Nipilersoqatigiit 12-13-t akornanni ukiullit Nuuk centerimi NUIF-milu nipilersorput.

- Nuummut tikeraarnerput nuanneqaaq, meeqqat oqaluttuarput. Nipilersornitta saniatigut aamma naluttarfimmiippugut. Nuannisaqaagut.

Mikkel Paalu Bianco (tumerparpaaq), James Singertat (tumerparpaaq), Poul Erik Kristiansen (bas), Tom Imaka (guitar) kiisalu Ajaattoq Bianco (guitar/erinarsorneq) Tasiilami nipilersornermi ilinniarfimmi sungiusartarput.

- Nanook-kut Tasiilamiimmata nipilersoqatigivagut, aamma prinsesse Benedikte tunumut tikeraarmat appisimaarfigaarput. Meeqqat ulluanni aaqqissuussinernilu allani peqataasarnikuuvugut.

Kommuneqarfik Sermersuup Tasiilami nipilersornermik immikkoortortaqarfia 70-nik ilaasortaqarpoq ilinniartitsisullu marluupput.

Ilinniartitsisuat Konrad Larsen: - Meeqqat ineriartornerat takusinnaavara. Scenemeeqqaalermata annilaanganikuupput pissangallutillu. Maannakkulli sungiussisimalerput. Qeratavallaarunnaarnikuupput.

Nuummiinnerminni Nick Ørbæk-ip taalliorneq pillugu pikkorissaavoq kiisalu aamma erinarsornermut ilinniartitsillutik.

Meeqqat angalanerat tapiissuteqarfik Sermermiit aningaasaliiffigineqarpoq.