Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00 - 15:00
  2. sis. 12:00 - 17:00
  3. tall. 10:00 - 12:00

Asasara Kommunalbestyrelsimi ilaasortaq, Laura Taunâjik.

Siullermik qujanaq apeqqutinnut.

Februaarip ulluisa 12, 2019 allatseqarfimmut apeqqummik nassitsivutit una pillugu”Kommuneqarfik Sermersuup ataani spædbarnsterapitut modulikkaartumik ilinniarneq.” Meeqqanut Ilaqutariinnullu Ingerlatsiviup apeqqut tiguaa imaattoq:

1. Tasiilami familieCenterimi sulisut piginnaasamikkut qaffassarusunnerat innuttaasunut sullinniakkanut pingaaruteqarlunilu avaqqukkuminaatsuuvoq, taamaappat sooq assersuutigalugu spædbarnsterapitut ilinniarumalluni qinnuteqarnerit akissaqartinneqaratillu itigartitsissutigineqaannarsinnaappat?

2. Imminut akilersinnaasumik familieCenterimi sulisut aalajaatsut ineriartorusunnerat Kommuneqarfik Sermersuup qanoq tapersersortigivaat tunuliaqutserlugulu?

3. Suna tunngaviua itigartitsinermut? Angallanneq? Inissaq? Ilinniakkalluunniit ataatsimut akia?

4. Ukiumut modulikkaartumik ilinniagaqarnermut qinnuteqarniarluni aningaasat qanoq annertutigisut killigitinneqarpat?

Apeqqutigisat tunngaveqarpoq Tasiilami Familiecenterimi sulisut aalajaatsuunerat tunniusimanerallu Ineriartorusupput tunniussaqarusullutillu. Innuttaasut pisariaqartitsinerat aallaavigalugu naleqqussakkamik sulinerat ingerlanneqarpoq. Tasiilami familieCenterimi sulisut aalaakkaasumik ingerlalluaraluartut taamaattoq psykolog-mik imaluunniit psykoterapeut-mik amigaateqarneq pissarsiniarnerlu ilungersunarsimavoq. Taamaattumik pisariaqartitsineq aallaavigalugu naleqqusaaniarneq arlalitsigut unammillernarsinnaasarsimalluni. Tamannarpiaq peqqutaalluni sulisut ilaat spædbarnsterapinut ilinniarumasimavoq, itigartinneqarsimavoq akissaqannginnerlu tunngavilersuutigineqarsimalluni.

Sulisut arlaqaraluaqalutik taamaattoq oqariartuutigineqarpoq familievejlerit/behandlerit Tasiilami familiecenterimi amigarpallaarujussuartut. Taamaattumik angumerisinnaasat naammassisinnaasallu killeqarsinnaasartut. Pisariaqartitsineq illoqarfiup iluani annertuvoq, taamaattumik nunaqavissut namminneq oqaatsitik aallaavigalugit qanimut innuttaasunik ikiuniarnerat tulluarnerpaallunilu naleqqunnerpaasarsimavoq. Piginnaasat annertusarneqarnissaat taamatullu ineriartuutaasunik iluaqutaasinnaasunillu sakkussanik pissarsinissaq siunertaralugu spædbarnsterapi-mik ilinniagaqarusunneq tunuarsimaarfigineqarnissaa inissaminiinngilaq. Siunissami aggersumi sumiiffimmi pisariaqartitsineq aallaavigalugu imminut akilersinnaassuseq tassaniittussaammat.


Administrationens svar

Asasara Laura

Apeqqutigisannut qujanaq. Siullermik erseqqissaatigissavara sulisut piginnaaniminnik ineriartortinnissaat pillugit aqutsisut akisussaaffigimmassuk tassa imaappoq, pikkorissarnerit ilinniaqqinnerillu sulisup qaninnertut aqutsisuanit aalajangerneqartarmat. Piginnaanerit ineriartortinneqarnissaasa saniatigut aqutsisup suliassat naammassineqarnissaat qulakkeertussaavai taamaattumillu sulisut akornanni piginnaasat qaffassarnissaat pillugit pingaarnersiorlunilu kisiannili aamma suliassat naammassineqarnissaat akisussaaffigai. Kommuneqarfik Sermersooq ilinniaqqinnernut piginnaanernullu qaffassarnernut aningaasanik atuisarpoq politikkikkut pingaarnersiuineq ilutigalu.

Apeqqut 1 pillugu) Suliat ataasiakkaat oqaaseqarfigisinnaanngilakka kisianni paasissutigisinnaavara pisortaqatigiit nalilersuisarput aamma suliassat pingaarnerit nalilersorneqartarput kiisalu susassaqarfimmi massakkut pisuni suna pingaartinneqarnerussanersoq nalilersuisoqartarluni. Sulisoq qinnuteqaatiminik itigartinneqarsimalluni naammagittaalliutigissaguniuk sulisup qaninnertut aqutsisuni saaffigissavaa kiisalu suli suliaq naammaginanngippat taassuma qaninnertut aqutsisumi aqutsisua saaffigisinnaavaa. Kisiannili erseqqissaatigissavara kommune killilinnik aningaasaateqarmat taamaattumik aqutsisut tamarmik immikkut naliliisariaqartarput suut qaqugukkullu pikkorissartitsinerit ilinniaqqinnerillu ingerlanneqassanersut aamma suliamut sorlermut tunngasuussanersut. Imaanngilaq pikkorissarnerit ilinniaqqinnerillu imaaliallaannaq ingerlanneqarsinnaasut.

Apeqqut 2 pillugu) Kommune ukiumut pikkorissartitsinissanut katillugit 5,5 mio koruunit missaanni akissaateqartitsivoq. Akissaatit amerlanersaat sulisut tamarmik, aqutsisumit qaninnermit akuerineqartumik, namminersornerullutik oqartussat suleqatigalugit qinnuteqarsinnaapput aamma qinnuteqarfissat intranetsimi nassaarineqarsinnaapput. Taakku saniatigut kommunip aqutsisui 70-80 missaanniittut akissaateqartinneqarput pisortaqatigiit peqatigalugit atorsinnaasaminnik.

Apeqqut 3 pillugu) Aqutsisup qaninnerup akisinnaassavaatit.

Apeqqut 4) Aqutsisup qaninnerup akisinnaassavaatit.

Inussiarnersumik inuulluaqqusillunga

Martha Lund Olsen
Meeqqanut Ilaqutariinnullu Ingerlatsivimmi pisortaq
Kommuneqarfik Sermersooq