Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00-15:00
  2. sis. 12:00-17:00
  3. tall. 10:00-12:00

Tasiilami Utoqqaat sullinneqarnerannut paasisaqarusunnermut apeqquteqaatit

Ilisimavara Kommuneqarfik Sermersuumi utoqqarnut atukkat sapinngisamik pitsaasumik anguniagaqarfigissallugu pingaartinneqartut.  Tamanna pitsaasutut isigaara. Taamaattorli soorunami sumiluunniit maalaarutit ingerlasarput, nalunngilarali suleqatigiinnikkut pitsanngorsaajuaannartoqarsinnaasartoq. Taamaattumik tulleriinnik apeqquteqarpunga:

  1. Tasiilami utoqqaat pisinnaanerusut (utoqqaat illuanniinngitsut, pisinnaanerusulli nammineq angerlarsimaffinni najugallit) qassit eqqiaanikkut sullinneqartarpat?
  2. Illup iluani sullinneqarnikkut qanoq annertutigisumik sullinneqarneq ingerlanneqartarpa?
  3. Utoqqaat utoqqaat illuanni najugaqanngitsut niuerniarnikkut ikiorneqartarnerat qanoq aaqqissugaava?
  4. Utoqqaat illuanni najugaqanngitsut pulaarlugillu tusarniarfigisarpigit? Taamaassimappat qanoq akulikitsigisumik/ akuttutigisumik tamanna pisarpa?
  5. Utoqqaat illuanni susassaqartut (Sulisut) qaqugukkut ataatsimiittarpisi?
  6. Utoqqaat maalaarsinnaasarnerat qanoq suleqatigiissutigineqartarpa? Qanorlu aaqqissuussinissamut naaperiummik naleqqussaasoqartarpa?

Assersuuteqalaarlanga ilaatigut immaqa iluarsisassatut naaperiutigineqarsinnaasumik. Paasisakka naapertorlugit sap ak ataasiarluni utoqqaq niuerniarnermigut biiliunneqartarpoq. Ullulli aalajangersimaqqissaarneri peqqutaallutik ajoraluartumik påskelernerani imaluunniit sisamanngorneq illernartumi niuerniartoqarsinnaanngilaq. Tamanna utoqqarmut imminut tamakkiisumik ikiorsinnaanngittsmut kipiluttunartuuvoq. Ilanngullugu eqqaajumavara qaammat naaneratigut sooq utoqqaat arlallit biiliutinneqarsinnaannginnerat eqqarsaammernarpoq. Nalunngilarput qaammatip sivisuup ingerlaneranerani kinaluunniit akissarsiffikkut niuerniarnissaminut pisariaqartitsisartoq. Tamannali massakkut periuseq atorneqartoq qeratavallaarneranik isumaqarfigaara. Neriullunga eqaannerusumik iluarsiissutaasinaasumillu aaqqissuunneqarsinnaassasoq. 

Ilaatigut illup iluani eqqiaanikkut ikiorneqartarnikkut assersuutigalugu asaanermi pequtit illikartinneqarsinnaanerannik itinerusumik nassuiaassummik ersarissumik paasisaqarusukkaluarpunga. Paasisakka naapertorlugit eqqiaanermi pequtit nikisinneqaqqusaasarsimanngillat, tamanna tupigusuallaatigaara, utoqqaammi peqqinnissakkut eqqiluitsuunermik pisariaqartitsinerat apeqquserneqarsinnaanngimmat.

Neriuppunga tassunga tunngasumik itisiliilaarlutit nassuiaassuteqarfigilaarsinnaagimma.


Administrationens svar

Tasiilami utoqqaat sullinneqarnerat pillugu apeqquteqaatigineqartumut akissuteqaat

Asasara Kommunalbestyrelsimi ilaasortaq, Laura Taúnâjik.

Siullermik apeqqutigisannut qujanarujussuaq.

Ulloq 12 oktobari 2018 Tasiilami utoqqaat sullinneqartarnerat pillugu allaffeqarfimmut apeqquteqaateqarputit.

Apeqquteqaatinnut tunuliaqutaavoq isumat malillugu pissutsit suli pitsaanerulersinnaasut.

Isumaginninnermut aamma Suliffeqarnermut Ingerlatsivik Tasiilami utoqqaat sullinneqartarnerat pillugu apeqqutinik makkuninnga tigusaqarpoq:  

  1. Tasiilami utoqqaat pisinnaanerusut (utoqqaat illuanniinngitsut, pisinnaanerusulli nammineq angerlarsimaffinni najugallit) qassit eqqiaanikkut sullinneqartarpat?
  2. Illup iluani sullinneqarnikkut qanoq annertutigisumik sullinneqarneq ingerlanneqartarpa?
  3. Utoqqaat utoqqaat illuanni najugaqanngitsut niuerniarnikkut ikiorneqartarnerat qanoq aaqqissugaava?
  4. Utoqqaat illuanni najugaqanngitsut pulaarlugillu tusarniarfigisarpisigit? Taamaassimappat qanoq akulikitsigisumik/ akuttutigisumik tamanna pisarpa?
  5. Utoqqaat illuanni susassaqartut (Sulisut) qaqugukkut ataatsimiittarpisi?
  6. Utoqqaat maalaaruteqarsinnaasarnerat qanoq suleqatigiissutigineqartarpa? Qanorlu aaqqissuussinissamut isumaqatigiissuteqarnissamut naleqqussaasoqartarpa?

