq.

Ineriartortitsinermut pisortaq Helene Horsbrugh:Aaqqissuussaanerup allanngortinneqarneranut atatillugu Meeqqanut Ilaqutariinnullu Immikkoortortaqarfimmi aqutsisutut atorfeqarnermi suliassat nutarterpavut. Siunertaavoq ulluinnarni sulianut tunnganerusunik aqutsisarnissap qulakkeerneqarnissaa. Tassa sulisunik ikorfartuisarnissaq ilitsersuisarnissarlu aamma nakkutilliisarnissaq nakkutiginnittarnissarlu ukkatarineqarnerussapput. Aqutsisutut atorfiit inuttassarsiuuteqqinneqassapput sapinngisamillu piaarnerpaamik inuttalerneqassallutik.

Aaqqissuussaanermik allannguinermi aamma sullissisut ataasiakkaat suliaqartarnerat immikkut ilisimasaqarfinngortinneqarpoq. Tassa siunissami ajornannginnerulersinneqassaaq ulluinnarni piginnaasanik suliaasartunillu qaffassaasarnissaq. Taamaalilluni sulisut piffissaq sulinermut atortagaat sunniuteqarnerusumik atorneqarsinnaalissaaq, taama oqarpoq Helene Horsbrugh.

Kiffartuussisarneq qaammatit pingasut kingulliit ingerlaneranni misissorluarneqarsimavoq ingerlatsinermilu kukkunersiuisarneq annertusineqarsimalluni.

Paasissutissarpassuarnit pissarsiarineqarsimasunit kisitsisitigut paasissutissat katersorneqarsimapput, taakkununnga ilanngullugit ingerlatsivinni tamani sulisunit aqutsisunillu paasissutissat, kommunit ingerlatsiviisa immikkoortortaannit allanit paasissutissat, oqartussaasoqarfinnit ass. Namminersorlutik Oqartussanit politiinit kiisalu innuttaasunit allanit paasissutissat. Kiffartuussisarnerup misissorneqarnera naatsorsuutigisamit annertuneruvoq, tassa atortussat uppernarsaatissallu annikitsuaqqat sulinermi atorneqarmata.

Kiffartuussisarneq misissorluarneqareermat ilaatigut inassutigineqarpoq angusassat sunniutissallu qitiutillugit politikkikkut aqutsisarneq inerisarneqassasoq.

Ingerlatsivimmi oqartussaaffeqarfiup suliatigut aaqqissuussaanera nutaaq decembarip qaammataani akuerineqarpoq. Ingerlatsiviup meeqqat pisariaqartitaannik sapinngisamik pitsaanerpaamik isumaginnittarnissaa anguniarlugu aaqqissuussaaneq nutaaq aqqutigalugu meeqqanut sullissinerit piffissaalluartumik eqqortumillu ingerlalernissaat qulakkeerneqassaaq. Tamanna anguneqassaaq oqartussaaffeqarfimmik maannamut naleqqiullugu suliassatigut ilisimasaqarfiunerusumik allanillu ilaartugaanngitsumik atuutsitsilernikkut. Aamma kommunini sumiiffiit assigiinngitsut suleqatigiinnerulernissaat atuutsinneqalissaaq, soorlu sullissisut ataasiakkaat ulluinnarni maannamut sanilliullugu suliatigut aqunneqarnerulissasut.

Immikkoortortaqarfiit marluk siunissami atuutsinneqalissapput, tassaasut Innersuussisoqatigiit aamma Oqartussaaffeqarfiup Immikkoortortaa, immikkoortortaqarfiit taakku marluusut kommunimut tamarmut atuutissapput.

Malinnaatitat peqqinnissaqarfimmit, isumaginninnermut aqutsisoqarfimmit, meeqqat illersuisoqarfiannit, politiinit kiisalu Ilisimatusarfimmit inuttaqartussat pilersinneqarsimapput.

Killiffik pillugu nalunaarusiap aappaa uani atuaruk