Sermersooq Business Council (SBC) siullermeerluni Nuummi inuussutissarsiorneq sulisoqarnerlugu pillugit misissueqqissaarnermik ingerlatsisimavoq.
Aappaagumut suut naatsorsuutigineqarpat? Pisortaasunit suut qitiutinneqarpat? Suullu ilissi suliffeqarfissinni aningaasaqarnikkut ineriartornissamut akornutaappat?
Tamakkuupput misissueqqissaarnerni marluusuni, siulleq Nioqqutissat Akiisa Ineriartorneranik Misissueqqissaarneq aappaalu Piginnaasanik Misissueqqissaarneq, Sermersooq Business Councilimit ingerlanneqarsimasuni apeqqutit akissutisiniarneqartut.
Nuummi suliffeqarfinnit 191-init, tassa illoqarfimmi suliffeqarfiit 16,3 procentiinit, apeqquseqaasiamut akissutigineqartut aallaavigalugit misissueqqissaarneq ingerlanneqarsimavoq. Apeqquseqaasiaq suliffeqarfinni pisortaasut apersorneqarnerannik malitseqartinneqarsimavoq.
Misissueqqissaarnerit inerneri SBC-mit Kommuneqarfik Sermersuumut marlunngormat tunniunneqarput, kommunillu oqartussaasutut misissueqqissaarnerup inerneri aallaavigalugit, ulluinnarni kommunimi aningaasaqarnermi ineriartortitsiniarluni suliniarnermini atorsinnaalerpai.
Inuutissarsiornikkut siunnersuisoqatigiit suliniuteqarsimanerat Kommuneqarfik Sermersuumi borgmesterip Asii Chemnitz Narupip nuannaarutigaa.
”Eqqoriaanerit kisiisa aallaavigalugit nunami maani aalajangiisarnerit amerlavallaarput. Taamaammat ilisimasavinnik katersuiniarneq qujaruteqaara,” Asii Chemnitz Narup oqarpoq.
Aningaasaqarnerup ineriartorneranut akornutaasinnaasut assigiinngitsut isikkaneq marluk, misissueqqissaarnermi suliffeqarfinnit toqqarneqarsinnaasimapput. Ataatsimut isigalugu peqqutaasorineqarsinnaasut naligiipajaarput. Toqqarneqarnerpaasimasulli marluk tassaapput, siunissaq ungasinnerusoq isigalugu pilersaarusiorneq pisortanilu sullissinerup kingaappallaarnera. Suliffieqarfiit arlaqartut sulisussaaleqinerup aningaasaqarnikkut ineriartornissamut akornutaasinnaanera aamma toqqarsimavaat.
”Eqqortumik pingaarnersiuisimanerput misissueqqissaarnerup takutimmagu nuannerpoq. Tassami siunissaq ungasinnerusoq isigalugu pilersaarusiortarnissaq sukkanerusumillu sullissilersinnaanissarput anguniarsimavarput, malunnaatilimmilllu pitsanngoriartoqarsimanera takusinnaalereersimavarput. Anguniagaraarpummi ajornannginnerusumik suliffeqarfinnik ingerlatsiviusutut suliffissanillu pilersitsiorfiusinnaasutut kommunitut ingerlanissarput,” Asii Chemnitz Narup oqarpoq.
Ullumikkut Kalaallit Nunaanni kisiartaalluni Kommuneqarfik Sermersooq allaaserilluakkamik ukiunut isikkaneq marlunnut sanarfinermut pilersaarusiaqarpoq. Ilanngullugu kommunimi Nunaminertanut Illuliornermullu Oqartussat nutaanik atorfinitsiortorsimapput pikkorissaasarsimallunilu.
Nuummi ukiumut ataasiarluni Nioqqutissat Akiisa Ineriartorneranik Misissueqqissaarneq aamma Piginnaasanik Misissueqqissaarneq ingerlanneqartalissasut, soorlu aamma siunertarineqartoq misissueqqissaarnerit Kommuneqarfik Sermersuup sinnerani ingerlanneqartalernissaat.