Suliffeqarfimmi Kiffartuussineq

Pædagoginik nunatta avataaneersunik tikisitsineq?

Peter Davidsen

Nuummi perorsaasunik (pædagog) avataanit tikisillugit sulisussarsiortoqartoq tusaamagatsigu pissusissamisoorsoraara apeqqutigissallugu tamanna ilumoornersoq.

Apeqqut ilaatigut tunngaveqarpoq Isumaginninnermut Sulisoqarnermut Inuussutissarsiuteqarnermullu ingerlatsiviup avataanit sulisussarsiortut pillugu januarimi nalunaarsuinerani takuneqarsinnaavoq pædagogit marluk tikisinneqarsimasut.
Apeqquteqaat:

  • Avataanit perorsaasunik qanoq amerlatigisunik tikisitsisoqarniarpa aamma tamatumunnga suna tunngavissaava?
  • Perorsaasunik avataanit tikisitsilluni sulisussarsiornermi ineqartitsinissaq neqeroorummut ilaava aamma taamatut sulisussarsiorneq qanoq naleqassava?
  • Nunaqavissunik perorsaasunik sulisussarsiornermut atatillugu inissamik neqeroorfigineqarpat?
  • Perorsaasunik amigaateqartoqarsimappat susassaqartut kattuffiallu isumasiorneqarpat?

Avataanit sulisussarsiortoqannginnerani perorsaasunut atugassarititaasut pitsanngorsarniarlugit qanoq suliniuteqartoqarsimanersoq paaserusunnarpoq aamma nunatta iluani perorsaasunik sulisussarsiortoqarsimappat taakkununnga atugassarititaasut inissaqarnikkut il.il. neqeroorutaasimasut qanoq avataanit tikisitsinissamut sulisussarsiornermi neqeqoorutaasimasunut sanilliunneqarsinnaanersut paaserusunnarpoq.

Kiisalu nunaqavissut perorsaasutut atorfimmut atatillugu inissamik neqeroorfigineqarsimanersut, tassami avataaniit perorsaasut tikisinneqartut inissaqartissimassagutsigit aamma nunaqavissunut taamatut neqeroorfigisariaqarpagut.

SK

The administration's answer

Meeqqerivinni atorfinitsitsisarnerit meeqqerivinni ataasiakkaani aqutsisunit isumagineqartarpoq, taamaattumik ingerlatsivimmi perorsaasut atorfeqartinneqartut pillugit tamatumunnga atatillugu suminngaanneernerinik nalunaarsuiffeqanngilagut.  Kisianni Sulisoqarnermut Immikkoortumi atorfinitsitsinissap tungaanut, soorunami, atorfinitsitsinerit inatsisitigut piumasarineqartunut naapertuuttuunersut qulakkeerneqartarpoq.

Perorsaasunik immikkut amerlassusilikkanik, Nunatta avataaneersunik, tikisitsinissaq pilersaarutaanngilaq.  Meeqqerivinni perorsaasutut atorfiit 40-t missaat inuttaqanngillat.  Kommunip nittartagaani najukkamilu aviisini perorsaasunik sulisussarsiortoqartuartarpoq, aammalu suliffissaaleqisut meeqqerivinni atorfinnik sulilernissaannut pikkorissartarnissaannik neqeroorfigisarpavut.  Ingerlatsivimmi siunertaraarput, atorfiit inuttaqanngitsut ilinniarsimasunik inuttalertarnissaat, meeqqat ineriartornerannut nukittorsaaqataasinnaasunik, tamatumanilu perorsaasut marluinnik oqaaseqaaseqartut atorfinitsikkusunneqarnerusarput.

Inuttassarsiuussinermi qinnuteqartunut tamanut piumasaqaatit assigiipput, suminngaanneerfik apeqqutaatinnagu.  Inoqarfinnit aalajangersimasuneersut imaluunniit nunanit allaneersut siunnerfigalugit inuttassarsiuussisoqarneq ajorpoq.  Taamaattumik avataaneersunik sulisussarsiornermi allagarsiuussineq qanoq akeqarnersoq pillugu apeqqut akineqarsinnaanngilaq.

