Kommuneqarfik Sermersuumi nunarsuarmi anguniakkanut periusissiaq matumuuna saqqummiunneqarpoq – periusissiaq annertooq kommunimi suliassani pingaarnerni piujuartitsilluni ineriartornissamut tunngaviusussaq. Periusissiaq kommunimi immikkoortut pingaarnerit assigiinngitsut akimorlugit atuuppoq, ingerlatsiviillu tamarmik aamma sulisoqarfitta amerlanersaat ilanngunneqarlutik, taamaalilluta periusissiaq 2030 nunarsuarmi anguniakkanut tamanut piffissamut sinaakkutaasoq nallertinnagu piviusunngortinniarlugu kommunimi kivitseqatigiissaagut.

Piujuartitsilluni ineriartortitsineq nunat tamat akornanni piffissami sivisuumi isiginiarneqarsimavoq. Tamanna ima paasineqassaaq piujuartitsineq assigiinngitsunik taaguuteqartinneqartoq, inuttut atukkani, aningaasaqarnermi, politikkimi avatangiisinilu pissutsinik imaqartoq – tassani tamanik isiginnilluni tamanik piujuartitsineq inaarutaasumik anguniagaavoq.

Ineriartortitsineq taanna aamma Kalaallit Nunaannut atuuppoq – tassani silaannaap allanngoriartornerata kinguneri ersarissigaluttuinnarlutik aammalu aningaasaqarnermi inuttullu atukkatigut suli periarfissaqartitsilluni. Kommuneqarfik Sermersuup piujuartitsilluni siunissaqarnissamik suliniuteqaqataanissaa piffissanngorpoq.

Periusissiap uuma piviusunngortinnissaanut pisariaqartoq pingaarutilik tassaavoq, taassuma periusissiatsinnut atuuttunut pissusissamisoortumik uiggiunnissaa tapersiinissaalu – periusissiaq una taamaalilluni suliassanut kommunimi suliaralugit ingerlanneqareersunut sinaakkutaassaaq.

Piujuartitsilluni ineriartortitsinermut FN-p nunarsuarmi anguniagai ineriartortitsinissap paaseqatigiissutigineqalernissaanut imaannaanngitsumik periarfissiipput. Paaseqatigiissuteqarneq kommunitsinni ataatsimullu isigalugu Kalaallit Nunaanni nu-narsuarmilu assigiinngiiartunik suleqatigiinnitsinnik pitsanngorsaataasinnaasoq.

Nunarsuarmi anguniakkanut periusissiaq taamaalilluni ataatsimut isiginnilluni piujuartitsilluni ineriartortitsinermut kommunimi tamarmi suleqatigiissutigisassatsinnut sinaakkutaavoq.

»Piujuartitsilluni ineriartortitsinermut nunarsuarmi anguniakkanut periusissiaq« atuarluarisiuk.

Asii Chemnitz Naarup

Borgmesteri

Kommuneqarfik Sermersooq

En prioriteret indsats

Isumaqarluartumik sunniutilimmillu piujuartitsilluni ineriartortitsinissami tulleriiaaraluni suliniuteqarnissaq pingaartuuvoq. Taamaattumik nunarsuarmi anguniakkanut periusissiami immikkoortut marluk atorneqarput, anguniakkat pingaarnerit pingaannginnerusullu.

Anguniakkat pingaarnerit periusissiamut tunngaviupput, taakkulu kommunimi takorluukkat siunertallu arlallit ataaniittut atorlugit itisilerneqassapput. Anguniakkani pingaannginne-rusuni anguniagaq siullermik tassaassaaq maannakkut ineriartornerup ingerlatiinnarnissaa, taakku taamaalillutik pitsaanngitsumik kinguneqassanatik

Anguniakkat pingaarnerit

Periusissiami anguniakkat pingaarnerit Kommuneqarfik Sermersuumi unammilligassavut aalajangersimasut aallaavigalugit toqqarneqarput. Taamaalilluni immikkoortut kommunip sunniuteqarfigissallugit kissaatigisai toqqarneqarput – taamaalilluni Nunarsuarmi anguniak-kat kommunillu periusissiai atuutereersut kommunip sunniuteqarfiginiagai annertuut im-minnut ingerlaqatigiinniassammata.

  • Anguniagaq 3 – Peqqissuseq atugarissaarnerlu
  • Anguniagaq 4 – Pitsaassusilimmik ilinniarneq
  • Anguniagaq 8 – Suliffiit pitsaasut aningaasatigullu ineriartorneq
  • Anguniagaq 9 – Suliffissuit, nutaaliorneq attaveqaatillu
  • Anguniagaq 11 – Illoqarfiit najugaqarfiillu piujuaannartitsisut
  • Anguniagaq 12 – Akisussaassuseqartumik atuineq tunisassiornerlu
  • Anguniagaq 13 – Silaannaq pillugu iliuuseqarneq
  • Anguniagaq 17 – Iliuuseqarnermi peqatigiinneq

Sammisat

Anguniakkat pingaarnerit aallaavigalugit sammisanik tallimanik suliaqarpugut.

  • Meeqqat inuusuttullu siunissaraagut
  • Sermersooq inuussutissarsiornermi siuariartornermi qitiusutut
  • Sermersooq inuttut inerikkiartornermi tunngaviusutut
  • Sermersooq kommunitut akisussaasuusutut piujuartitsisutullu
  • Sermersooq kommunitut nutaaliortutut, eqeersimaartutut uummaarissutullu

Taakku kommunimi periusissiat atuutereersut isumassarsiorfigalugit naapertorlugillu ineriartortinneqarput – taakkununnga ilanngullugu illoqarfiit pingaarnersaat pillugu periusissiaq. Sammisat imminnut atatillugit isigineqassapput, taamaalilluta kommunimi tamanik isiginnilluta piujuartitsilluta ineriartortitsiniassagatta. Piffissamut sivisuumut sammisanik immikkoortullu akimorlugit suliaqarneq taamaalilluni Kommuneqarfik Sermersuumi piujuartitsilluni imminullu atasumik siuariartornermut atugarissaanermullu tapersiissaaq.

