tilbage

Suliffeqarnermut Isumaginninnermullu Ataatsimiititaq
190917 Ileqquusumik atatsminiinneq


17. septembarip 2019

kommunalbestyrelsip ataatsimiittarfia kl. 14:00

Oqaluuserisassat akuerineqarput ataatsimik ilassutilerlugit: 04A ilanngunneqarpoq, tassani qulequtarineqarluni siulittaasup tullianik qinersineq.

Siulittaasumit nalunaarutit

02A. Siulittaasumit nalunaarutit.

  •  Utoqqaat Siunnersuisoqatigiivi ulloq 19. september 2019 innuttaasunut utoqqalinersialinnut ataatsimiisitsissapput piffissami nal. 14:00-16:00, tassanilu qinnutigineqarsimavoq ataatsimiititaliaq ilaatitaqassavoq. Ataatsimiititaliami siulittaasup kommuunip utoqqarnut politikkia akuerisaq saniatigullu Utoqqarnut Siunnersuisoqatigiit pilersinneqarneranut siunertaq saqqummiutissavai. 

02B. Ingerlatsivimmit nalunaarutit

  • Utoqqaat Siunenrsuisoqatigiivi ullumi, 17. september 2019, ataatsimiititami siulittaasoq naapippat. Ataatsimiinnermilu utoqqalinersialinnut aningaasat nammineq atorsinnaasaat pillugit apeqquteqartoqarpoq. Ingerlatsiviup ataatsimiiititaliap ataatsiminnissaata tullianut apeqquteqaat pillugu ilisimatitsiumaarput. 
  • Aqutsisoqatigiit ataatsimiinnerat: Nunani Avannarlerni Piginnaanngorsaqqiineq pillugu attaveqarfiit

Ulloq 12. aamma 13. september 2019 aqutsisoqatigiit Nuummi ataatsimiipput. Torshavn Kommuni, Aalborg Kommuni, Kommuneqarfik Sermersooq aamma Arctic Consensus ataatsimiinnermi peqataapput.

Aqutsisoqatigiit suleqatigiinnerat ukiut pingasunik sivisussuseqassasoq naatsorsuutaavoq, pilersaarusiornermilu pisortaq tassaavoq Arctic Consensus (Aalborg Kommuni).

Aqutsisoqatigiit utoqqaat akornanni piginnaanngorsaqqiineq salliullugu suleqatigiinneq ingerlassimavaat.

Aqutsisoqatigiit ulluni makkunani utoqqarni sulisunik paarlaasseqatigiinnissaq anguniarlugu pilersaarusiorneq ingerlappaat.

  • Kommuneqarfik Sermersuup Aalborg Kommuneatalu akornanni suliffissaqartitsinermut tunngasunik suleqatigiinnerat

Aalborg pillugu ulloqartitsinermi aggustimi pisumi Aalborg Kommune aamma Kommuneqarfik Sermersooq akunnerminni eqqartuipput. Eqqartorpaat qanoq ilillutik orniginarsarsinnaanerlugu kalaallit sulisinnaasut Aalborg Kommune-miittut Kommuneqarfik Sermersuumut nuunnissaat. Eqqartuinermikkut suleqatigiinnissamut ilusiliipput, tassa Aalborg Kommune innuttaasunut kalaallinut 50-it missaaniittunut sanaartornerup iluani pikkorissarnissamik neqerooruteqassasoq. Aamma Kommuneqarfik Sermersooq maani najugalinnut taamaaliussalluni.

Aalajaatsumik suliffissaqartitsinissaq qulakkeerniarlugu Kommuneqarfik Sermersooq sulisitsisunik suleqatiginnissaaq, assersuutigalugu Munck Gruppen, Nuummi mittarfiliornermik akisussaasuusoq.

  • Innuttaasunut innarluutilinnut tunngatillugu immikkoortumut pilersaarusiorneq

Immikkoortumut pilersaarut ingerlatsivinnut attuumassuteqartunut tamanut tusarniaassutigalugu nassiunneqarpoq.

