Suliffeqarfimmi Kiffartuussineq

Utoqqaat nammineq angerlarsimaffimminnik eqqiaanikkut ikiorneqartarnerat.

Laura Taunâjik Uitsatikitseq

Utoqqaat timikkut pisinnaasaat annikilliartortillugit aamma napparsimatillugit ikiorneqartartussaanerat kommunep isumagissallugu pisussaaffigaa. Utoqqaq angerlarsimaffimmini kisimiippallaaruni puigortunngornissamut qanissinnaalertarpoq. Pisinnaasaasalu killeqarneri pillugit naapertuuttumik ikiorneqartartussaavoq.

Kinaluunniit nunatsinni utoqqaq ukiorpassuarni nunatta iluani sulisimasoq naapertuuttumik sullinneqartariaqarpoq. Taamaattumik paaserusunnarpoq najoqqutassat eqqortut, malittarisassallu naapertuuttut qanoq isillugit taakkununnga atuutsinneqarsinnaappat. Kommunep iluani maalaarnissamik apuussisoqaraluraangat pitsanngorssaataasunik kiap utertivigissavai? Aaqqissuussinerlu qanoq iliornikkut naleqqussarlugulu utoqqarnut tulluarsarneqarsinnaava? Ilanngullugu paaserusunnarpoq pitsanngorsaanissamik imaluunniit sivisunerusumik ikiorneqarsinnaanerannik (en time-mik ilaqqillugu) aningaasatigut tamanna qanoq Kommuneqarfik Sermersuumut naleqassava?

SK

The administration's answer

Utoqqarnut eqqiaassussisarneq pillugu apeqqutinut assigiinngitsunut qujanaq. Aallaqqaasiullugu naatsumik erseqqissaatigineqassaaq, eqqiaassunneqarneq sulissarpassuit innersuussiffiusinnaasut ilagiinnarmassuk.

Kommunimi utoqqarnut tunngatillugu utoqqaat pillugit immikkoortumut politikki politikkikkut akuersissutigineqarnikuuvoq, taannalu aallaavigalugu suliffeqarfimmi tamani sulisoqarpoq. Imaappoq, suliassamik allaaserinninnerit najoqqutassaliunneqartut tassaapput ataavartumik ineriartortitassat ukiullu tamaasa politikkikkut akuersissutigineqartartussat.

Angerlarsimaffimmi ikiorteqarnissamut ilaatigut eqqiaassunneqartarnissamut innersuussinermi, suliamut allaaserinninnerit kommunalbestyrelsimit akuersissutigineqarsimasut, piginnaanngorsaaqqinnissamut tunngatillugu “imminut ikiorsinnaalernissamut ikiuineq” aammalu “ikiorserneqalinnginnermi sungiusarneq” pillugit suliniutit naapertorlugit suliassamut innersuussisoqartarpoq.

Innutaasut ataasiakkaarlutik ikiorserneqarnissaminnut innersuunneqartarput, maannakkorpiarlu piginnaasaat aallaavigalugit tamanna pisussaavoq. Taamaattumik innuttaasup aalajangersimasunik ukioqalersimanera, taamaattumillu eqqiaassunneqartariaqalersimanera kisimi apeqqutaaneq ajorpoq.

Tamanna tunngavigalugu innuttaasut ilaat ass. ilaannakortumik eqqiaassunneqarnissamut innersuunneqartarput. Aamma ilaatigut imaattarpoq, angerlarsimaffimmi ikiorti peqatigalugu innuttaasoq eqqiaanermi peqataatinneqartarpoq, taamaasilluni innuttaasoq naammagisimaarinnilertarpoq, allanillu peqateqarluni iliuuseqarnissaminik nuannarinnilersarluni. “Ikiorserneqalinnginnermi sungiusarneq” pillugu periusissiami pingaaruteqarpoq innuttaasut namminneq inuunerminni peqataatinneqarnissaannut sakkussaannik tuninissaat, taamaasillutillu namminneq inuunerminnik akisussaaffeqartinnissaat, nammineersinnaassusaat innarlerneqartussaannginnerallu pigitiinnarlugit.

Innuttaasut angerlarsimaffimmi ikiorti takkukkaangat angerlarsimaffimminni pulaartoqartut, tamatigut eqqiaassunneqarnissaminnik neqeroorfigineqartarput, naak pulaartoqaraluartut. Taamaattoqartillugu innuttaasumut isumaqatigiissutigineqaannassaaq ini sorleq ikiortip eqqiarlugu aallartissaneraa, taamaasilluni innuttaasoq/qanigisarlu “iniminnik paarlaatiinnassapput”, innersuussineq naapertorlugu eqqiaaneq ingerlanneqarniassammat. Ilaanneeriarluni angerlarsimaffimmi ikiortinit misigineqartarpoq, innuttaasoq pulaartoqartilluni ikiorneqarnissaraluaminik taamaatitsiinnarnera.