Meeqqat inuusuttullu siunissaraagut

Meeqqat inuuttullu siunissaraagut

Uku anguniarpavut

Kommuneqarfik Sermersuumi meeqqat tamarmik pitsaasumik ilikkagaqarfiusumillu meeraanissaat anguniagaraarput, taamaalillutik pitsaasumik inuuneqarnissamut piareersimaniassammata. Meeqqat namminneq tunngavitik malillugit meeraasinnaatitaapput, meeqqallu tamarmik pitsaasumik inerikkiartorfiusumillu meeraanissaannik suliniuteqarnissarput pingaartuuvoq. Taamaammat iliuuseqarnissamut pinnguarnissamullu inissaqarneq ilikkagaqarnissamik tamatigut tunngaveqartariaqanngilaq.

Meeqqat inuusuttullu inuunerillutik peroriartussapput, sulilu ukiukitsuullutik inuiaqatigiinni inissaqarnermik misigissapput. Taamaalilluta inersimasut tamarmik innuttaasutut inuiaqatigiinnut ilaasutut misiginissaat sulissutigissavarput – inunnut ataasiakkaanut ataatsimoornermullu iluaqutaasumik.

Taamaammat meeqqat tamarmik peqqinnartumik toqqissisimanartumillu peroriartornissaat sulissutigaarput. Atugarissaarneq angerlarsimaffimmi aallartittarpoq, taamaammat ilaqutariit tamassuminnga pisariaqartitsinerpaajusut ikiorneqarnissaat tapersersorneqarnissaallu siuisissukkut isiginiassallugu pingaartuuvoq – meeqqat taamaalillutik toqqissisimallutik pilluartillu inuuniassammata. Tamassuma saniatigut meeqqanut unammilliutaasunik tapersersuisuusunillu tassungalu peqatigitillugu kajumissaataasunik qaffasissumik pitsaassusilinnik ulluunerani neqerooruteqassaagut. Taamaaliornikkut inuuneq tamaat ilikkagaqartarnermi inersimasutullu inuunerissaaqqinnissamut siullertut tunngaviliivigineqassapput.

Meeqqat inuusuttullu avatangiisiminnit sunneruminartuupput, avatangiisini sumiinnerat apeqqutaatinnagu. Taamaammat meeqqat inuusuttullu inuunerissaarnerisa qaffannissaa ataatsimut suliassatut isigissavarput, kivitseqatigiissaagut - atuarfiup, sunngiffimmi sammisaqarfiit angerlarsimaffiillu akornanni.

Takorluugaq ”Meeqqat inuusuttullu siunissaraagut” immikkoortumilu maannakkut suliaqarneq aallaavigalugit sammisat pingasut nassuiaaserpavut: Peqqinnartumik toqqissisimanartumillu peroriartorneq. Meeqqat ilinniagaqarnissamut piareersimasut aamma Siunissaq ataatsimoorullugu. Nunarsuarmi anguniakkat uku takorluukkap taassuma angunissaanut qitiupput:

Peqqissuseq atugarissaarnerlu

Imaaliussaagut

Peqqissumik toqqissisimasumillu peroriartorneq

Meeqqat tamarmik tarnikkut peqqissuunissaat kommunip isiginiarpaa – uani pingaartumik atornerluisut meeraat. Ilaqutariit tamarmik ikiorneqarsinnaassapput, tapersiinerlu ima aaqqissuunneqassaaq meeqqat angajoqqaaminnit qimagutsinneqartut ikilisinnerannik kinguneqassalluni. Tamassuma saniatigut paaqqinnittarfinni tapersersuisoqartassaaq – ikiuineq kiisalu ilinniartitsineq ilitsersuinerlu

  • Peqqinnartumik inuuneqaqqilernermik meeqqat atuarfianni ilinniartitsineq
  • Ulluunerani paaqqinnittarfinni nerisaqartitsinermik aaqqissuussinerit
  • Meeqqanut illoqarfinnit mikisuneersunut nunaqarfinneersunullu atuarniarlutik ungasissumut nuuttussanut tapersersuineq
  • Ilaqutariinnik ilitsersuisarneq siunnersuisarnerlu, ilaatigut inuusuttunut angajoqqaanullu navianartumiittunut
  • Perorsaanermi ulluinnarnilu inuunermi pissutsinik aaqqiiniarluni ilaqutariinnut namminneq angerlarsimaffianni tapersersuineq
  • Paaqqinnittarfinni meeqqanut immikkut pisariaqartitsisunut perorsaanermi tapersersuineq

Meeqqat ilinniagaqarnissamut piareersimasut amerlanerit

Meeqqat tamarmik peqataatitsiviusumi atuartuunissaat kommunip kissaatigaa – pingaartumik meeqqat immikkut pisariaqartitsisut isiginiarlugit. Piginnaanngorsaaneq eqqarsaatigineqassaaq, ilaatigut nukappiaqqat niviarsiaqqullu ileqquusumik suliarisartagaasa assigiinnginnerulersinnissaat siunertaralugu ileqquusuniillu allaanerusunik piginnaasaqalernissaq pikkoriffeqalernissarlu siunertaralugit.

