Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00-15:00
  2. sis. 12:00-17:00
  3. tall. 10:00-12:00

Tasiilami angerlarsimaffeqanngitsutut nalunaarsorsimasut inissiaaqqanik angerlarsimaffittut adresseqarfigisinnaasaminnik Kommuneqarfik Sermersooq immikkut aaqqissuussinissamik pilersaaruteqarnerluni?

Maannamut adresseqaratik angerlarsimaffeqanngitsutullu nalunaarsorsimasut Tasiilami allaqarunartut immikkut paasisaqarfiginissaat soqutiginarluinnarpoq. Ilaatigut angerlarsimaffeqannginneq peqqutaalluni ikiorneqarsinnaanermut aporfiit arlalitsigut inunnut ajornartorsiortitsilernermik kinguneqartarneri takornartaajunnaarsimapput. Inuttullu naleqassuseq pingaarnerujunnaartutut itsillugu inuttut unittooqqajaaneq allatullu inuunerlunnermik nassataqartarpoq. Angerlarsimaffeqannginnerup kingunerluutigisartagai ersiutaasut annermik tassaakkajupput imigassamik atuilernerujussuaq, allatullu ikiortissaaruttutut misiginermi imigassamik atornerlueqataalertarneq avaqqukkuminaallisarsimanera innutaasunik apuunneqartarpoq.

Tasiilami angerlarsimaffeqaratik adresseqanngitsut pillugit Kommuneqarfik Sermersooq qanoq pilersaaruteqarsimanera tusassallugu soqutiginarpoq. Taamaattumik apeqqutit ukua akineqarsinnaanissaat kissaatiginaraluaqaaq.

  1. Tasiilami angerlarsimaffeqanngittutut adresseqanngittutullu nalunaarsorsimasut 18-leereersimasut qassiuppat?
  2. Kommuneqarfik Sermersooq Nuummitulli ittumik Tasiilami ineerannguanik najugarineqarsinnaasunik pilersitsiortornissamik pilersaaruteqarpa?
  3. Inuit 18-leereersimasut angerlarsimaffeqanngitsulli containereeqqanik angerlarsimaffittut atorsinnaasaannik Kommuneqarfik Sermersooq pilersaarusiorsinnaanermik anguniagaqanngila?

Malunnarmat ilaqartoqarpoq iluamik ingerlalluartumillu inuulerusukkaluartunik angerlarsimaffeqannginnerli aporfiulluni siumut alloriarneq ajuleqqasunik. Inunnik taamak atugalilnnik sulilertoqartaraluarpoq taamaattoq angerlarsimaffeqannginnerup kingunerisartagai ilisarnaatit alloriaqqinniaraluarnermut aporfinngortarsimapput. Inuttut naleqassuseq namminiussuserlu alloriarnermik annertuumik pilersitsisarput nalunagu angerlarfissaqarnermi. Taamaattumik qulaani apeqquteqaatigisakka pillugit neriuppunga akineqarsinnaajumaarlunga.


Administrationens svar

Tasiilami angerlarsimaffeqanngitsutut nalunaarsorsimasut inissiaaqqanik angerlarsimaffittut adresseqarfigisinnaasaminnik Kommuneqarfik Sermersooq immikkut aaqqissuussinissamik pilersaaruteqarnerluni?

Asasara Kommunalbestyrelsimi ilaasortaq, Laura Taúnâjik.

Siullermik apeqqutigisannut qujanarujussuaq.

Ulloq 27 oktobari 2018 Tasiilami angerlarsimaffeqanngitsut pillugu allaffeqarfimmut apeqquteqaateqarputit.

Apeqquteqaateqarninnut toqqammavigivat Tasiilami angerlarsimaffeqanngitsut ataatsimut najukkamittut nalunaaruteqarsinnaanersut.

Isumaginninnermut Suliffeqarnermullu Ingerlatsiviup Tasiilami angerlarsimaffeqanngitsut pillugit apeqqut tiguaa. taannalu ima oqaasertaqarpoq:

Siunertaq:

  1. Tasiilami angerlarsimaffeqanngitsutut adresseqanngitsutullu nalunaarsorsimasut 18-leereersimasut qassiuppat?

Innuttaasut 92-it Tasiilami inuit allattorsimaffianni najukkaminnik nalunaaruteqarsimanngillat. Tasiilap nunaqarfiini innuttaasut tamarmik inuit allattorsimaffiannut najukkatik nalunaarutigisimavaat.