Innuttaasup angerlarsimaffiani ullormi eqqiaaffiusussami eqqiaanissaq innuttaasumit imaluunniit angerlarsimaffimmi ikiortimit taamaatiinnarneqartillugu, ulloq alla aqaguani eqqiaasoqarnissaa neqeroorutigineqartarpoq, imaluunniit sivikinnerpaamik sapaatip akunnerata iluani.

Angerlarsimaffimmi ikiorteqartitsinermi pulaartarnissamut aalajangersimasumik piffissaqartitsisoqanngilaq, imaluunniit innuttaasup sullinneqarnissaanut innersuussinerit aalajangersimasumik piffissaligaanngillat. Taamaattumik angerlarsimaffimmi ikiorti akunneq ataaseq qaangiutinngitsoq anisimappat, tamanna innuttaasup angerlarsimaffiani suliassatut innersuussutigineqartumik naammassisaqareernermik peqquteqarsinnaavoq.

Angerlarsimaffimmi ikiorti pequtinik oqimaatsunik imaluunniit sinittarfimmi eqqiaaniaruni pequtinik imaarsinissamut pisussaatitaanngilaq.

Naammagittaalliutinut tunngatillugu, suliassat sapinngisamik sungiussisimasutut suliarinissaannut suliffitsinni pisussaavugut, aammalu naammagittaalliutigineqartoq apeqqutaatillugu, suliassaqarfimmut pineqartumut, naammagittaalliutigineqartumik naleqqunnerpaamik eqqornerpaamillu akissuteqarsinnaasumut ingerlateqqinneqartarpoq. Naammagittaalliutigineqartoq utoqqarnik sullissinermut tunngasuuppat, nalinginnaasumik fagchef Birtha Bianco imaluunniit fagchef Lise Lotte Have ingerlatitseqqiffiusarput. Naammagittaalliummik nassiussisoqarniaruni qarasaasiakkut allaffissaq una pisortatigoortoq atorneqarsinnaavoq: Isumaginninnermut Sulliffeqarnermut Inuutissarsiornermullu Ingerlatsivik: isi@sermersooq.gl

Inuit sullitarigatsigit, suliassat pilertortumik eqiingasumillu ataavartumik ingerlanneqartarput. Taamaattumik innuttaasoq qaammatit marluk matuma siornagut sullinneqarnissamik innersuunneqarsimappat, sullissineq tamanna ataavartumik nalilersuiffigineqartarpoq, ilaatigut paasiniarlugu piffissap ingerlanerani innuttaasup suliassat ilaat nammineerluni ingerlassinnaanngussanerai. Innuttaasut ilaat ima pikkoritsigilersarput, allaat angerlarsimaffimminni ikiorteqartarunnaarsinnaallutik, ulluinnarnilu namminneerlutik suliassaminnik suliaqaqqilersinnaasarlutik.

Nassuiaat una suliarineqarpoq utoqqarnut immikkoortumut pilersaarut suliamillu allaaserinninnerit angerlarsimaffimmi ikiorteqarnermi najoqqutarinerisigut suliatigut naliliineq tunngavigalugu. Suliffeqarfiuvugut angisooq amerlasoorsuarnik suleqateqartut, ullut tamaasa innuttaasut erseqqissumik tunngaveqartumik ikiorserneqarnissaannut, ataasiakkaarlutillu innersuussiffigineqarneri naapertorlugit siunnerfilimmik suliaqartunik.

Pitsanngorsaatissatut suliniutit nutaat politikkikkut suleqatigiinnissamik nutaamik isumaqatigiissuteqartoqarneratigut aalajangerneqarpoq, ulloq unnuarlu angerlarsimaffimmi ikiorteqartitsisoqartalissasoq, tamannalu angerlarsimaffimmi ikiorteqartitsisarnerup iluani suliassaavoq annertooq. Tassunga tunngatillugu ataatsimiititap aggustip ataatsimiinnissaanut suliassamik saqqummiussissummik suliaqartoqareerpoq. Ulloq unnuarlu angerlarsimaffimmi ikiorteqartitsisalernissamut tunngatillugu ukiumut 2.5 mio koruuninik naleqarnissaa ingerlatsiviup nalilerpaa. Tassunga ilanngullugu ukiumoortumik aningaasartuutigineqartussatut ilimagisat innuttaasut katitigaanerisa nikerarneri najoqqutaralugit amerliartornissaat naatsorsuutigineqassaaq.

Annertunerusumik paasisaqarnissaq kissaatigigukku saaffiginninnissannut tamatigut tikilluaqqusaavutit.

Inussiarnersumik inuulluaqqusilluta

Birtha Bianco                                                                       Grethe H Nielsen

Utoqqarnik sullissivimmi Fagchef, juuli 2017              Pisortaq