Kommuneqarfik Sermersuup kissaatigaa, suliffeqarfiit Namminersorlutillu Oqartussallu aatsitassiornermi pilersaarutit ataasiakkaat, IBA-t, Impact Benefit Agreement, piviusunngortittarnissaat pillugit isumaqatigiissusiornermi uummaarissumik suleqataassalluni, taamatut isumaqatigiissusiornermi suleqatigiit assersuutigalugu ilinniartiaanikkut, kalaallit suliffiutaannik atuinikkut nunaqavissunillu sulisartunik atuinikkut sinaakkutissat aalajangersarneqartarput.

Kommuneqarfik Sermersooq Aatsitassarsiornermu Pisortaqarfik suleqatigalugu ingerlatseqatigiiffiit misissueqqaarnermik ingerlataqartut kalaallit suliffiutaannik suleqateqarnermi misilittagaannik misissuinikuuvoq. Aamma inuussutissarsiummi unammilleqatigiinnermi pissutsit pillugit sumiiffimmi suliffiit misilittagaat taamatullu pisortat suliaat pillugit suliffeqarfiit naliliisarnerat misissuiffigineqarnikuuvoq.

Misissuinermi paasisat kommunip suliniarfissatut tikkuagaanut tunuliaqutaapput.

Suliniarfissat immikkoortut pingasut tikkuarneqarput:

  • Inuussutissarsiorneq
  • Sulisartut
  • Avatangiisit innuuttaasullu

Aatsitassarsiornikkut ineriartornerup pissutigalugu ataqatigiissumik pilersaarusiorfigineqartariaqarput makku immikkoortut inuussutissarsiutinik inerisaaneq, suliffeqarneq, sanarfineq avatangiisillu. Kommuneqarfik Sermersuup ingerlaavartumik ingerlatsiviit naleqqussarnissaat naliliiffigisarpaa oqartussaaffiillu assigiinngitsut suleqatigiinnerat.

INUUSSUTISSARSIORNEQ AKUUSOQ

Aatsitassarsiornermi inatsimmi periarfissiissutigineqarpoq misissueqqaarnernut atatillugu aatsitassanillu atuinermut atatillugu kalaallit inuussutissarsiortui salliutinneqartassasut, suliffeqarfiit unammillersinnaappata akit pitsaassuserlu eqqrsaatigalugit. Kommuneqarfik Sermersuup kissaatigaa, Aatsitassaanut pisortaqarfiup kiisalu aatsitassarsiornermik ingerlataqartut piumasaat malillugit suliffeqarfinnik piginnaanngorsaaqataanissani ilaatigut sumiiffinni suliffiit ineriartornissaannut pitsaasunik sinaakkusiinikkut.

Taamaattumik sumiiffimmi suliffeqarfinnut pingaartorujussuuvoq ilisimasatigut piginnaasatigullu siuarsaanissaq. Tamanna ilaatigut pisinnaavoq suleqatigiinnissamut isumaqatigiissuteqartarnissat uummarissarnerisigut, kattulluni suliffeqarfiliornikkut, pitsaassutsimik nakkutilliisarneq eqqarsaatigalugu siuarrsaanikkut, pisinnaasat annertusarnerisigut il.il.

Suliaq sapinngisamik pissaaq Kalaallit Nunaanni Namminersorlutik Oqartussat suleqatigalugit, inuussutissarsiutinik siuarsaanissamut pingaarnertut pilersaarummut ilanngullugu aamma KANUKOKA, kommunit allat, Sulisitsisut/Grønlands Arbejdsgiverforening kiisalu suliffeqarnerup iluani kattuffiit.

Misissueqqaarnermik ingerlatallit ingerlatsititseqatigiiffiit sumiiffimmilu suliffeqarfiit misissorneri tunngavigalugit kommunip suliniarfii inuussutissarsiornermi makkuupput:

  • Suleqatigiinneq attaviillu

    Oqartussaaffiit, inussutissarsiortut kattuffiillu iigai pitarlugit suleqatigiinneq nukittorsassavarput. Aallaqqaataani Aatsitassanut Pisortaqarfik kaammattorneqarpoq, sulianut ataasiakkaanut tunngatillugu neqeroorutit ammasumik pissuseqarfigissagai, sumiiffimmi suliffiit suleqataanissaminnut periarfissaqarsinnaaqqullugit. Tamatumunnga ilanngullugu sumiiffimmi suliffeqarfinnut itigartitsissutigineqartut nakkutiginissaat takuuk Aatsitassarsiornermut inatsimmi § 18.

  • IBA isumaqatigiissutit

    Siunissami IBA-nik isumaqatigiissusiornernut atatillugu piumasaqaatigut sakkortusartariaqarpagut. Assersuutigalugu kalaallit pigisaat suliffeqarfiit ISO naapertorlugu piginnaasaqalernissaasa akilernissaat qulakkeertariaqarpoq – taamatullu aamma suliffiit sillimanissamut pikkorisartarnissaasa akilertarnissaat qulakkeertariaqarpoq, taakku aamma aatsitassarsiornermi suleqataasinnaaqqullugit. Piumasaqataasariaqarpoq, isumaqatigiissutit IBA-t naammassineqareertarnissaat akuersissummik tunniussisoqartinnagu.