  • Oqaatsinik piginnaasat taamaatiinnartartullu ikilisinnissaat isiginiarlugit
  • Ilinniartitaanermut Aqutsisoqarfik suleqatigalugu naqinnernik ilisarinnissinnaanngitsunik kalaallisut misilisaarneq
  • Inuusuttut 80%-ii meeqqaat atuarfianni naammassigunik inuusuttut ilinniagaannut ingerlaqqittassapput
  • Fysio- aamma ergoterapeutit atorlugit meeqqat piginnaasakitsut ikiornissaannut pitsanerusumik periarfissaqarneq
  • Open College Network aqqutigalugu innuttaasut innarluutillit piginnaanngorsarnissaat ilinniarnissaallu isiginiarlugu
  • Eqqumiitsuliorneq kulturilu ilinniarnerup ilaatut inerikkiartuutaasutut isigineqassapput, ilaatigut kulturimut nammattagaq atorlugu

Siunissaq ataatsimoorullugu

Kommuni meeqqanut inuusuttunullu tunngatillugu amerlasuunik pingaaruteqartunillu suleqateqarpoq. Kommunimi meeqqat pitsaanerpaamik peroriartortilerniarlugit suleqatit taakku annertuumik isumaqarluartumillu atorneqassapput. Meeqqat peqataatinneqassaput namminnerlu siunissartik periarfissatillu pillugit aalajangeeqataasassapput.

  • Klassinik nunanut allanut paarlaasseqatigiittarneq
  • Meeqqat atuarfiannit suliffeqarfinnut pulaartarneq
  • Erasmus+ aamma Nordplus atuartut ilinniartitsusullu nunanik allanik suleqateqarnermi paarlaasseqatigiittarnermilu atuisarnissaat isiginiarlugu
  • Ingerlatsisunik assigiinngitsunik suleqateqarneq, soorlu atuarfinnik, sunngiffimmi sammisaqartitsivinnik, angerlarsimaffinnillu
  • ”Qaqisa”-mik suliaqarneq ingerlateqqillugu
  • Angajoqqaat atuarfinni suleqatigiinnerat, Island isumassarsiorfigalugu
  • Inuusuttut kommunalbestyrelsiannik suliaqarneq ingerlateqqillugu
  • Mind Your Own Business aqqutigalugu aallarnisaasuunermik isiginninniarneq
  • Fonden for Entreprenørskab suleqatigalugu peqataatillugulu, meeqqat atuarfianni aallartereerluni
  • Atuarfiit plejehjemminik suleqateqarnerat pulaartarnerallu
  • Meeqqat inuusuttullu immikkoortunut pilersaarutini sulianut attuumassuteqartuni eqqarsaatigineqassapput

Sermersooq inuussutissarsiortut siuariartorneranni qitiusutut

Sermersooq inuussutissarsiortut siuariartorneranni qitiusutut

Uku anguniarpavut

Sermersooq, kommunitut illoqarfiit pingaanersaattut, siuariartortunik suliffeqarfeqarluni aamma nutaaliornermut suliffissaqartitsilersarnikkullu pitsaasumik aallaaviulluni, inuussutissarsiutit siuariartornissaannut alliartornissaannullu annertuumik periarfissaqarpoq.

Tamassuma siunissami pinissaanut pisariaqartut ilagaat, namminersortut kommunimi ingerlatsinerunissaat. Kommuni taamaammat ujartuilluni aaqqiissuteqarniarlunilu sulisarnermik kiisalu piginnaasaqarluni angusaqarfiusumillu suliassanik suliarinnittarnermik siuarsaaqataaniarpoq. Tamassuma saniatigut inuussutissarsiutinik ineriartortitsineq pigin-naanngorsaanerlu kommunip suliniutaani assigiinngiiartuni eqqarsaatigineqartassapput, sanaartorneq aningaasaliisarnerillu eqqarsaatigalugit.

Kommunimi siuariartornissamut periarfissat atorluarneqarnissaannut pisariaqartoq alla tassaavoq kommunimi inuussutissarsiornermi immikkoortut immikkut isumalluarnartut annertunerusumik isiginiarneqarnissaat. Uani taaneqarsinnaapput aalisarneq, aatsitassarsiorneq takornariaqarnerlu. Kommuni tamassuma saniatigut niuerfiit angisuut Europap aamma Amerikap Avannarliup akornanni inissisimalluarpoq, tassungalu atatillugu arlalinnik periarfissaqarluni.

Amerlanerit suliffeqassapput – pingaartumik innuttaasut navianartumiittut. Innuttaasut suliffeqalernissaannut periarfissat innuttaasut kissaatigisaat pisariaqartitaallu qitiutillugit ineriartortinneqassapput. Innuttaasut suliffeqalernissaat innuttaasut kommunillu akornanni ataatsimut anguniagaassaaq. Taamaammat isumaqarluartumik sulineq kiisalu imminut pilersorsinnaajumalluni nammineerneq inuunerullu pitsaassusia tamanut iluaqutaapput.

Takorluukkap ”Sermersooq inuussutissarsiortut siuariartorneranni qitiusutut” anguneqarnis-saanut sammisat sisamat suliarineqarput. Suliffeqarneq piginnaanngorsaanerlu. Inuussutissarsiutinik ineriartortitsineq. Tamanut piujuartitsilluni pilersaarusiorneq Kiisalu Kommuni ataatsimoortoq. Tassunga atatillugu nunarsuarmi anguniakkat uku suliarineqarnerupput:

Imaaliussaagut

Suliffeqarneq piginnaanngorsaanerlu

Atuartuniit inuiaqatigiinni innuttaasunut suliffissarsiortunut ilinniagaqarnissamut piareersimasoqartariaqarpoq piginnaanngorsartoqarlunilu. Innuttaasut amerlanerusut suliffeqassapput inuiaqatigiinnilu amerlanerit pitsaanerusunik piginnaasaqassapput. Aamma amerlaner-nik suliffeqarfeqassaagut – pingaartumik nammersortut amerlanerussapput.