Aap.  Septembari 2015-imili meeqqerivinni perorsaasutut atorfinitsinneqartut atorfimmut atatillugu inissamik neqeroorfigineqarsinnaalernikuupput.  Atorfinnut aalajangersimasunut allagarsiuussinissamut atatillugu inissanik qinnuteqaatit tamarmik atorfiup tamanut nittarsaanneqannginnerani inissamik agguaassisartunit suliarineqaqqaartarput.

Perorsaasunik amigaateqarneq anigorniarlugu suliniutinik arlalinnik aallartitsisoqarnikuuvoq (04P 2015imit ingerlatsiviit kukkunersiorneqareernerisa kingorna iliuusissatut pilersaarut – ulluunerani neqeroorutit, novembarip 15-ianni 2016 kommunalbestyrelsip ataatsimiinnerani saqqummiunneqartoq naapertorlugu).  Ingerlatsiviup iliuuserisinnaasai ajoraluartumik killeqarmata ajornartorsiutaavoq, tassani pineqarmat, ataatsimut isigalugu ikittuinnaat Ilulissani perorsaasunngorniat ilinniarfiannut ilinnialerniarlutik qinnuteqaateqartarmata, tamatumalu kingunerisaanik nuna tamakkerlugu perorsaasunik amigaateqartoqarluni.  Kisitsisit kingulliit naapertorlugit takuneqarsinnaavoq Nunatsinni perorsaasutut atorfiit 200-t missingi inuttaqanngitsut.

Kisianni ajornartorsiutit qulaani taaneqartut anigorniarlugit imatut iliuuseqartoqarnikuuvoq:

Perorsaasunik ilinniarsimasunik atorfinitsitsiniartarnerup ajornartorsiutaanera pillugu Ilinniartitaanermut Naalakkersuisoqarfimmut arlaleriarluta saaffiginnittarpugut.
Tamatumani ingerlatsivimmiit Nuummi perorsaasunngornianut ilinniarfeqalernissaa kissaatigineqarnikuuvoq, tassami ingerlatsivimmit ilisimaneqarmat, perorsaasunngornianut ilinniarfiup Ilulissani inissisimanera pissutigalugu maani najugallit orniginartinneq ajormassuk.  Tamanna pillugu Naalakkersuisoqarfiup akissuteqarnissaa ingerlatsivimmit utaqqineqarpoq.
Kommunimi suliffissarsiuussisarfik suleqatigalugu suliffissaaleqisut meeqqerivinni sulilersinniarlugit pikkorissartinneqarnissaannik neqerooruteqartoqarnikuuvoq.  Taamatut suliniuteqartoqaraluartoq meeqqerivinnut amerlanerusunik qinnuteqaateqartoqanngilaq.
Meeqqerisutut isumaginninnermilu ikiortitut kommunip meeqqeriviini atorfillit Nuummi najugaq qimannagu perorsaasunngorniatut ilinniarnissaannik ataavartumik neqeroorfigisarpavut.  Tamannali maannakkut meeqqerivinni sulisunik amerlanerulersitsinissamut aaqqiissutaanngilaq, sulisooreersut piginnaanngorsarneqartarnerat pissutigalugu.  Kisianni sulisorisatsinnik piginnaanngorsaanermut pikkorinnerulersitsinissamullu ilapittuutaavoq.

Suliassaqarfimmut perorsaasunik amerlanerusunik pilerilersitsiniarneq iluatsinngitsoorpoq, taamaattumillu perorsaasunik amerlasuunik pinasuartumillu suli amigaateqartorujussuuvugut.  Taamaammat kommunip ulluunerani neqeroorutaanut pitsaassutsimik innarliivoq, inatsimmilu ikinnerpaamik sulisoqarnissamut aalajangersakkat pingaarnerit malinnissaat ajornakusoortunngorluni.  Taamaattumik, Danmarkimi perorsaasunngorniarlutik ilinniartut Kalaallit Nunaanni suliffissarsiorsinnaanerat  paasititsiniutigineqassasoq ingerlatsiviup isumaliutersuutigaa.
Tamatumunnga Kalaallit Nunaanni perorsaasut ilinniarsimasut ukiorpassuarni suli ataavartumik amigaataasussaaneri pissutaavoq.