Tusarniaanermi akissutit tiguneqareerpata, innuttaasut innarluutillit pillugit immikkoortumut pilesaarut allaqqissaarneqassaaq assiliartalersorlugulu piareersarneqareerpat Suliffeqarnermut Isumaginninnermullu Ataatsimiititamut akuerineqartussanngorlugu ingerlateqqinneqassaaq.

  • Inunnut innarluutilinnut inatsit nutaaq

Inuit innarluutillit tapersersorneqarnissat pillugu nutaamik inatsiseqalerneranut atatillugu, suleriaatsit suliassallu allattorsimaffiisa naleqqussarneqarnerat ingerlanneqarpoq. Tassunga atatillugu Suliffeqarnermut Isumaginninnermullu Ingerlatsiviup Inatsisartut inatsisaat nutaaq pillugu sulisunut sukumiisumik nassuiaateqarfigineqarnissaa piareersarpaa, taamaasillutik inatsit januaarip 1-ani 2020 atuutilerpat sulisut allannguutinut piareersimaniassammata.

Isumaginninnermik Aqutsisoqarfik novembarip qaammataani inunnut innarluutilinnut inatsit nutaaq pillugu isumasioqatigiissitsinissamut aggersaassaaq.

  • Innarluutilinnut sapaatip akunnera – Nuummi sapaatip akunnerani 41-mi

Programmi ilanngullugu kakkiunneqarpoq taannalu ataatsimiititani allatsinut nassiunneqassaaq aamma ugeaviisimut sapaatip akunnerani 40-mi ilanngunneqassaaq.

OCN-imik Katersortarfimmi tunniussineq:  ataatsimiititami siuliuttaasup Inge Olsvig Brandtip uppernarsaatinik OCN-inik innuttaasunut agguaassissaaq.

  • Ornittagaq Kammagiit

Kammagiit Suliffeqarnermut Isumaginninnermullu Ingerlatsivimmut januaarip aallaqqaataani 2016-imi nuunneqarnerata kingornali immikkoortoqarfik suliat allaaserineqartarnerinik angummakkunnaarsimavoq. Immikkoortoqarfik ineriartortinneqarsimavoq, sammisassanullu tunngasut allaanerulersinneqarsimapput, tassani innuttaasut inerikkiartortinneqarnissaat qitiutinneqarsimalluni. Ineriartortitsineq ingerlanneqaraluartoq, angajoqqaat aammalu innuttaasut suli isumaqartuarput Kammagiit paarsinermik isumagisaqartussaasoq ornittagaananilu innuttasut piumallerlutillu ornissinnaasaat.

Taamaattumik aqutsisoqatigiinni eqqartorparput sulisut isumassarsisinnaanersut ornittakkap allatut taaguuteqalersinnissaa pillugu, piffissamik nutaamik, inerikkiartornermik siuariartornermillu ersersitsisumik.

Sulisoqatigiit innuttaasut peqatigalugit taassuma aaqqiissutissaanik nassaarniarlutik aallartereerput. Taaguummik taajuminartumik nassaartoqassagaluarpat, tamanna immikkoortoqarfiup ataasinngornermi 7. oktobari inunnut innarluutilinnut sapaatip akunnerata ammarneqarneranut atatillugu tamanut saqqummiunneqassaaq.

Ataatsimiititaliap suleriusissaani §2 Imm. 3 tunngavigalugu siulittaasup tullissaanik qinersisoqassasoq ataatsimiititaliap aalajangerpaa.

Inuit Ataqatigiit innersuuppaat Lone Rosengreen Pedersen (IA), Siumut innersuuppaat Rolf Píke (S)

Amerlanerussuteqartut Lone Rosengreen Pedersen (IA) siulittaasup tullissaatut qinerpaat.

Imaqarniliaq akuerineqarpoq nal. 15:21

Quppernerup imarisaa qanganitsersimava?

Quppernermut naqqiutissaqarpit?