  • Inuusuttut 80 procentii inuusuttut ilinniagaannik ilinniassapput
  • Piginnaanngorsarneq Majoriamiillu taperserneqarneq
  • Suliffeqarfinnik inuit atugaanni aningaasaqarnermik suliaqartunik pilersitsineq
  • FabLab-imik pilersitsineq, aallarnisaasunut sinaakkutilimmik teknimillu tapersiisumik teknologilimmik, atuarfinnit namminersortunillu atorneqarsinnaasumik

Inuussutissarsiutinik ineriartortitsineq

Inuussutissarsiutinik ineriartortitsinermi piujuartitsineq tunngavigineqassaaq. Tamanna pissutsini arlalinni assigiinngitsuni atuuppoq, ilisimatusarneq teknologilu, nutaaliorneq aallarnisaasuuneq siunertaralugit ingerlatsisullu akornanni suleqatigiittoqarluni.

  • Teknologimik nutarsaanerit isumaqarluartumik isiginiarlugit
    • Suliassanik suliarinnittarnermik digitaliseeriineq
    • Kommunimut digitalinngorlugu atassuteqartarneq
  • Suliffeqarfinnik mikisunik ikiuisarneq tapersiisarnerlu isiginiarlugit
  • Nutaaliornermut nutaaliorsinnaassuseqarnermullu sinaakkutit pitsaasut
    • Innuttaasut illuanni Illorput kulturimik suliaqarfik nutaliorfiusinnaasoq
    • Tunisassiat namminersortunit tunisassiarineqartut tuniniarneqartarnerisa ineriartortinneqarneranut sinaakkutitut FoodLab-imik suliaqarneq
    • Sermersooq Business Councilimik suleqateqarneq
  • Uku aqqutigalugit aallarnisaasuunermik isiginninniarneq
    • Mind Your Own Business
    • Fonden for Entreprenørskab suleqatigalugu peqataatillugulu
  • Inuussutissarsiortunut sinaakkutit pilerinartut qulakkeerlugit
    • Assersuutigalugu inuussutissarsiutinut nunaminertanik sulisunillu piginnaasalinnik isiginninniarnikkut
    • Isumasiueqatigiittarnermut suleqatigiinnermullu tunngatillugu soqutigisaqartut peqataatinnerisigut namminersortunut sinaakkutitut atugassaritinneqartut pitsanngorsarlugit
    • Inuussutissarsiortunut nunaminertat
    • Suliassanik eqaatsumik suliarinnittarneq
    • Inuussutissarsiortut kommunimut matuat ataaseq
    • Invest in Nuuk  

Assartuineq imminut napatissinnaasoq kikkunut tamanut

Kommunimi attaveqaatit inuussutissarsiortunut pilerinartumik sinaakkusiissapput. Taamaammat illoqarfinni, nunaqarfinni inoqarfinnilu pilersaarusiorneq attaveqaatillu isiginiarneqarput. Aamma innuttaasut immikkut pisariaqartitsisut isiginiarneqassapput, assersuutigalugu kommunimi atortunik atuisinnaanerannut tunngatillugu.

  • Iseriartortut majorallaffii, alloriusat, matut silittut kommunillu illuutaasa atorneqarsinnaanerannik iliuutsit allat, innuttaasut tamarmik taamaalillutik isersinnaani-assammata ikioqqusariaqassanngimmatalu
  • Assartuutit innuttaasunit atorneqarnerulersinnaalersillugit
  • Umiarsualiviup mittarfiullu akornanni inuussutissarsiortunut aqqut suliffeqarfinnut nunanit tamaneersunut, nunami nammineersunut sumiiffinneersunullu pilerinartoq
  • Namminersorlutik Oqartussanut sullissineq pillugu isumaqatigiissutinik oqaloqateqarneq
  • Nuummi mittarfiup tallinera
  • Niusarfinnik puttasunik immallu tungaanut majuartarfinnik pisiortorneq, pingaartumik Tunumi

Kommuni ataatsimoortoq

Inuussutissarsiutinik ineriartortitsineq kommunimut tamarmut iluaqutaassaaq – taamaammat oqartussat, inuussutissarsiortut ilisimatusartullu akornanni suleqatigiinneq ineriartortitsinermi tunngavigineqassaaq.

  • Sermersooq Business Councilimik, Destination East Greenlandimik aamma Nanu Travel-imik suleqateqarneq
  • Inuussutissarsiutinut sinaakkutit pitsanngorsarnissaat siunertaralugu ataatsimoorluni suleqatigiinneq
  • Nunaqarfinni isorliunerusunilu inuussutissarsornermi periarfissanik misissuineq
  • Ilisimatusarfimmik suliaqarneq ingerlateqqillugu
  • Suliffeqarnermi nuussinnaaneq annertusillugu – ilaatigut Majoriaq aamma Campusimik periuseq kiisalu suliffeqarfiit inuit atugaanni aningaaqarnermik suliaqartut aqqutigalugit
  • Piujuartitsilluni inuussutissarsiutinik ineriartortitsineq immikkoortunut pilersaarutini suliaqarfinnut ataasiakkaanut tunngassuteqartuni isiginiarneqassaaq

