Inuussutissarsiornermik suliallit, Fonden for Enterprenørskab kommunilu suleqatigalugit sisamanngornermi 2. november, nutaaliornermik unammisitsimmata Atuarfik Hans Lyngemi (AHL) 8.a-mit iligiit ajungaapput. Projekt Edison unammisitsinerit ukioqatigiiaanut eqimattanut agguataarneqarsimasut ilagaat.
Ukioq manna Projekt Edison-imi sammisarineqarpoq Imeq ajunngitsutigut ajortutigullu, iligiiaallu peqataasut tamarmik immikkut isumassarsiorsimapput, qanoq isilluta imermik isumalluutigut qanoq pitsaanerpaamik atorluarsinaanerigut. Atuartut ukiup atuarfiusup aallartinneraniilli, tamanna klasselærerertik ilagalugu sammisimavaat imermullu tunngasunik ilikkagaqangaatsiarsimallutik. Unamissitsinermut AHL iligiinnik marlunnik peqataatitsiniarluni nalunaarsimavoq, taakkunanngalu Team Afri(qua), Danish Entrepreneurship Award-imut Fredericiami novembarip 16-iani pisussamut peqataasussanngorput.
Team Afri(qua) ajungaasimanerminni assorsuaq nuannaartut oqaluuppagut. Naak suliartik upperisimagaluarlugu, ajungaasinnaanissartik uppererpiarsimanngilaat unammeqataasut piukkunnaatillit arlaqarmata. Atuartut oqarput, ”Qanoq ililluta marraq iminngortissinnaanerlugu ilikkarparput, maskiinalu sanaarput misilikkatsigu pissusissamisut ingerlavoq”, ilanngullugu nuannersoq isumassarsiaq Afrikami imissaaleqisunut iluaqutinngorsinnaammat. Danmarkimi ajungaanniuutivittoqarnissaanut peqataanissaminnut qilanaarput.
Iligiit unammisitsinermi ajungaasimanerannik ilinniartitsisuat Elin Sørensen assut tanngassimaarnerarpoq.”Ukioq atuarfiusoq aallartimmalli suliaq ingerlatilerpaat, ilaatigut sunngiffimmi piffissaq atortariaqartarsimallugu, taamaammat unammisitsinermi ajungaanerat takullugu Danmarkimukartussanngornerallu assut nuannerpoq.”, ilinniartitsisuat tanngassimaaqisoq oqarpoq, ilannguppaalu atuartut nutaaliorsinnaassuseqarlutik sulinerat takullugu assut nuannersimasoq.
Qanoq ililluni marrarmit imeq tigoorarneqarsinnaanersoq Team Afri(qua)-p suliniutiminni sammisarisimavaat. Maskiinamik marraap imertaanik piiaasinnaasumik kingornalu erngup salinneqarneratigut, isumaqarput imissaaleqiffiusut ikiorsinnaassallugit. Danmarkimi ajungaanniuutivinnermi Fredericiami ingerlanneqartussamut angalanissaat Air Greenlandimit tapiiffigineqassaaq, tassani isumassarsiartik saqqummiutissavaat peqataasut sinneri unammeqatigalugit. Team Afri(qua) Kommuneqarfik Sermersuumiit pilluaqquagut ajungaanniuutivininnermilu angusarissaarnissaannik kissaallugit!