Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00 - 15:00
  2. sis. 12:00 - 17:00
  3. tall. 10:00 - 12:00

Asasarput Kommunalbestyrelsimi ilaasortaq, Michael Rosing

Siullermik apeqqutigisannut qujanarujussuaq.

Ulloq 25 januaari 2019 "Aputaajaasarneq" pillugu allaffeqarfitsinnut apeqquteqaateqarputit. Apeqqutitit makkuusut Suliffeqarfimmut Kiffartuussivimmit tiguneqarput:

  1. Aputaajaaffigineqartut tulleriiaarneqarnerat tulleriiaarinermut attuumassuteqarpa imaluunniit aputaajaasup aalajangissavaa tulleriiaarinerup qanoq ingerlanneqarnissaa?
  2. Taamaassimappat, taanna tulleriiaarinissaq qanoq suliarineqartarpa?
  3. Biilit angallattut, pisuinnaat aamma sikkilertut qanoq ilillugit tulleriiaarneqartarpat?
  4. Angallanneq uuttortaavigineqarnikuua, pisuinnaat ilaatillugit aamma taanna tulleriiaarinermut atatillugu atorneqarsinnaava?
  5. Saaffissaqarpa, innuttaasut allatut tulleriiaarinissamut siunnersuutissallit saaffigisinnaasaannik?

Apeqqutinnut tassunga tunngavilersuutigivat, assersuutigalugu Ole Brandtip aqqutaani Nuussuarmi najugaqaraanni, illoqarfiullu imaluunniit Ilimmarfiup tungaanut pisunniaraanni, paasilertorneqarsinnaasoq pisuinnarnut aqqut suliassani salliunneqarneq ajortoq. Mannguaniit Industrivejimut aqqusineeraq tamaani aqqusineeqqani aputaajarneqartuni siulliunneqartarpoq. Aajunalu ajornartorsiut alla, ullaakkut angallaffiunerpaaffiani sullorsuup ikaarniartarnera, taannali ajornartorsiut piffissami allami sammissavarput.

Nuussuarmi aqqut, Mannguata aamma Pisiffiup akornanniittoq, assersuutissatsialaavoq alla. Silissutsini tamaat, aqqusineeraq kangiatigoortoq ilanngullugu, aputaajarneqartarpoq, tamannalumi ajunngilaq. Pisuinnaalli eqqarsaatigalugit aqqusineeraq/sikkilinullu aqqut kitaatigoortoq atussallugu isumannaannerugaluarpoq, aqqusinermit kussinertalimmit immikkoortoqarami, taamaattumillu aportinnissaq annikinneruvoq kangiatigoortumut sanilliullugu.

Kujataatungaaniit Ilimmarfiup tungaanut pisukkaanni pisuinnartut periarfissaqarneruvoq. Mittarfimmut aqqut, aqqutaatigoorlugu, malinneqarsinnaavoq imaluunniit ungaqqullugu aqqusineeraq atuarneqarsinnaavoq. Aqqusineeraq aamma Manguaqqamiit aqqutigineqarsinnaavoq (kangiatigut), taamatullu uiarterneqarsinnaavoq aqquserngup tungaanut. Tamannali aqqusineeraq aputaajarneqarneq ajorpoq. Massakkut 1 meteri angullugu portutigisumik aputeqarpoq. Taamaattoqarnera pisuinnarnut aqqusinernik pingaartitsinnginnermik ersersitsisutut paasineqarsinnaavoq, imaluunniit angallanneq allanngorsimavoq aputaajaasarneq malinnaatinneqarani. Imaluunniit pisuinnaat biilertulluunniit qanoq isummerfigineqassanersut isummertoqanngisaannarsimanerpa.


Administrationens svar

Sanarfinermut Avatangiisinullu Ingerlatsivik ima akissuteqarpoq:

Asasarput Michael,

Saaffiginnissutinnut qujanaq.

Ukiuunerani sullissinermi pingaarnertut anguniarneqarpoq biilinut aqquserngit aqqusineeqqallu isumannaatsuunissaasa allanut annerusumik akornutaanatik qulakkeerneqarnissaat. Aputaajaasarnermi tulleriiaarisarneq pingaarnertut pingaarnersiuineq tunngavigalugu pisarpoq

1 - 3.

Aputaajaaneq aqquserngit A, B aamma C-uneri malillugit tulleriiaarneqartarput.