Sermersooq inuttut inerikkiartornermi tunngaviusutut

Sermersooq inuttut inerikkiartornermi tunngaviusutut

Uku anguniarpavut

Innuttaasut tamarmik tapersiisinnaapput. Taamaammat Sermersooq kommuniussaaq kikkut tamaasa pissarsiviginissaannik kikkullu tamarmik peqataatinneqarnissaannik suliaqartoq. Tamanna innuttaasunut tamanut atuuppoq, inuuneq tamaat. Meeqqat inuusuttullu pinnguarnissamut ilikkagaqartarnermullu inissaqartinneqassapput, taamaalillutik pitsaasumik peqqinnartumillu meeraanermikkut ilinniarnissamut kingusinnerusukkullu suliffeqalernissamut piareersimaniassammata. Inersimasut imminnut ilaquttaminnillu pilersuisinnaassapput inuiaqatigiinnilu ineriartortitsinitsinnut tapersiillutik. Utoqqaat toqqissisimanartumik nuannersumillu utoqqalissapput, iliuuseqartarnissamut inissaqartinneqarlutik taamaaliortoqarsinnaatillugulu tapersiisarlutik. Taamaalilluni ataatsimoornermi innuttaasut tamarmik inissaqartinneqarput, inuunerminni killiffiat apeqqutaatinnagu.

Innuttaasut peqqissusaat pimoorunneqassaaq – timikkut tarnikkullu. Takussutissallu iliuuseqarfiginissaat ajornartorsiutillu pinaveersimatinnissaat isiginiarneqassapput, taamaalilluni ileqqut ajortut siusissukkut qaangertinneqartassallutik. Tamanna inersimasunut atornerluinermik ajornartorsiuteqartunut allatulluunniit ajornartorsiuteqartunut atuuppoq – pingaartumilli meeqqanut taamaattunik atugaqarlutik peroriartortunut. Tamanna sapinngisamik kommunip, atuarfiit kattuffiit ikiuiniartartut sulianut aalajangersimasunut attuumassuteqartut suleqatigiinnerisigut pissaaq.

Suleqatigiinneq tassaarpiassaaq peqatigiinermi kommunimi pilersinneqartussami taaguut pingaarneq. Peqatigiiffiit assigiinngitsut nalilerneqarsinnaanngitsumik suliaqareerput – piumassutsimik suliaqartarneq annertusaqqinneqassaaq. Inuiaqatigiit tamarmik uani aamma isiginiarneqassapput – meeqqat inuusuttullu piumassutsiminnik sulisunut isumalluutaasinnaapput periarfissarlu taanna ineriartortinneqassaaq.

Takorluukkamik ”Sermersooq inuttut inerikkiartornermut tunngavittut” suliaqarnermi sam-misat pingasut uku eqqarsaatigineqarput: Peqqissuseq, Inuuneq tamaat ilikkagaqartarneq aamma Inuiaqatigiinni inissaqarneq inuuneq tamaat. Takorluugaq taanna anguniarlugu anguniakkat uku suliarineqarnerupput:

Imaaliussaagut

Peqqissuseq

Innuttaasut tamarmik peqqissusaat isiginiarneqassaaq. Tamanna ilaatigut isumaqarpoq peqinnartumik inooriaaseqarneq, tarnikkut peqqissuuneq aamma peqqissuseq ataatsimut isigalugu pillugu paasisitsiniaaneq paasisissutissiisarnerlu.

  • Imigassamik aanngajaarniutinillu atuisarnerup pinaveersimatinnera
  • Kommunimi pujortartarnerup suli isiginiarneqarnera
  • Kommunimi peqqinnarnerusunik nerisaqartarneq
  • Tarnikkut ajortiasuunermik imminullu toquttoqartarneranik isiginninniarneq
  • Pioreersumik kinguaassiutitigullu peqqissusermik innarlerneqartunillu ikiuisarnermik isiginninniarneq
  • Kommunimi tamarmi ikiorneqarsinnaasoqartariaqarpoq taperserneqarsinnaasoqartariaqarlunilu
  • Meeqqat atugarissaarnerannut inerikkiartornerannullu iluaqutaasumik atuarfiup angajoqqaallu akornanni annertunerusumik suleqatigiinneq
  • Innuttaasut ataasiakkaat peqqissusaannut ilorrisimaarnissaannullu silami timigissarnermut atortut takussaasut
  • Arsartarfiit ivigaarallit takussaasut
  • Kammagiitta aamma Qajannaatsuuneq meeqqat inuusuttullu tarnikkut peqqissusaannut taperseeqataapput, ulluunerani neqeroorutini atuarfimmilu
  • Hallit suleqatigiillutik qaammatit naaneranni qaammatikkaarlugu aaqqissuussisarnerat, tassani meeqqat inuusuttullu nutaaliornissamut, pinnguarnissamut aalanissamullu aggersarneqartarlutik.

Inuuneq tamaat ilikkagaqartarneq

Innuttasut tamarmik ilikkagaqartarnissaat ineriartornissaallu isiginiarneqassapput. Tamanna kinguneqarpoq inuit ataasiakkaat piginnaasaannik innuttaasullu assigiinngitsunik pikkorissarfigisinnaasaannik ilinniagarisinnaasaannillu isiginninniarneq. Tamassuma saniatigut inu-ussutissarsiortut annertunerusumik suleqatigineqassapput, meeqqat taamaalillutik maligassiuisoqarniassammata tamannalu aqqutigalugu anguniagaqarlutik.