Innuttaasut taakkua najukkaminnik nalunaaruteqarsimanngitsunit 92-nit tallimat angerlarsimaffeqanngitsutut inuusut paasitinneqarpunga. Innuttaasunit taakkunannga 92-nit inuit arfineq-marluk 22-t inorlugit ukioqarput.

  1. Kommuneqarfik Sermersooq Nuummitulli ittumik Tasiilami ineerannguanik najugarineqarsinnaasunik pilersitsiortornissamik pilersaaruteqarpa?

Tasilaami 2019-imut angerlarsimaffeqanngitsunut unnuisarfiliortoqarnissaanik pilersaartoqanngilaq. Tasiilami Oqartussaqarfimmiit innuttaasut inuit allattorsimaffianni najukkaminnik nalunaaruteqarsimanngitsut ataavartumik oqaloqatigineqartarput.

Innuttaasut ilaat inuttut ajornartorsiuteqarneq pissutigalugu namminneq najugaqarnikuunngillat. Siusinaartumik pensionisiallit marluk Oqartussaaffeqarfimmut oqaloqatiginnikkiartoqqullugit aggersarneqarsimapput, kingornagullu naleqquttunik unnuiffissarsissunneqarnissamut naleqquttutut nalilerneqarsimallutik. Innuttaasunut marlunnut, utoqqalinersiaqartunut aammalu Inissianut Utoqqarnut naleqquttunut initaarnissaminnik allatsissimasunut, naleqquttunik periarfissaqarnersoq misissorneqassaaq. Innuttaasoq ataaseq majuartarfeqarfinni assigisaannilu unnuisarpoq, imaluunniit illoqarfimmi unnuiffiusinnaasunik ujartuisarluni. Innuttaasoq taanna iliuusissamik pilersaarusiorfiginissaanut aggersarneqarpoq, innuttaasup Inissiaatileqatigiiffik Iserit A/S--imut initaarniarluni allatsinnissaa eqqarsaatigalugu.

  1. Inuit 18-leereersimasut angerlarsimaffeqanngitsulli containereeqqanik angerlarsimaffittut atorsinnaasaannik Kommuneqarfik Sermersooq pilersaarusiorsinnaanermik anguniagaqanngila?

Kommuneqarfik Sermersooq ukiualunnguit qaangiupput Tasiilami containerinik angerlarsimaffittut atorsinnaasunik atugaqarmat.  Tamanna atuisunut innuttaasunullu Tasiilamiittunut naammaginarsimanngilaq. Taamaattumik Tasiilami innuttaasut angerlarsimaffeqanngitsut ajornartorsiutaat ataatsimut iluarsiiviginiarlugit suliniuteqartoqalerpoq, taamaasilluni Tasiilami inissarsiortutut allatsinnissaq periarfissaaqqilerniassammat. 

Tasiilami 2018-ip ukiakkut aanngajaarniutinik atornerluinermut katsorsaavik ’Arsarnerit’ ammarneqarpoq, illu Allorfimmut atatillugu. 2018-imi Tasiilami aanngajaarniutinik atornerluinermut katsorsartinnissamut marlunnik Sermiligaamilu Tasiilamiluunniit nunaqarfimmi allami ataatsimik neqerooruteqarnissaq Allorfiup Kommuneqarfik Sermersuullu akornani isumaqatigiissutaavoq.  Aanngajaarniutinik atornerluinermut katsorsartinnissamut neqeroorummut isumaqatigiissut aamma taanna Tasiilami 2019-imi atuutissaaq.

Tasiilami atornerluisunut katsorsaavimmik attaveqartitsinermi aanngajaarniutinik atornerluisunut katsorsartinnissamut neqeroorutit kiisalu AA-mi oqaloqatiginnittarnerit qitiutinneqalissapput.

Inuulluaqqusillunga

Isak Nielsen Kleist

Pisortaq

Isumaginninnermut Suliffeqarnermullu Ingerlatsivik