Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00 - 15:00
  2. sis. 12:00 - 17:00
  3. tall. 10:00 - 12:00

Asasarput Kommunalbestyrelsimut ilaasortaq, Justus Hansen

Siullermik apeqqutigisannut qujanarujussuaq.

Decembarip qulingiluaani 2019-imi allaffeqarfimmut apeqquteqarputit "Naluttarfik Malimmi marlunngornikkut sisamanngornikkullu ullaakkut naluttarnerup matuneqarnera". Apeqqutitit makkuusut Kiffartuussivimmit tiguneqarput:

  1. Sooruna marlunngornikkut sisamanngornikkullu ullaakkut naluttarneq matuneqartoq?
  2. Sipaarniarnermik peqquteqanngippat, ulluni taakkunani pineqartuni nalukkiarniarutta, taava sooq ullaakkut sulisumik ataatsimik marlunnilluunniit siusinnerusukkut eqqiaatitsisoqarneq ajorpa?

Apeqqutigisannut tunngavilersuutigaatit, ullaakkut naluttarneq matuneqarsimasoq piffissami tassani eqqiaasoqartarnera pissutigalugu. Allalli oqarput, sipaartoqarnissaa pissutaasoq. Amerlasuut ullaakkut naluttarfimmik atuisarput, inuit ulloq naallugu anniaateqarpallannginniassammata. Pingaartumik eqqarsaatigigaanni peqqinnissaqarfik qanoq artukkerneqareertigisoq, taamaattumik sipaarfissatut/eqqqiaanerlu pissutigalugu kukkusumik iliuuseqarneruvoq.


Administrationens svar

Asasara Justus,

Saaffiginnissutinnut qujanaq.

1. Sooruna marlunngornikkut sisamanngornikkullu ullaakkut naluttarneq matuneqartoq?

Naluttarfimmik atuisut amerliartorput. Kisitsisit naapertorlugit 2018-imi Malimmut nalukkiartartut 136.000-iusimapput, taavalu 2017-imi nalukkiartartut 100.000-it missaannissimallutik, tassa imaappoq ukiup ataatsip ingerlanerani 36.000-inik amerlisimallutik. Tamatuma kingunerisaanik Dronning Ingridip Napparsimmavissuani naluttarfiit imaannik misissuisoqarnerani, bakteriat amerliartortut uuttorneqarsimammat, pingaaruteqarpoq naluttarfimmi pH-værdi pillugu piumasaqaatip malinneqarnissaa.

Naluttarfik Malimmi bakteriat amerliartornerat allatigut annikillisarniarneqarsimavoq, ammasarfiit kalluanngikkaluarlugit, tamannali iluatsippallaarsimanngilaq. Misilittakkat naapertorlugit naluttarfimmi erngup ullaakkut salittarnera pitsaanerpaajusarpoq, minguk tamarmi naqqannikkaangat. Imermillu nillertumik salinneqartarmat, naluttarfiit tamatuma kingornagut kissassaqqinneqartussaapput, taamaattumillu akunnerit marluk tassunga atugassanngortinneqarlutik. pH-værdi qaffasippallaaraangat, nalukkiartut merianngulernissaat naarlulernissaallu aarlerinarnerulersarpoq.

Allanngortitsinerup kingorna ullaakkut naqqa milluarneqartalermat, erngup pH-værdia   pitsanngoriaateqartoq paasinarsivoq, akuutissanik arrortinneqarsinnaanngitsunik atuinermik annikillisitsissutaasumik. Taamaalilluni klorimik atuineq, klorimullu attuumassutilinnik pilertoqartanera annikinnerulerpoq.


2. Sipaarniarnermik peqquteqanngippat, ulluni taakkunani pineqartuni nalukkiarniarutta, taava sooq ullaakkut sulisumik ataatsimik marlunnilluunniit siusinnerusukkut eqqiaatitsisoqarneq ajorpa?

Piffissat suliffissat allannguinermut peqqutaapput, sipaarniarnerunngitsoq: meeqqat meeqqerivinniittartut maanna sapaatip akunnerata ingerlanerani nalukkiarsinnaanngorput. Imaappoq, naluttarfimmi sillimaniarnerup qulakkeerneqarnissaanut amerlanerusut sulisorineqartariaqarput, tassalu ulluinnarni marluusaraluartut maannakkut nalunnermik sungiusaasartut pingasut sulisorineqartalerput. Sulisut piffissaq suliffigisartagaat sivitsorneqanngilaq, taamaallaat piffissat suliffiusartut allanngortinneqarput. Taamaattumik ammasarfiit allanngortinneqarneri sipaarniarnermik peqquteqanngillat.

Kommuneqarfik Sermersooq, pisortat suliffeqarfiutaatut, isumaqatigiissutinik malinnittussaatitaavoq, pingaartumik naluttarfimmi sulisut tamarmik akunnerni 40-ni sulisussaatillugit. Taannartaa pillugu immikkoortortat arlallit ukiuni arlalinni sulissutigisimavaat, sulisut, sulisitsisut innuttaasullu pitsaanerpaanik atugassaqartinnissaat eqqarsaatigalugu. Imaappoq sorpassuit ataqatigiissinniarlugit iluatsinniagassaasimapput.

Naggasiullugu, naluttarfiup ulluinnarni ingerlanneqarnera pillugu, naluttarfimmik atuisut siunnersuisoqatigiivisa atuuffiat pillugu pitsaanerusumik paasissutissiisoqartarnissaa ingerlatsiviup naluttarfiullu sulissutigivaat. Atuisut siunnersuisoqatigiivi ukiut tamaasa akunnerit agguataarneqarnissaannik ammasarfiillu pillugit innersuussuteqartarput, taakkulu politikkikkut oqaluuserisassanngortinneqartarput.

Inussiarnersumik inuulluaqqusillunga

Helene Broberg Berthelsen

Meeqqanut Atuarfeqarnermullu Ingerlatsivimmi pisortaq 

Kommuneqarfik Sermersooq