  • Inuusuttut 80 procentii meeqqat atuarfiata kingorna inuusuttut ilinniagaanni ilinnialissapput
  • Qaffasissutsini tamani ilinniarnermik unitsitsiinnartarnermik isiginninniarneq – tassunga ilanngullugu oqaatsinik piginnaasanik immikkulu pisariaqartitanik isiginninniarneq
  • Majoriaq aamma Campusimi periuseq atorlugit piginnaanngorsarnerup ilinniaqqinnerullu isiginiarneqarnerat
  • Innuttaasunut innarluutilinnut Open College Networ-imik piginnaasallu pillugit uppernarsaatinik suliaqarneq ingerlateqqillugu

Inuiaqatigiinni inissaqarneq - inuuneq tamaat

Kikkut tamarmik Kommuneqarfik Sermersuumi inissaqassapput. Tamanna salliutillugu kinguneqarpoq inunnut imminnut inissaqartitsilersinnaanngitsunut kommunip ikiuisarnissaa. Taamaammat pisuni navianartuniiffiusuni immikkullu pisariaqartitsiviusuni meeqqanut sukkasuumik, sunniutilimmik annertuumillu suliniuteqartoqartassaaq. Suliffeqarfiit amerlanerussapput inissiallu amerlanerussallutik – taakkunani msrlunni pingaartumik namminer-sortut amerlanerussapput. Naggasiullugu utoqqarnut innarluutilinnullu inissaqartitsisoqassaaq – inunnut inuiaqatigiinni nukissalinnut inunnullu ikiorneqarnissamik tapersersorneqarnissamillu pisariaqartitsisunut.

  • Utoqqarnut innarluutilinnullu immikkut pisariaqartitsisunut ikiuisarneq tapersersuisarnerlu, timikkut tarnikkullu assersuutigalugu puigortunngornermi
  • Utoqqaat innarluutillillu eqeersimaartut piumassutsikkut sulinermi suliffeqarfinnilu tamatigoortuni inissaqassapput suliaqarsinnaallutillu
    • Piffissani assigiinngitsuni sulinissamut, qajassuunneqarluni sulinissamut aamma inuit atugaanni aningaasaqarnermi suliffiuteqarnissamut periarfissat
  • Innuttaasunut immikkut pisariaqartitsisunut ajornakusoortimillu inissisimasunut ikiuisarneq
    • Innuttaasunut piginnaasakitsunut sinnaakkutit ikiorsiisarnerlu
    • Socialpsykiatrimik ingerlatsiffiulluartumik isiginninniarneq
  • Utoqqarnut innarluutilinnullu inissiat naleqquttut amerlanerusut qulakkeerneqarnerat
  • Inuusuttunut ilinniartunullu inissiat annertunerusumik isiginiarneqarnerat
  • Inissianik inuit namminneq pigisaannik 1600-nik pilersitsinissaq siunertaralugu illoqarfimmik ineriartortitsinermi suliniut
  • Suliaqarfinnut ataasiakkaanut immikkoortunut pilersaarutit isiginiarneqassapput.

Sermersooq kommunitut akisussaassuseqartutut piujuartitsisutullu

Sermersooq kommunitut akisussaassuseqartutut piujuartitsisutullu

Uku anguniarpavut

Sermersooq illoqarfiussaaq silaannarmik mianerinnittoq piujuaannartitsisorlu. Pisuussutigut paarilluassavagut tamannalu atuinermi tunisassiornermilu takuneqarsinnaassaaq. Tamassumunnga tunngavik tassaavoq kaaviiaartumik a-ningaasaqarnerup ingerlanneqarnissaa. Tunisassiat atortullu kaaviiaartinneqarnissaat annertunerusumik eqqarsaatigineqassaq, tassani taakku nalingi annertunerpaamik atorluarneqassallutik.

Taamatut ingerlatsineq kommunip kisimiilluni kivissinnaanngilaa. Sunniuteqartoqarsinnaassappat kommunip, innuttaasut inuussutissarsiortullu akornanni aaqqiissutissat nutaat ataatsimoorussallu isiginiarneqassapput. Taamaammat suleqatitsinnut annertuunik aamma piumasaqaateqartarpugut, assersuutigalugu pisiortornermik politikkitsinni, neqeroorutitsinni assigiinngitsuni aamma inuussutissarsiortunik ataatsimut isigalugu suleqateqarnitsini. Tassami Sermersuumi suliffeqarfimmik ingerlatsineq imatut pilerinartuussaaq avatangiisini inuttullu atukkani piujuartitsilluni siuariartorneq siuarsarneqassalluni.

Silaannaap allanngoriartornerata kinguneri arlallit takuneqarsinnaalereerput – nunarsuarmi tamarmi naalakkersuisut, kommunit, suliffeqarfiit kattuffiillu assigiinngitsut allat tamanna pillugu ataatsimoorlutik suliniuteqarput. Sermersuumi tamanna peqataaffigissavarput. Ilaa-tigut CO2-mik akisussaassuseqartumik atuinissaq qulakkiissavarput, ilaatigullu silaannaap allanngoriartornerata kinguneqaqqinnissaanut tunngatillugu kommunip iliuuseqarluarsinnaanera qulakkiissavarput. Tamanna aamma inuussutissarsiortut suleqatigalugit pissaaq.

Takorluukkamut ”Sermersooq kommunitut akisussaassuseqartutut piujuartitsiviusutullu” atatillugu sammisat pingasut suliarineqarput: Kaaviiaartumik aningaasaqarneq, Silaannaq pillugu suliniuteqarneq aamma Suleqatigiinnermi suliniutit. Suliami tassani nunarsuarmi anguniakkut uku qitiupput:

Imaaliussaagut

Kaaviaartumik aningaasaqarneq

Eqqagassanik qanoq isiginninneq suliaqartarnerlu kommunip isiginiassavaa. Tamanna ilaatigut atuuppoq eqqagassanik pilersitsisarnermi, passussisarnermi immikkoortiterisarnermilu. Tamanna tamassuma saniatigut kinguneqarpoq kaaviiartumik aningaasaqarnerup tunisassiornerullu kommunimi siunissami atuisarnermi isiginiarneqartarnissaat.