  • Suleriaatsit pitsanngorsarnissaat

    Suleriaatsinut pisariaqartinneqartunut allagartartaarnissamut aqqut naalisarneqassaaq ersarissarneqarlunilu.Kommuneqarfik Sermersuup piginnaanngorsaarusuppoq siunnersortinillu ikiorsiiumalluni, kommunimi suliffiit aqutsinikkut suleriaasaat allagartartaarnissaallu siuarsarumallugit. Pitsaassutsimik aqutsineq ISO 9001 kiisalu avatangiisini aqutsineq ISO 14001 salliutinneqassapput.

  • Piginnaanngorsaaneq

    Sumiiffimmi suliffiit piumassuseqarput aatsitassarsiortunik suleqateqarnissaminnut, pilersuisutulli isumaqatisiissutit malinneqarnissaannut, tuluttut piginnaaneqarnissamut kiisalu teknikkikkut pitsaassutsikkullu pissutsinut allagartaqalernissamut aatsitassarsiorfiit piumasaqaataat malinneqarsinnaaqqullugit angisuumik piginnaanngorsaasoqartariaqarpoq. Pingaaruteqarpoq sumiiffimmi suliffeqarfiit aatsitassarsiornerup iluani naleqartitanut kiisalu akilersuisarnermut paasisimasaqarnissaat.

  • Attaveqaatit – nunaminertanik pisariaqartitsineq

    Uuliasiortut aatsitassarsiortullu atortuineq toqqorsineq inissamik pisariaqartitsivoq – soorlu aamma attaveqaatit pisariaqartinneqartut pigisariaqartut. Kommuneqarfik Sermersuup sulissutigiuarpaa inuussutissarsiutit inissaannik pilersitsinissaq. Kommunip sulissutigaa, Nuummi illoqarfimmi pilersaarusiornermi aatsitassarsiortut uuliasiortullu nunaminertanik ikorfartorneqarnissaat. Tigussaasumik makku immikkoortut suliniarfineqarput:

    • Umiarsualiviup qeqertaani (Qeqertakasinni) umiarsualivimmik ingerlatseqatigiinnit pigineqartumik nutaamik umiarsualiviliortoqarnissaa, siunissami ingerlatseqatigiiffiit nunarsuup sinneraneersut pikkorissunik suleqateqarsinnaaqqullugit, taamaasilluni aamma nunaminertat umiarsualivimmut qanittut aamma oqallisigineqarniassammata.
    • Pilersaarusiornermi nunaminertat lay down areas-it pilersinneqassapput umiarsualivimmut atasunik aammali timmisartunut suluusalinnut mittarfiup avannaatungaani nunap immikkoortortaanut, tamanna pisariaqartitsineq akissaqassuserlu naapertorlugit nunagissarneqartassaaq.
  • Misilittakkanik katersineq

    Suleqatigiilluassagaanni tatigeqatigiittariaqarpoq. Pisariaqarpoq nunat allamiut piinnik suliffeqarfiinik ilisimanngisanik, suleqateqarnissasq. Sumiiffimmi suliffiit aatsitassarsiornerup iluani misilittakkaminnik allisaassapput.

  • Ilisimasanik katersineq

    Immitsinnut ilinniarfigissaagut aamma kangimut kimmullu eqqaamiutta ilisarisimalernissaat puigussanngilarput. Taakku ukiut kingulliit ingerlanerini misilittagaqaleriartornikuupput Kalaallit Nunaanni aatsaat misililikkatsinnik.

SULISARTUT PIGINNAANEQALUARTUT

Suliffeqarneq eqaatsoq pisariaqarpoq, suliassat tunngavigalugit sulisartut ataavartumik naleqqussartassapput kiisalu aaqqissuussinerit allanngortiternerannut annertuunut ukiuni makkunani suliffeqarnermi pisunut. Aaqqissuussaanerup iluani allanngoriartornerit ilaatigut pissuteqarput aalisarnerup piniarnerullu iluini sulisartunik pisariaqartitsiunnaariartorneq, kiisalu aatsitassarsiornerup iluani sulisartunik pisariaqartitsinerup annertusinissaanik isumalluarneq aamma suliffeqarfinnik angisoorsuarmik pilersitsisoqarnissaanut isumalluarneq soorlu aluminiuliorfissuarmik. Tamakku sulisartut nutaanik piginnaasaqalernissaannut, eqqaatsuunissaannut ilinniagaqarnissaannullu piumasaqarput.