Pingaarnersiuineq A. Aqquserngit pingaarnerit, ataatsimoortumik angallannermut annaassiniarnerullu ingerlanneqarnissaanut aalajangiisuusut. Aqquserngit taamatut ittut nalinginnaasumik ulluinnarni nal. 04.00-imiit nal. 24.00-ip tungaanut aputaajarneqartarput, taamaattorli aperujussuarnera perserneraluunniit apeqqutaatillugu ulloq unnuarlu aputaajaasoqartarpoq.

.... Aqquserngit pingaarnersiuinermi A-tut nalunaaqutaqartinneqartut ullut tamaasa angallaffigineqarsinnaajuartussaapput. Aqquserngit A-tut nalunaaqutserneqartut assersuutigalugu tassaapput: Aqqusinersuaq, Mestervej, H.J Rinksvej, Gertrud Rasksvej, Nuussuaq, Eqalugalinnguit, Borgmester Anniitap Aqq, Qarsoq, Unaaq allallu.

Pingaarnersiuineq B. Aqquserngit appakaaffiusut, aqquserngit aqqusinernut allanut ingerlaqqittut, aqqusineeqqat pingaarnerit, bussit unittarfii. Aputaajaaneq nalinginnaasumik ulluinnarni nal. 04.00-ip aamma nal. 23.00-ip tungaanut pisarpoq, taamaattorli nittaalarujussuartillugu persertilluguluunniit nal. 24.00-ip tungaanut.

Aqquserngit pingaarnersiuinermi B-miittut ullut tamaasa nal. 05.30-miit nal. 24.00-ip akornanni ingerlaffigineqarsinnaasassapput. Aqquserngit B-tut nalunaaqutserneqartut assersuutigalugu tassapput: Børnehjemsvej, C.E Janssensvej, Inspektørbakken, Nuuk Imerup tungaanut sapusiaq, Industrivej, Nigerleq, Manngua, Asiarpak, Igimaq allallu.

Pingaarnersiuineq C. Aqquserngit allat, aqqusineeqqat, pisortallu biilinut uninngasarfiutaat, pisortallu suliffeqarfiini biilinut uninngasarfiit. Ulluinnarni aputaajaasarneq nalinginnaasumik nal. 05.30-imiit nal. 22.00-ip tungaanut pisarpoq.

Aqquserngit C-tut nalunaaqutserneqartut, sapaatip akunnerani ullut tamaasa nal. 6.30-miit 22.00 akornanni ingerlaffigineqarsinnaasassapput. Bussit unittarfii, bussinut utaqqisarfiit aamma pisuinnarnut aqqutissat aqqusinermut taakkununnga atasunut atatillugit aputaajarneqartassapput. Pisuinnarnut aqqutit/ikaartarfiit aqqusineeqqanut/aqquserngup sinaaniittut aputaajarneqarnerinut atatillugit aputaajarneqartassapput.

Pisiniarfiit, suliffeqarfiit biilinut uninngasarfii kiisalu inissiat eqqaanni biilinut uninngasarfiup tungaanut aqqutit ullaakkut angallannerup aallartinnginnerani aputaajarneqarsimasassapput, tassa imaappoq nal. 07.00 nallertinnagu.

Inissiaqarfiit eqqaanni biilinut uninngasarfiit kingusinnerpaamik nal. 12.00 aputaajarneqareersimasassapput.

  1. Pisuinnaat ilanngunneqarlutik angallanneq uuttortaavigineqarnikuua, taannalu aputaajagassat tulleriiaaneqarnerinut atorneqarsinnaava?

Akuttunngitsumik angallannermit naatsorsuisoqartarpoq. Kisitsisit angallannerup pingaarnertut pilersaarusiorfigineqarnerani, massakkut ingerlanneqartumi, tunngaviliisuusarput.  Aputaajaasarnerup suliariumannittussarsiuunneqarnissaani tullermi angallanneq pillugu pilersaarut taamaalilluni tunngavigineqassaaq. Quppernerup tulliani skema takuuk

  1. Saaffiginniffissaqarpa, innuttaasut allatut pingaarnersiuisoqarsinnaanera pillugu siunnersuutiminnik saaffiginniffigisinnaasaannik?

Saaffiginnissutit suulluunniit tikilluaqquneqarput, SAI Driftimut aamma Avatangiiseq pillugu immikkoortoqarfimmut ingerlateqqinneqarsinnaapput, Kuussuaq 2 3900 Nuuk, imaluunniit mail-imut uunga nassiunneqarsinnaapput sai@sermersooq.gl

Inussiarnersumik inuulluaqqusillunga

Hans Henrik Winther Johansen

Sanarfinermut Avatangiisinullu Ingerlatsivimmi pisortaq

Kommuneqarfik Sermersooq