  • Kommunimi eqqagassanik ataatsimut passivimmik pilersitsineq
  • Inoqutigiit immikkoortiterisarnerisa aallartinneqarnera
  • Igalaaminernik qillertuusanillu immikoortiterisarnerup isiginiarneqarnera
  • Ilisimatusarfimmik suleqateqarneq
  • Kommunimi akisussaasseqartumik piujuartitsillunilu pisiortortarnermut politikkimik isiginninniarneq
  • Innuttaasut atuinermik ilisimasaqarnissaat pillugu paasisitsiniaaneq isiginninniarnerlu
  • Kommunimi paaqqinnittarfiit (neriassanik) atuinerannik isiginninniarneruneq
  • Kaaviiaartsitsilluni sanaartornissamut periarfissanik misissuineq

Silaannaq pillugu iliuuseqarneq

Kommunip ingerlaavartumik suliaqarnermi kiisalu periusissiani iliuusissatullu pilersaarutini silaannaap allanngoriartorneranut suliniutit ilannguttassavai.

  • Silaannaq pillugu suliniuteqarneq pisortat nutaanik sanaartorneranni isiginiarneqassaaq
  • ESCO-p neqeroorutaasa nukissiuutinillu atuinikunnerulernissap isiginiarneqarnerat
  • Kommunip piujuartitsinerusunik biiliuteqarnissaaq – ilaatigut biilinik hybridinik pisiortornikkut
  • Kommunip inissiaateqarfiata inissiaataani innaallagissamik kiammillu atuinermut uuttuutinik ikkussuinera

Suleqatigiinnermi suliniutit

Kommuni avatangiisini piujuartitsilluni ineriartortitsinermi suliniuteqarnermik kissaateqarneq piviusunngortinniarlugu kommunip suleqatit assigiinngitsut isiginiarpai, assersuutigalugu CSR-Greenland. Ilaatigut kommunip sulisoqarfiini piujuartitsinissap ataatsimut suliniutinngortinissaa inuussutissarsiortullu qanoq peqataatinneqarsinnaanerat isiginiarneqarput.

  • Kommunip pigisaanik sanaartortitsisuuffianilluunnit sanaartornerni suleqatinut piumasaqaateqarneq
  • Kommunip atuarfiinni WWF-imik suleqateqarneq, tassani meeqqat piujuartitsinermi-kamik avatangiisinillu ilinniartinneqartarlutik.
  • Nunarsuarmi anguniakkat piujuartitsinerlu suliaqarfinnut ataasiakkaanut immikkoortunut pilersaarutini isiginiarneqartassapput

Sermersooq kommunitut nutaaliortutut, eqeersimaartutut uummaarissutullu

Sermersooq kommunitut nutaaliortutut, eqeersimaartutut uummaarissutullu

Uku anguniarpavut

Sermersooq kommuni najugaqarfigis-sallugu pilerineqartuussaaq. Tassani najugaqarneq, suliffeqarneq, suliffeqarfimmik ingerlatsineq pitsaasuussapput – aammali nutaaliornissamut eqeersimaarlunilu inu-uneqarnissamut inissaqassaaq.

Sermersooq kommunioreerpoq pissanganartoq assigiinngiiaartunillu ingerlatsisoq. Kommuni taamaattoq eqqumiitsuliornikkut, kulturikkut ataatsimoornikkullu pilersinneqartarpoq – tamakku taamaammat siunissami isiginiarneqassapput. Eqqumiitsuliornissamut isumassarsiorfissat siuninnguatsinneereerput - Sermersuumi sumiiffiit tamarmik nunap sananeqaasianik kusarnartumik, immikkuullarissumik assigiinngiiartumillu avatangiiseqarput. Tamanna annertusarneqassaaq, aammalu aallarnisaasut eqqumiitsuliortullu nutaaliortut kommunitsinni najugaqareersut tamassuma ineriartorteqqinerani tunngavileeqataassapput – pingaartumik piginnaanillit inuusuttut isiginiarlugit.

Nutaaliorneq tamanna ineriartortitsinermut tunngaviuvoq ilaannullu suliffeqalernissamut immalumi nammineq suliffeqarfigisamik aallartitsinissamut aqqutissaassaaq – taakku marluk kommunimi ataatsimoornermut ilua-qutaasuupput.

Sermersooq tamassuma saniatigut timersornermi periarfissanik atuilluaanissamut pikkorinnerussaaq. Sumiiffinni innuutaasut eqeersimaartut pilersissavagut, sumiiffinni ataatsimoornermik misigisimaneq annertusarniarlugu innuttaasullu peqqissusiannut iluaqutaasumik.

Eqqumiitsuliorneq, kulturi timersornerlu aamma illoqarfimmik uummaarissumik pilerinartumillu pilersitseqataasarput, takornarissanut nuussinnaasunullu. Kommunip taamaaliornikkut amerlanerusut tikeraarnissaat ikiorsiivigissavaa neriutartumillu maanga suliniarlutik nuuttut najugaqartiinnarnissaannik pikkorinnerulissalluni.

Takorluukkamut ” kommuni nutaaliortoq, eqeersimaartoq uummaarissorlu” atatillugu sammisat uku pingasut isiginiarneqarput: Timersorneq eqeersimaarnerlu, Eqqumiitsuliorneq, kulturi nutaaliornerlu kiisalu kommuni najugaqarfissallugu pilerineqartoq. Suliaqarnermi tassani nunarsuarmi anguiakkat uku qitiupput:

Imaaliussaagut

Timersorneq eqeersimaarnerlu

Timersornermut aaqqissuussaasumut aaqqissuussaanngitsumulu sinaakkusiisoqasaaq kiisalu ilinniartitsinermik kikkullu tamarmik timigissartarnissaannik eqeersimaartuunissaannilluikiuisoqartassalluni. Timersornermi peqataanissaq ajornaatsuussaaq pilerinartuullunilu – pingaartumik ualikkut ulluunerani neqerooruteqarnikkut meeqqanut inuusuttunullu.