Kommuneqarfik Sermersuup anguniarpaa kikkut tamarmik sulisinnaasut suliffeqarnissaat imaluunniit ilinniartuunissaat. Tamanna angusserlugu kommunip inuussutissarsiortut suleqatigissavai qitiusumillu oqartussat. Kommunip makku immikkoortut siuarsaaviginiarpai:

  • Piginnaanngorsaanerit

    Kommuneqarfik Sermersuumi sulisartut aatsitassarsiornerup iluani sulisinnaassapput piginnaaneqarlutillu. Oqaatsitigut piginnaasat, sillimanissamut ilinniarnerit, common core-mi pikkorissarnerit assigisaallu siuarsaavigineqassapput. Kommuneqarfik Sermersuup ilaatigut Aatsitassarsiornermut Pisortaqarfik qanittumik suleqatigissavaa.

  • Inuttut ineriartorneq

    Aatsitassarsiortut isumaqatigiissutinik suliffiullu paarinissaanut piumasaqaataat malinniarlugi Kommuneqarfik Sermersuup sulissutiginiarpaa sulisartut inuttut ineriartornissaat, aatsitassarsiornermi atorfiit nunaqavissunit akisussaassuseqarluartunit inuttaleqqullugit.

  • Sulineq atuisunit ingerlanneqartoq

    Sulisartunik pisariaqartitsinerup aalajangersarneqarnera pissaaq inuussutissarsiortut suleqatigalugit kiisalu ilinniarfiit taamatullu pikkorissaanernik neqerooruteqartartut aamma.

  • Pilerisaarineq

    Aatsitassarsiornerup iluani periarfissat pillugit qaammarsaaneq aallartinneqassaaq. Qaammarsaaneq meeqqat atuarfianni aallartinneqassaaq taamatullu aamma Piareersarfiit suliamut akuutinneqassapput. Aatsitassarsiornermut aatsitassarsiornermilu periarfissat suuneri sapinngisamik annerpaamik siaruarterneqassapput.

NUNGUKKIARTUUTAANNGITSUMIK INERIARTORNEQ

Kommuneqarfik Sermersuup kissaatigaa, kalaallit nunaanni pinngortitami aatsitassarsiornerup nungukkiartuutaanngitsumik pissasoq sapinngisamik annerpaamik issittumi avatangiisit ataqqillugit taamatullu nunaqavissut.

Kalaallit Nunaanni innuttaasut itsarluarli pinngortitaq inuussutigaat. Aalisarneq piniarnerlu suli angisuumik kulturimut ilaapput taamatullu kalaallit inuussutissarsiorneranni. Timmissat, aalisakkat uumasullu erniorfeqarlutillu uninngaartarfeqarput annerpaamik ataqqineqartussanik nunami ammasumi aatsitassarsiorfiliortoqartillugu.

Tamatuma kinguneranik teknologip qajassuussilluarnerpaasinnaasut qinernissaannut annerpaamik akisussaassuseqarnissaq piumasaraa sualummik pilersitsinerup nalaani assartuinermut atatillugu, taamaasiornikkut innarliinerit minnerpaaffianiitinneqarsinnaammata pinngitsoortillugilluunniit. Avantangiisit pinngirtitallu eriagisariaqarneri pissutigalugit aatsitassarsiornerit ataasiakkaat piviusungortinneqanngitsoorsinnaapput.

Aatsitassarsiornissamut suliniutit suliarinerini akuerineqarnerinilu kommunip anguniartassavaa annertuumik ammasumik pissuseqartoqartarnissaa sumiiffimmilu innuttaasut akuutittarnissaat taamatullu sumiiffimmi ilisimasat atorluarneqartarnissaat.

Kommuneqarfik Sermersuup kissaatigaa, misissueqqaarnermi aatsitassarsiornermilu mingutsitsinerup killilersornissaanut akuutissallu ulorianartut eqitertanngnnissaannut oqartussat sakkortuumik piumasaqartassasut.

Kalaallit Nunaata nunarsuarmi silaannaap pissusaata allanngoriartornerata kinguneri sakkortuumik malugai taamaattumik kissaatigaa sapinngisamik mingutsitsinerup minnerpaaffimmiitinnissaa. Taamaattumik aatsitassarsiornermi sapinngisamik teknologip mingutsitsinnginnerpaap nukimmillu atuinikinnerpaap atorneqarnissaa anguniarneqartassaaq, silaannarmut mingutsitsineq minnerpaaffianiitinniarlugu.

Kommunimi aatsitassarsiornikkut ingerlatat ataasiakkaat nalilersorneranni, Kommuneqarfik Sermersuup aalajangiusimaniarpai aatsitassarsiornermi inatsimmi tunngaviit avatangiisinut innarliinngitsunik teknologinik atuisoqarnissaanut tunngasut kiisalu avatangiisinik, pinngortitamik inuillu peqqinnissaannik sakkortuumik illersuinissamut tunngasut.

Aatsitassat pillugit pilersaarut uani aasinnaavat.

Quppernerup imarisaa qanganitsersimava?

Quppernermut naqqiutissaqarpit?