Akit, ammasarfiit, malittarisassallu il.il. uani saqqummiunneqartut ullumikkut atuuttuusariaqanngillat.
Quarsaarlunga uummatikkullu aliasullunga Arsummi ukiorpassuarni Nunaqarfimmi Aqutsisunut ilaasortaasimasup Ejnar Jakobsenip septembarip 13-ianni alianaqisumik ajunaarneranik kalerrinneqarpunga. 51-iinnarnik ukioqarluni peeruppoq.
Ejnarip sulineratigut Arsuk Kommunilu tamarmi sulilluartorujussuarmik annaasaqarput, inuunermi annertunersaani nunaqarfimmi peqatigiiffilerinermik inuussutissarsiuteqarnermillu ersarissumik sunniuteqarsimammat. Piginnaasai soqutigisaalu siamasissorujussuusimapput. Tatigineqarluartuusimavoq nunaqarfimmilu innuttaasunit nuannarineqarluarsimalluni, ukiorpassuarnilu tatigineqarluni arlalinnik qinigaaffeqarsimalluni.
Aalisartuusimavoq pikkorissoq. Angut, inuussutissarsiutiminik nuannarinnilluartoq peqatigitillugulu aalisartut atugarisaasa pitsanngorsarneqarnissaannik qasusuilluni suliniuteqarsimasoq. Ukiorpassuarni AAPP-mi suleqataasimavoq (Arsummi Aalisartut Piniartullu Peqatigiiffianni), aammalu piffissani marlunni KNAPK’p siulersuisuunerini ilaasortaasimavoq; 1997-imiit 1999-imut taavalu 2009-miit 2013-imut.
Ejnarip aalisarnermik ineriartortitsinerup Arsummullu tulaassuinissamut periarfissanik ujartuinermini qasusuilluni sulineratigut ilaatigut takuneqarsinnaavoq, 2012-imi allanik tallimanik suleqateqarluni Arsuk Food pilersitseqataaffigimmagu, ullumikkumut nammineerluni siulersuisuni siulittaasuuffigisimasani.
Ejnar Jakobsen aamma Arsummi takornarialerinermut tunngasunik siullersaalluni aallartitsisuusimavoq. Tammajuitsussarsiorluni piniarnermut akuersissummik allagartaqarpoq, aammalu takornarianik Ivittuut eqqaannut umimmanniartitsisarsimalluni, kiisalu Arsuup eqqaani kangerlunni takornariartaatinut ilaasunik angallassisarsimalluni. Inussiarnersuusimanerata quiasaarumatuujusimaneratalu kingunerisaanik takornariarpassuit ukiut ingerlanerini Ejnarip ingerlassilluartarneratigut puigugassarinngisaminnik eqqaamasassinneqartarput.
Nunaqarfiup ajunngitsumik ingerlanissaanut suliniuteqarluarnermini aamma Pilersuisumi atuisunut siulersuisunut ilaasortaasimavoq, piffissallu ilaani siulittaasuusimalluni.
Ejnar Jakobsen Arsummi Nunaqarfimmi Aqutsisuni qinigaaffiit sisamat ilaasortaasimavoq, ukioq manna qinersinermi ilaasortaajunnaarnissami tungaanut.
2013-imi Kommuneqarfik Sermersuumi kommunalbestyrelsimut sinniisussatut qinerneqarsimavoq. Tassani qanimut qaammatini arfineq-marlunni apriilimiit novembari 2016-ip tungaanut nuannersumik suleqatigaarput, piffissami tamatumani Charlotte Pike erninerminut atatillugu sulinngiffeqarmat sinniisuuffigigamiuk.
Suleqatigiissimanitsinni tassani tamatta pisuussutit uumassusillit pillugit, silaannaap pissusiinut tunngasunik, pinngortitap nukissuinut qanoq ileriataarfiusinnaasunut ilisimasaqarluarneranik uppernarsivarput, aammalu Arsuup kangerluanik tamaanilu pinngortitamik ilisimaarinnilluarneranik uppernarsisinneqarluta.
Ejnar imminut nittarsaanniarneq ajorpoq. Inuk pikkuttoq aalisartuunerminillu tulluusimaarutiginnittoq. Nunaqarfimmi Aqutsisunut ilaasortatut kommunalbestyrelsimullu ilaasortatut Ejnar nuannarisimaqaara. Ilisimasaqartoq suleqataajumasorlu – taavalu aamma sapiissuseqartoq suliassanillu aallartitsiumatooq. Eqiasuitsuunera Arsummut inuussutissarsiutaanullu, aalisarnermut isumalerujussuusimavoq. Qungujunnartulerituujunera, inuttut nukissaqassuseqarnera tamatigullu nuannersumik pissuseqartuusimanera nuannaartitsinermik kinguneqartarput – nuannersumik perujuttarnikuuaatigut.
Ejnarip nuannequtigilluinnagaasa ilagisimavaat, nuliani Hanne peqatigalugu qinigassanngortittarnerpassuarnut sassartarsimaneri; nunaqarfitsik pillugu sanileriillutik kommunitsinnut nunatsinnullu tunngasunik suliniuteqartuarsimapput, Inuit Ataqatigiit sinnerlugit aalajaallutik qinigassanngortittuarsimanermikkut. Amerlaqaagut Ejnarimik maqaasinnittussat.
Ejnar Jakobsenip qimatarai nuliani Hanne, qitornani inersimasut sisamat ernuttanilu marluk. Piffissami artornartorsiorfiusumi uiusoq, ataataq ittuusorlu inuusukkaluaqaluni tupannaqisumik qimagummat qamuuna misiginneqatigeqaakka.
Ejnarip eqqaaneqarnera ataqqinartuuli.
Asii Chemnitz Narup
Kommuneqarfik Sermersuumi borgmesteri