  • Sunngiffimmi sammisaqarnissamut allagartaqarneq, tassani sunngiffimmi sammisaqarnernut aningaasatigut tapiissuteqartoqarsinnaalluni
  • Tasiilami atuarfimmi timersornermi qilaatersorneq
  • Hallit suleqatigiillutik nutaaliornermut, pinnguarnermut aalanermullu meeqqanik inuusuttunillu tamanik aggersaasarnerisigut qaammatit naaneranni qaammatikkaartumik aaqqissuussisarnerat
  • Nuannaffik, tassani meeqqat angajoqqaallu sapaatip akunnikkaartumik aaqqissuussinerni timersortarfinni peqatigiissinnnaallutik
  • Atuartut feriarneranni aaqqisuussisarnerit isiginiarneqarnerat ingerlateqqillugu
  • Silami timigissarnermut atortut takuneqarsinnaasut
  • Playground Nuuk, tassani meeqqat aasaanerani salami sammisaqartitsinernut assigiinngitsunut illoqarfiup qeqqanut aggersarneqartarluti
  • Nuummi, Tasiilami Ittoqqortoormiinilu sisorarfiit
  • Skilift i Nuuk, Tasiilaq og Ittoqqortoormiit.
  • Silami sammisaqarnermut arsartarfiit ivigaaraasallit, assarnerinnaanngitsumut

Eqqumiitsuliorneq, kulturi nutaaliornerlu

Eqqumiitsuliorneq nutaaliornerlu kommunimi inuunerup nalinginnasumik ilagissavaa. Sunngiffimmi misigisassaannaanngitsutut – aammali kommunimi innuttaasunut qiimmassaatitut inuussutissarsiummillu ingerlatsisutut. Eqqumiitsuliornerup nutaaliornerullu inuussutigineqarsinnaanerinut sinaakkusiisoqassaaq, assersuutigalugu suliffeqarfiit mikisut namminersortut aqqutigalugit. Sumiiffinni eqqumiitsuliortut inissaqartinneqassapput tapersersorneqarlutillu inuusuttullu piginnaanillit aallartinnissaannut ikiorneqartassallutik. Eqqumiitsuliorneq kulturilu tamakku saniatigut aqqusinerni kommunillu sulisoqarfiini inissaqartinneqassapput – ilaatigut aqqusinerni eqqumiitsuliornikkut atuarfinnilunniit eqqumiitsuliaateqarnikkut.

  • Nuuk issittumi eqqumiitsuliornermi kulturimilu illoqarfittut nittarsaanneqassaaq
  • Kulturimi nammattakkamik sulineq ingerlateqqinneqassaaq, tassani meeqqat atuartut kulturi atorlugu ilikkagaqartarnerisa qaffassarnissaa isiginiarneqartassalluni
  • Ulluni nalliuttorsiorfinni aaqqissuussinerit ingerlateqqinneqassapput, tassani nunami namminermi nunallu tamat akornanni ullut nalliortorsiufit ataatsimut malunnartinneqartassalluti
  • Sunngiffimmi atuartitsineq, tassani meeqqat inersimasullu sunngiffimmi atuartinneqarsinnaallutik, ilisimasaqalerlutik piginnaasaqalerlutillu

Kommuni najugaqarfigissallugu pilerinartoq

Kommuni timersorneq aqqusinernilu kulturi inissaqartilerniarlugit peqatigiiffinnik suliffeqarfinnillu suleqateqassaaq. Tamassuma saniatigut kommuni najugaqarfigilernissaataa qanoq pilernartunngortinneqalersinnaanera isiginiarneqarnerussaaq – suliffissatut periarfissat, najugassaq sunngiffimmilu sammisassaqarneq eqqarsaatigalugit. Tamanna isumaqarpoq ilaquttat tamaasa ilagalugit kommunimut nuussinnaaneq: inissaq, suliffissaq paaqqinnittarfinnilu inissaqarnissaq eqqarsaatigalugit. Kommuni innuttaasunit assigiinngiiartunit naju-gaqarfigissallugu pilerinartuussaaq, pingaartumillu kalaallit ilinniarnermik naammassinerata kingorna angerlaqqinnissaannik kajumilersitsiniarluni suliniuteqartoqassaaq.

  • Illoqarfimmi sumiiffiit pilerinartut pilersinneqassapput attatiinnarneqarlutillu
  • Inissiat, suliffissat paaqqinnittarfinnilu inissat amerlanerusut pilersinneqassapput
  • Sunngiffik.gl, tassani periuseq matu ataaseq pilersinneqassaaq aamma peqatigiiffin-nik pilersitsisarneq nalunaarsuisarnerlu piuminarnerulersinniarlugit digitaliseeriisoqassalluni
  • Tapiissutit pillugit malittarisassat, tassani inuit ataasiakkaat, soqutigisaqaqatigiit peqatigiiffiilluunniit suliniutit tapiissuteqartoqarnissaanik qinnuteqaateqarsinnaallutik
  • Piumassutsiminnik sulisut illuat, tassani peqatigiiffiit ulluinnarni ingerlatsinerminnut tunngatillugu pisariaqartitatik matussusertissinnaallugit

Quppernerup imarisaa qanganitsersimava?

Quppernermut naqqiutissaqarpit?