Isumaginninnermut Suliffeqarnermullu Ingerlatsiviup ilisimatitsissutigisinnaavaa, innuttaasut 20-t missiliorlugit angerlarsimaffimmi ikiorteqartinneqarmata, utoqqarnut tunngasuni suliat allaaserineqarneri tunngavigalugit. Sullissineq pineqarpat, taava piffissami matumani eqqiaanermut, errorsinermut, pisiniartarnermut, imermik solarimillu aallertarnermut ikiorteqarnissaq pisariaqartinneqarpoq.  Innuttaasup pisariaqartitai apeqqutaatillugit allanngorarsinnaapput. Innuttaasut ilai sapaatip akunneranut ataasiarlutik ikiorneqartarput, allallu ullut 14-ikkuutaarlugit ikiorneqartarlutik.

Innuttaasut namminneerlutik pisiniarsinnaasut namminneq pisiniartarput, kisianni pisiat oqimaappata taava imertartartup solarimillu aallertartup pisiat pisiniarfimmiit aallugit innuttaasup angerlarsimaffianut ingerlattarpai. Innuttaasut ilai aamma pisiniarfimmut pisiniarfimmiillu ingerlanneqartarput. Innuttaasut pisariaqartitsinertik naapertorlugu angerlarsimaffimmi ikiorteqarnissaminnik pisariaqartitsisarput, taavalu innuttaasut ilai sapaatip akunneranut ataasiarlutik angerlarsimaffimmi ikiorteqarnissaminnut akuerineqartarput ilaallu sapaatip akunneranut marloriarlutik ikiorteqarnisssamut akuerineqartarlutik. Angerlarsimaffimmi ikiortit takusatik malillugit innuttaasup pisariaqartitaasa allanngorneri nalilersortarpaat.

Utoqqaat Illuanni sulisut qaqugukkut ataatsimiitinneqartarnerat pillugu apeqqutigisat pillugu, ilisimatitsissutigisinnaavarput, sulisut qaammatit tamaasa ataatsimiitinneqartarmata, kisiannili aasaanerani, tassalu juuni, juuli aamma aggustimi pisarnani.

Sulianik naammagittaalliuteqarneq Inunnik Isumaginninnermut Naammagittaalliortarfik aqqutigalugu ingerlanneqartarput, taannaavoq naammagittaaliuutinik pisortanut aqqutissaq. Ilaannikkooriarluni saaffiginnissutit oqaatsitigut allakkatigullu kommunimut imaluunniit borgmesterimut toqqaannartumik ingerlanneqartut tiguneqartarput.

Uagutsinnulli pingaaruteqartuuvoq ingerlaavartumik oqaloqatigiittarnissaq, suliap tamaanga killinnginnerani aaqqiissuteqarfiginissaa.

Utoqqartavut aamma taakku pisariaqartitaat eqqumaffiginiartuartarpavut. Aammali nukissat pigisavut eqqumaffigisariaqarpavut. Tassanissaaq oqaloqatigiinneq uagutsinnut pingaaruteqarpoq, taamaaliorusuttarpugullu innuttaasut ilaqutaasalu qanimut suleqatiginerisigut.

Apeqqutit siulliit saniatigut aamma erseqqissumik paasisaqarfigerusuppat angerlarsimaffimmi ikiorti pequtinik illuartiterisinnaanermut pisinnaatinneqarnersoq, soorlu asaasarneq eqqarsaatigalugu, apeqquserneqarsinnaanngimmat peqqinnissaq pillugu eqqiluisaarnissap pisariaqartuunera.

Sullivimmi atukkat pillugit inatsit naapertorlugu pisussaaffeqarpugut sulisutta suliffimminni atugaasa illersorneqarsinnaasumik isumannaatsuunissaannik peqqinnartuunissaannillu atugaqartitsinissatsinnik.

Taamaattumik eqqiaanermut atatillugu pequtinik nuussisinnaanermut tunngatillugu angerlarsimaffimmi ikiortit oqimaatsunik, soorlu siniffinnik, nerrivinnik nalaarsaarfinnik assigisaannillu, illuartitereqqusaanngillat. Kisianni soorlu nerinermi issiavinnik soorunami illuartiterisinnaapput nerriviup ataa iluamik eqqiarumallugu.

Inuulluaqqusillunga

Isak Nielsen Kleist

Pisortaq

Isumaginninnermut Suliffeqarnermullu Ingerlatsivik